ធុងសំរាមប្រមាណជាង ២៤០០ ធុង បានដឹកទៅដល់សាលាខេត្ត និងប្រគល់ជូនរដ្ឋបាលខេត្តពោធិ៍សាត់ កាលពីថ្ងៃទី ១៣ ខែតុលា ម្សិលមិញ។
ធុងសំរាមទាំងនេះ នឹងត្រូវយកទៅដាក់នៅតាមសាលារៀន វត្តអារាម មន្ទីរពេទ្យ និងទីសាធារណៈគោលដៅនានាក្នុងមូលដ្ឋាន ដើម្បីបង្កើនចំណេះដឹងអំពីការប្រមូលទុកដាក់សំរាម ឱ្យបានត្រឹមត្រូវ ជាពិសេសការប្រមូលទុកដាក់សំណល់ប្លាស្ទិក ក្នុងធុង គ្រប់គ្រងឱ្យបានល្អ ងាយស្រួលកែច្នៃឡើងវិញ ឬដុតចោលនៅក្នុងឡដុតសំរាម ស្របតាមបទដ្ឋានបច្ចេកទេសត្រឹមត្រូវ។ រដ្ឋមន្ត្រីក្រសួងបរិស្ថាន ឯក ឧត្តម អ៊ាន សុផល្លែត លើកឡើងដូច្នេះ នៅក្នុងពិធីប្រកាសបែងចែកធុងសំរាមទៅឲ្យខេត្តចំនួន៦ កាលពីថ្ងៃទី ៧ ខែតុលា ឆ្នាំ ២០២៥ កន្លងទៅ។
នៅអំឡុងពេលប្រគល់ធុងសំរាមឲ្យរដ្ឋបាលខេត្តពោធិ៍សាត់ ឯកឧត្តម សាបូ អូហ្សាណូ រដ្ឋលេខាធិការក្រសួងបរិស្ថាន បានបញ្ជាក់ថា ក្រសួងបរិស្ថានរៀបចំប្រគល់ធុងសំរាមជូនរដ្ឋបាលខេត្តពោធិ៍សាត់នាពេលនេះ ដើម្បីបន្តធ្វើឱ្យបរិស្ថានស្អាត ការរស់នៅរបស់ប្រជាពលរដ្ឋមានសុខភាពល្អ និងចូលរួមជំរុញភាពស្អាតនៅកម្ពុជា តាមរយៈការបង្កើនចំណេះដឹង លើការទុកដាក់សំរាមឱ្យត្រឹមត្រូវ ដែលមិនត្រឹមតែផ្ដល់ផលប្រយោជន៍ដល់បុគ្គល គ្រួសារ និងដល់សង្គមជាតិយើងផងដែរ។ ឥឡូវនេះសំរាម និងសំណល់ប្លាស្ទិកត្រូវបានដោះស្រាយ និងរៀបចំបានស្អាតជាបណ្តើរៗ តាមរយៈយុទ្ធនាការនានា ផ្ដើមចេញពីយុទ្ធសាស្ត្រចក្រាវិស័យបរិស្ថាន ដែលបានបង្កើតឡើងអនុលោមតាមយុទ្ធសាស្ត្របញ្ចកោណ ដំណាក់កាលទី១ និងការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា។
គួរបញ្ជាក់ផងដែរថា ក្រៅពីខេត្តពោធិ៍សាត់ ដែលទទួលបានធុងសំរាមចំនួន ២ ៤៥៤ ធុង ខេត្តចំនួន៥ផ្សេងទៀតរួមមាន ខេត្តត្បូងឃ្មុំទទួលបានចំនួន ៣ ៤០៥ ខេត្តព្រះសីហនុចំនួន ៨២៨ ធុង ខេត្តកោះកុងចំនួន ៩៣៩ ធុង ខេត្តកំពតចំនួន ២ ៣៥៨ ធុង និងខេត្តកែបចំនួន ១៥០ ធុង។ ជាមួយគ្នានេះ រដ្ឋបាលខេត្តនឹងបន្តចែកជូនចំនួន ៣ ធុងសំរាម ដល់គ្រប់សាលារៀន មណ្ឌលសុខភាព និងវត្តអារាម។
សូមជម្រាបថា ក្រសួងបរិស្ថាន បានដាក់ចេញនូវយុទ្ធនាការចំនួន ៣ ជាបន្តបន្ទាប់ ដើម្បីភាពស្អាត កាត់បន្ថយការប្រើប្រាស់ប្លាស្ទិក និងសំរាមបញ្ចេញទៅទីលាន ការរៀបចំឱ្យមូលដ្ឋានស្អាត និងជាពិសេសតាមដងផ្លូវជាតិស្អាត គ្មានសំរាម និងសំណល់ប្លាស្ទិករាយប៉ាយ តាមយុទ្ធនាការប្ដេជ្ញាចិត្តដោយភាពស្អាតក្នុងខ្លួន ក្រោមប្រធានបទ «ថ្ងៃនេះ ខ្ញុំមិនប្រើ ថង់ប្លាស្ទិកទេ» ដែលមានអ្នកចូលរួមជាង ១៣ លាននាក់ ទី២យុទ្ធនាការ «កម្ពុជាស្អាត ខ្មែរធ្វើបាន» ដែលមានអ្នកចូលរួមប្រមាណ ៧ លាននាក់ និងទី ៣ យុទ្ធនាការសម្អាតផ្លូវជាតិ ក្រោមប្រធានបទ « ផ្លូវជាតិគ្មានសំរាម និងសំណល់ប្លាស្ទិក» ដោយយុទ្ធនាការទាំង៣នេះ មានរដ្ឋបាលថ្នាក់ក្រោមជាតិ អាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធ ព្រះសង្ឃ យុវជនកម្ពុជា បណ្តាញអង្គការ សមាគម សង្គមស៊ីវិល ផ្នែកឯកជន សិស្សានុសិស្ស លោកគ្រូអ្នកគ្រូ និងប្រជាពលរដ្ឋចូលរួមនៅទូទាំងប្រទេសកម្ពុជា៕
