ព្រះខ័នរាជស្វាយរៀង បានបញ្ចប់ភាពមិនទាន់ចាញ់សោះរបស់កងយោធពលខេមរភូមិន្ទ ត្រឹមសប្ដាហ៍ទី៨ នៃពានរង្វាន់លីគកំពូលកម្ពុជា (Cambodian Premier League) រដូវកាលឆ្នាំ២០២៥-២៦ ដោយយកឈ្នះក្នុងលទ្ធផល ៦-១ នារាត្រីថ្ងៃទី១៩ តុលា ក្នុងកីឡដ្ឋានស្តាតចាស់។
ក្រុមកងយោធពលខេមរភូមិន្ទ ក្រោមការដឹកនាំរបស់លោក ភា សុភក្រា គ្រូបង្វឹកសញ្ជាតិខ្មែរ បានជួយក្រុមដែលមានមូលដ្ឋាននៅរង្វង់មូលកូចកាណុង មិនចាញ់៦ប្រកួត ដោយឈ្នះ២ ស្មើ៤ និងទើបតែចាញ់ព្រះខ័នរាជស្វាយរៀង នៅសប្ដាហ៍ទី៨។
ដោយឡែកព្រះខ័នរាជស្វាយរៀង ឆ្លងកាត់៧ប្រកួត ឈ្នះ៦ ចាញ់១ រួមមាន៖ប្រកួតទី១ ឈ្នះណាហ្គាវើលដ៍ ៣-០ ប្រកួតទី២ ឈ្នះអង្គរថាយហ្កឺរ ៣-០ ប្រកួតទី៣ ឈ្នះបឹងកេត ៣-០ ប្រកួតទី៤ ឈ្នះវិសាខា ២-០ ប្រកួតទី៥ ឈ្នះឡាយហ្វ ៦-១ ប្រកួតទី៦ ចាញ់ភ្នំពេញក្រោន ៣-២ ប្រកួតទី៧ ឈ្នះកងយោធពលខេមរភូមិន្ទ ៦-១។
ពានរង្វាន់ លីគកំពូលកម្ពុជា Cambodian Premier League រដូវកាលថ្មី ឆ្នាំ២០២៥-២០២៦ ចាប់ផ្តើមពី ថ្ងៃសៅរ៍ ទី៩ ខែសីហា មានសមាជិកក្រុម ១១ចូលរួមប្រកួតប្រជែង រួមមាន៖ ឡាយ ខេត្តព្រះសីហនុ បឹងកេត កងយោធពលខេមរភូមិន្ទ វិសាខា ព្រះខ័នរាជស្វាយរៀង ណាហ្គាវើលដ៍ អឹម អូ អាយ កំពង់ដេវ៉ា អង្គរថាហ្កឺរ អាយអេសអាយ ដង្កោសែនជ័យ និងគិរីវង់សុខសែនជ័យ៕
