បាងកក៖ នាយករដ្ឋមន្រ្តីថៃ លោក អនុទិន ឆាន់វីរៈគុល នាថ្ងៃចន្ទ នេះ បានគូសបញ្ជាក់អំពីរបៀបវារៈគោលនយោបាយសេដ្ឋកិច្ចរដ្ឋាភិបាលថ្មីរបស់លោក ទៅកាន់សភាថៃ ដោយផ្ដោតលើការស្រោចស្រង់សេដ្ឋកិច្ច ដែលថៃកំពុងតែប្រឈមច្រើនយ៉ាង។ នេះបើយោងតាមការចេញផ្សាយដោយសារព័ត៌មាន CNA នាថ្ងៃចន្ទ ទី២៩ ខែកញ្ញា ឆ្នាំ២០២៥។
គោលនយោបាយរបស់លោក អនុទិន រួមមាន វិធានការកាត់បន្ថយថ្លៃស្នាក់នៅ ដោះស្រាយបញ្ហាបំណុលគ្រួសារ និងជំរុញវិស័យទេសចរណ៍ក្នុងស្រុកដែលកំពុងធ្លាក់ចុះ ដោយប្រទេសថៃ ឥឡូវនេះ កំពុងជួបបញ្ហាជាមួយពន្ធគយរបស់សហរដ្ឋអាមេរិក បំណុលគ្រួសារខ្ពស់ កម្សោយតម្រូវការក្នុងស្រុក និងកំណើនប្រាក់បាត។
លោកបន្ដ ប្រាប់សភាថៃ ថា «ដោយសារពេលវេលាមានកំណត់ ហើយរដ្ឋាភិបាលថ្មីមិនអាចរៀបចំកញ្ចប់ថវិកា ក៏ដូចជាមានសម្លេងភាគតិចក្នុងរដ្ឋបាល រដ្ឋាភិបាលត្រូវតែដោះស្រាយជាបន្ទាន់នូវបញ្ហាប្រឈមដែលកំពុងកើតមានក្នុងប្រទេសនាពេលនេះ»។
លោកបាននិយាយថា ក្នុងចំណោមវិធានការសេដ្ឋកិច្ច រដ្ឋាភិបាលនឹងជួយបុគ្គលដែលមានបំណុលមិនលើសពី ១០០,០០០បាត (៣,១០៣ដុល្លារអាមេរិក) និងផ្តល់សាច់ប្រាក់ងាយស្រួលរហូតដល់ ១លានបាតសម្រាប់អាជីវកម្មខ្នាតតូច។
យ៉ាងណាម៉ិញ ការប្ដេជ្ញារបស់លោក អនុទីន នៅថ្ងៃចន្ទ នេះ ធ្វើឡើងបន្ទាប់ពីរដ្ឋាភិបាលថ្មីរបស់លោក កាលពីថ្ងៃសុក្រ បានប្រកាសថា នឹងចាប់ផ្តើមឡើងវិញ នូវ «គម្រោងចំណាយប្រាក់រួមគ្នា» តម្លៃ ៤៧ប៊ីលានបាត (១,៤៦ប៊ីលានដុល្លារ) ដែលក្នុងនោះរដ្ឋាភិបាលនឹងជួយទូទាត់ការចំណាយរបស់ពលរដ្ឋដែលមានសិទ្ធិរហូតដល់ ៦០ ភាគរយ ចំពោះរាល់ការទិញម្ហូបអាហារ និងទំនិញប្រើប្រាស់មួយចំនួន។
លោក អនុទិន បានបន្ថែមទៀតថា អាទិភាពផ្សេងៗទៀតរួមមានការដោះស្រាយភាពតានតឹងដោយសន្ដិវិធីជាមួយកម្ពុជា ការប្រយុទ្ធប្រឆាំងនឹងការលេងល្បែងស៊ីសងខុសច្បាប់ និងការបង្កើនការត្រៀមខ្លួនសម្រាប់គ្រោះមហន្តរាយតាមរយៈការប្រើប្រាស់ប្រព័ន្ធព្រមានកម្រិតខ្ពស់។
ប៉ុន្ដែរដ្ឋាភិបាលរបស់លោក អនុទីន មានពេលតិចតួចក្នុងការអនុវត្តវិធានការសេដ្ឋកិច្ចរបស់ខ្លួន។ កាលពីសប្ដាហ៍មុន លោកបានប្រកាសថា លោកនឹងរំលាយសភានៅចុងខែមករា ដោយឆ្ពោះទៅរកការបោះឆ្នោតថ្មីនៅចុងខែមីនា ឬដើមខែមេសា។
យោងតាមទីភ្នាក់ងារផែនការរដ្ឋបានឱ្យដឹងថា សេដ្ឋកិច្ចថៃ បានកើនឡើងប្រមាណ ២,៥ភាគរយ កាលពីឆ្នាំមុន ដែលនេះជាកំណើនទាបជាងគេធៀបនឹងដៃគូប្រជែងសំខាន់ៗក្នុងតំបន់។ ខណៈរដ្ឋាភិបាលរំពឹងថា សេដ្ឋកិច្ចថៃឆ្នាំនេះ នឹងកើនឡើងត្រឹមចម្លោះ ១,៨ភាគរយ ទៅ ២,៣ភាគរយ នៅឆ្នាំ២០២៥នេះ ដោយអាចចុះខ្សោយខ្លាំងនៅចុងឆ្នាំ ដោយសារតែពន្ធរបស់សហរដ្ឋអាមេរិក៕
