ភ្នំពេញ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃទី១១ ខែវិច្ឆិកា ឆ្នាំ ២០២៥ ម្សិលមិញនេះ បានចេញដីកាឃុំខ្លួនបណ្ដោះអាសន្នមនុស្សចំនួន ៤ នាក់ ពាក់ព័ន្ធនឹងករណីក្លែងឯកសារសាធារណៈ ក្លែងប្រើប្រាស់ឯកសារ និងរំលោភលើលំនៅឋាន។
ជនដែលត្រូវឃុំខ្លួនរួមមាន ៖ ទី១. ឈ្មោះ វ៉ាន់ ស្រីនីត ភេទស្រី អាយុ ២៤ ឆ្នាំ ។ ទី២.ឈ្មោះ សាម ស៊ាមមួយ ភេទស្រី អាយុ ៣៣ ឆ្នាំ។ ទី៣. ឈ្មោះ ផែន ម៉ូនីកា ភេទស្រី អាយុ ៤៣ ឆ្នាំនិងទី៤ ឈ្មោះ
សឿន ណាក់ ភេទប្រុស អាយុ ៣៧ ឆ្នាំ។ អ្នកទាំង៤ ត្រូវបានតុលាការបានសម្រេចដាក់ឃុំខ្លួនជាបណ្ដោះអាសន្ននៅពន្ធនាគារព្រៃស ម១ និងពន្ធនាគារព្រៃស ម២ ពីបទ ក្លែងឯកសារសាធារណៈ ក្លែង និងប្រើប្រាស់ឯកសារក្លែង សមគំនិត និងរំលោភលើលំនៅឋាន ដែលជាបទល្មើសមានចែងក្នុងមាត្រា ២៨, ២៩, ២៩៩, ៦២៩ និង ៦៣០ នៃក្រមព្រហ្មទណ្ឌ។
សូមបញ្ជាក់ថា កាលពីថ្ងៃទី ៥ ខែវិច្ឆិកា ឆ្នាំ ២០២៥ នាយកដ្ឋាននគរបាលព្រហ្មទណ្ឌ បានទទួលពាក្យបណ្តឹងពីលោក ឯក រិទ្ធីវណ្ណ ដែលឲ្យដឹងថា មានជនមិនស្គាល់អត្តសញ្ញាណមួយក្រុម បានកាត់សោចូលទៅក្នុងផ្ទះរបស់ខ្លួន ស្ថិតនៅបុរីម៉ន ដានី គម្រោង ២០ ផ្ទះលេខ ៣៨ ផ្លូវលេខ ០២ ភូមិស្វាយ សង្កាត់ស្នោរ ខណ្ឌកំបូល រាជធានីភ្នំពេញ។
បន្ទាប់ពីទទួលពាក្យបណ្តឹង កម្លាំងជំនាញនៃនាយកដ្ឋាននគរបាលព្រហ្មទណ្ឌ ដឹកនាំដោយ ឧត្តមសេនីយ៍ត្រី ហ៊ុន មុន្នីរ័ត្ន អនុប្រធាននាយកដ្ឋាននគរបាលព្រហ្មទណ្ឌ បានសហការជាមួយអាជ្ញាធរមូលដ្ឋាន ចុះអញ្ជើញមនុស្សចំនួន ៤ នាក់ ពាក់ព័ន្ធនឹងករណីខាងលើ មកធ្វើការសាកសួរ។
ក្នុងអំឡុងសាកសួរ ជនសង្ស័យទាំង ៤ នាក់ បានសារភាពប្រហាក់ប្រហែលគ្នាថា ពួកគេពិតជាបានធ្វើសកម្មភាពក្លែងឯកសារផ្ទះលេខ ៣៨ ផ្លូវលេខ ២ ភូមិស្វាយ សង្កាត់ស្នោរ ខណ្ឌកំបូល ដើម្បីតប្រព័ន្ធទឹកភ្លើង និងបានឲ្យបក្ខពួកចូលស្នាក់នៅ។ បច្ចុប្បន្ន សមត្ថកិច្ចកំពុងបន្តស៊ើបអង្កេតបន្ថែម ដើម្បីរកមូលហេតុ និងពាក់ព័ន្ធផ្សេងទៀត៕
អត្ថបទ៖ ចតុម្មុខ
