ភ្នំពេញ ថ្ងៃទី២៤ ខែវិច្ឆិកា ឆ្នាំ២០២៥៖ អគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ បានរៀបចំសិក្ខាសាលាពិគ្រោះយោបល់ថ្នាក់ជាតិលើសេចក្ដីព្រាងផែនការយុទ្ធសាស្ដ្រជាតិស្ដីពីអត្តសញ្ញាណកម្ម ដំណាក់កាលទី២ (២០២៦-២០៣៥) នៅសណ្ឋាគារ Sun & Moon Riverside Hotel រាជធានីភ្នំពេញ។ សិក្ខាសាលានេះ ជាលើកទី២ បន្ទាប់ពីការរៀបចំលើកទី១ កាលពីថ្ងៃទី១១ ខែកញ្ញា ឆ្នាំ២០២៥ ដែលទទួលបានធាតុចូលនិងមតិយោបល់ដ៏មានសារសំខាន់ជាច្រើនសម្រាប់ការកសាងផែនការយុទ្ធសាស្ត្រដំណាក់កាលទី២។
ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយកដ្ឋានអត្តសញ្ញាណកម្ម បានថ្លែងថា សិក្ខាសាលានៅថ្ងៃនេះជាលើកទី២ បន្ទាប់ពីការរៀបចំសិក្ខាលាលើកទី១ កាលពីថ្ងៃទី១១ ខែកញ្ញា ឆ្នាំ២០២៥ នៅសណ្ឋាគារហ៊ីម៉ាវារី ដែលទទួលបានធាតុចូលនិងមតិយោបល់ដ៏មានសារសំខាន់ជាច្រើន សម្រាប់បញ្ចូលក្នុងសេចក្ដីព្រាងផែនការយុទ្ធសាស្រ្តដំណាក់កាលទី២ ឲ្យកាន់តែគ្រប់ជ្រុងជ្រោយ និងបន្ស៊ីគ្នាជាមួយយុទ្ធសាស្រ្តតាមវិស័យពាក់ព័ន្ធនិមួយៗ ។
ឯកឧត្តម ឧត្តមសេនីយ៍ឯក បណ្ឌិត តុប នេត បានលើកឡើងថា ផែនការយុទ្ធសាស្រ្តដំណាក់កាលទី១ ជាផែនការដ៏ល្អមួយដែលជាផែនទីតម្រង់ទិស លើការងារអត្តសញ្ញាណកម្ម ដែលបានដាក់ចេញកាលពី១០ឆ្នាំមុន ពីឆ្នាំ២០១៧-២០២៦។ បច្ចុប្បន្នអគ្គនាយកដ្ឋានអត្តសញ្ញាណកម្ម កំពុងដើរតួនាទីយ៉ាងសកម្មលើផែនការមេនេះ ដើម្បីឈានទៅសម្រេចចក្ខុវិស័យ «មនុស្សគ្រប់រូបត្រូវបានកំណត់អត្តសញ្ញាណ» និង «បុគ្គលម្នាក់មានអត្តសញ្ញាណតែមួយ»។ រយៈពេល១០ឆ្នាំកន្លងមកនេះ ផែនការយុទ្ធសាស្រ្តដំណាក់កាលទី១ បានសម្រេចប្រមាណជា៨០% លើការងារអត្តសញ្ញាណកម្ម។ ដូច្នេះសិក្ខាសាលាពិគ្រោះយបល់ថ្នាក់ជាតិនៅថ្ងៃនេះ បានរៀបចំឡើងក្នុងគោលបំណងសំខាន់ចំនួន២គឺ
- ទី១ បង្ហាញអំពីសមិទ្ធិផលសំខាន់ៗ ដែលសម្រេចបានរយៈពេល៩ឆ្នាំក្នុងការអនុវត្ត ផែនការយុទ្ធសាស្រ្តស្ដីពីអត្តសញ្ញាណកម្ម (ដំណាក់កាលទី១) ២០១៧-២០២៦ ជូនអង្គសិក្ខាសាលា ដើម្បីស្វែងយល់អំពីវឌ្ឍនភាពជារួមលើការងារអត្តសញ្ញាណកម្ម។
- ទី២. បង្ហាញអំពីសេចក្ដីព្រាង ផែនការយុទ្ធសាស្រ្តជាតិស្ដីពីអត្តសញ្ញាណកម្ម (ដំណាក់កាលទី២) ២០២៦-២០៣៥ ជូនអង្គសិក្ខាសាលាដើម្បីពិនិត្យ ផ្ដល់មតិយោបល់ ឬធាតុចូលលើចំណុចពាក់ព័ន្ធនានា។
ផ្អែកតាមរបាយការណ៍របស់អគ្គនាយកដ្ឋានអត្តសញ្ញាណកម្ម បានឲ្យដឹងថា ផែនការយុទ្ធសាស្រ្តជាតិដំណាក់កាលទី១ អគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ សម្រេចបាននូវសមិទ្ធផលជាច្រើនដូចជា៖
- ការអនុម័ត និងការប្រកាសឱ្យប្រើប្រាស់ ច្បាប់ស្ដីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម ដែលជាជោគជ័យដ៏ធំមួយក្នុងការកែសលម្អប្រព័ន្ធចុះបញ្ជីអត្រានុកូលដ្ឋាន និងការលើកកម្ពស់ការផ្ដល់សេវាសាធារណៈ។
- សម្រេចបានការរៀបចំលិខិតបទដ្ឋានគតិយុត្ត ក្រោមច្បាប់ចំនួន១៧ ដើម្បីជំរុញការអនុវត្តច្បាប់
- បានអភិវឌ្ឍប្រព័ន្ធរួមអត្តសញ្ញាណប្រជាជន (IPIS) និងការរៀបចំមជ្ឈមណ្ឌលគ្រប់គ្រងទិន្នន័យ (ខ្នាតតូច) ដែលជាផ្នេកមួយនៃការកសាងប្រព័ន្ធអេកូឡូស៊ី នៃប្រព័ន្ធរួមអត្តសញ្ញាណប្រជាជន។
- បានអនុវត្តសាកល្បង «ការចុះបញ្ជីអត្រានុកូលដ្ឋាន តាមប្រព័ន្ធបច្ចេកវិទ្យាគមនាគមន៍ និងព័ត៌មាន តាមរយៈប្រព័ន្ធដំណឹងពីមូលដ្ឋានសុខាភិបាល» នៅសង្កាត់ចំនួន៦ នៅខណ្ឌពោធិ៍សែនជ័យ រាជធានីភ្នំពេញ ដែលចាប់ផ្ដើមដាក់ឱ្យប្រើប្រាស់លេខកូដសម្គាល់អត្តសញ្ញាណបុគ្គល (UIC)
- បានរៀបចំសាស្រ្តប្រាស្រ័យទាក់ទងនៃការផ្លាស់ប្ដូរឥរិយាបថក្នុងសង្គម ដើម្បីពង្រឹងដល់ការចុះបញ្ជី អត្រានុកូលដ្ឋាន (SBCC) និង
- បានសម្រួលយន្ដការផ្ដល់សេវាឱ្យកាន់តែល្អជូនប្រជាពលរដ្ឋ (ដូចជាសេវាលិខិតឆ្លងដែនអនឡាញ សេវាផ្ញើឯកសារដល់ផ្ទះ សេវាកែតម្រូវទិន្នន័យ សេវាផ្ទៀងផ្ទាត់ ទិន្នន័យ (តាមរយៈយន្ដការ CamDX) សេវាអត្តសញ្ញាណកម្មចល័តជាដើម។
ក្នុងឱកាសសិក្ខាសាលាពិគ្រោះយោបល់ថ្នាក់ជាតិនេះដែរ លោក Shakeel Ahmad អនុប្រធាន UNDP Cambodia បានផ្តួចផ្តើមថា ផែនការយុទ្ធសាស្ត្រ ដំណាក់កាលទី២ គឺជាជំហានសំខាន់ ក្នុងការបង្កើតបែបបទរដ្ឋបាលសម័យថ្មីរបស់កម្ពុជា។ លោកបានលើកថា ចក្ខុវិស័យ “មនុស្សម្នាក់ មួយអត្តសញ្ញាណ” មិនមែនជាការកំណត់បច្ចេកទេសទេ ប៉ុន្តែជាមូលដ្ឋានសម្រាប់ភាពរួមបញ្ចូល ការការពារ និងការចូលដល់សេវារដ្ឋយ៉ាងត្រឹមត្រូវ។
នៅក្នុងសិក្ខាសាលាខាងលើនេះដែរ លោកស្រី Stephanie Tan, នាយកប្រឹក្សាបច្ចេកទេសអង្គការ Vital Strategies, បានផ្ដល់ការគាំទ្រយ៉ាងច្បាស់ដល់ការអនុវត្ត ផែនការយុទ្ធសាស្រ្ត ដំណាក់កាលទី២ ដែលផ្តោតលើប្រព័ន្ធឌីជីថល សន្តិសុខទិន្នន័យ និងការចូលរួមសាធារណៈ។ អ្នកស្រីបានសង្កត់ធ្ងន់ថា ផែនការនេះមានសារៈសំខាន់ក្នុងការធានាឱ្យប្រជាជនកម្ពុជា អាចប្រើអត្តសញ្ញាណដែលទុកចិត្តបានសម្រាប់សេវាសាធារណៈ និងឯកជន និងជាដៃគូនាំមុខសម្រាប់ការអភិវឌ្ឍប្រព័ន្ធឌីជីថល និងសេវាសាធារណៈរបស់ប្រទេស។
សូមជម្រាបជូនថា អគ្គនាយកដ្ឋានអត្តសញ្ញាណកម្មបានផ្ដួចផ្ដើមការងាររៀបចំផែនការយុទ្ធសាស្រ្តដំណាក់កាលទី២ តាំងពីខែមករា ឆ្នាំ២០២៤។ នៅខែសីហា ឆ្នាំ២០២៤ អង្គការ UNDP (យូអ៊ិនឌីភី) និងអង្គការ Vital Strategies (វីតាល់ ស្ត្រាទីជី) បានបញ្ជាក់ជាផ្លូវការក្នុងការគាំទ្រលើការងារនេះ។
ផែនការយុទ្ធសាស្ត្រជាតិស្ដីពីអត្តសញ្ញាណកម្ម (ដំណាក់កាលទី២) ២០២៦-២០៣៥ គឺជាមូលដ្ឋានគ្រឹះ ដ៏រឹងមាំ និងជាសសរស្ដម្ភលើការរៀបចំហេដ្ឋារចនាសម្ព័ន្ធសាធារណៈឌីជីថល (DPI) និងអត្តសញ្ញាណឌីជីថល នៅកម្ពុជា។ ផែនការយុទ្ធសាស្ត្រដំណាក់កាលទី២នេះ នឹងបន្តដោះស្រាយបញ្ហាប្រឈមដែលនៅសេសសល់ ពីការអនុវត្ត ផែនការយុទ្ធសាស្ត្រដំណាក់កាលទី១ ព្រមទាំងដាក់ចេញនូវផែនការកែទម្រង់ ដោយបង្កើតនូវ “អត្តសញ្ញាណស្របច្បាប់សម្រាប់ប្រជាពលរដ្ឋខ្មែរគ្រប់រូប និងមនុស្សគ្រប់រូបដែលរស់នៅក្នុងប្រទេសកម្ពុជា” ព្រមទាំងការកសាងនូវអត្តសញ្ញាណឌីជីថលជាតិមួយ ដែលមានសុវត្ថិភាព និងអាចជឿទុកចិត្តបាន សម្រាប់ ប្រជាពលរដ្ឋខ្មែរប្រើប្រាស់ក្នុងការទទួលសេវាសាធារណៈ និងសេវាឯកជន៕
