នៅក្នុងលិខិតបំភ្លឺមួយរបស់ក្រសួងការបរទេសកម្ពុជា ដែលចេញផ្សាយជាសាធារណៈកាលពីថ្ងៃទី ២៤ ខែវិច្ឆិកា ឆ្នាំ២០២៥នេះ បានបញ្ជាក់ថា រូបភាពសំណង់ផ្លូវកាត់សមុទ្រ ដែលឃើញចែកផ្សព្វផ្សាយនៅក្នុងបណ្ដាញសង្គមគឺជា សំណង់ផ្លូវចេញពីដីគោក នៃសង្កាត់ហាទៀង (ទីរួមខេត្តពាម) ខេត្តអានយ៉ាង ទៅកាន់ កំពុងផែពហុបំណងនៃទីក្រុងហាទៀង ដែលបច្ចុប្បន្នស្ថិតក្នុងទឹកដីវៀតណាម។ ខេត្តអានយ៉ាង ពីមុនឈ្មោះខេត្តចូវដុក ត្រូវបានវៀតណាមបង្រួមខេត្តខ្មែរ៣ចូលគ្នាតែមួយរួមមាន មាត់ជ្រូក, ក្រមួនស, និងពាម។
រូបភាពនៃសំណង់នេះ ត្រូវបានក្រុមបំពុលព័ត៌មានតាមបណ្ដាញសង្គមមួយចំនួន បានចែកផ្សាយយ៉ាងផុលផុស ដោយមានភ្ជាប់ជាមួយខ្លឹមសារ បំភ្លៃការពិត ឌឺដង និងញុះញង់ធ្វើឲ្យមានការភានច្រឡំនៅក្នុងសង្គម Online ដែលកំពុងមានឥទ្ធិពល។
ទោះជាយ៉ាងណាក៏ដោយ, គម្រោងផ្លូវទឹកនឹងកំពង់ផែរបស់វៀតណាមនេះ គឺស្ថិតនៅកៀកនឹងដែនសមុទ្ររបស់កម្ពុជា ដោយមានចម្ងាយមិនដល់ ១០គម នោះទេ ដែលធ្វើឲ្យមានការលើកឡើងពីកង្វល់មួយចំនួន។
លោកបណ្ឌិត ជ័យ តិច អ្នកតាមដានភូមិសាស្ត្រនយោបាយ បានលើកឡើងនូវក្ដីបារម្ភបី ទីមួយគឺការប្រកួតប្រជែងផ្នែកភស្តុភារកម្ម, ទីពីរគឺកម្ពុជាអាចបាត់បង់ដែនអធិបតេយ្យលើផ្ទៃសមុទ្រ ខណៈមិនទាន់មានការបែងចែក និងខណ្ឌសីមាព្រំដែនសមុទ្ររវាងប្រទេសទាំងពីនៅឡើយ។ ចំណែកទី៣នោះ គឺផ្នែកណាមួយនៃកំពង់ផែនេះ អាចក្លាយជាមូលដ្ឋានទ័ពជើងទឹក ដែលគំរាមកំហែងដល់សន្តិសុខជាតិកម្ពុជា។
ពាក់ព័ន្ធនឹងការប្រកួតប្រជែងផ្នែកភស្តុភារកម្ម លោកបណ្ឌិតជ័យ តិចថា គម្រោងផ្លូវ និងកំពុងផែនេះ គឺនៅចំពីមុខច្រកចេញនៃគម្រោងផ្លូវទឹករបស់កម្ពុជា គឺព្រែកជីកហ្វូណនតេជោ ដែលវានឹងរំខានដល់នាវាចរណ៍។ ហើយកំពុងផែនេះ និងក្លាយជាកន្លែងប្រកួតប្រជែងដ៏ធំរបស់កំពង់ផែពហុបំណងកំពត និងកំពង់ផែរាមព្រះសីហនុ។
ចំណែកលោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា បានលើកឡើងថា គម្រោងកំពង់ផែ និងផ្លូវនេះ គឺស្ថិតក្នុងអធិបតេយ្យវៀតណាម កម្ពុជាមិនមានសិទ្ធិលូកដៃលើការអភិវឌ្ឍរបស់រដ្ឋវៀតណាមនោះទេ។ ដូចគ្នាដែរ រៀតណាម ឬប្រទេសដ៏ទៃទៀតក៏គ្មានសិទ្ធិលូកដៃជ្រៀតជ្រែកលើគម្រោងការអភិវឌ្ឍន៍របស់កម្ពុជាដែរ។ លោកបណ្ឌិតថា ប្រជាពលរដ្ឋ អ្នកសិក្សាស្រាវជ្រាវ បញ្ញាវន្ត អ្នកនយោបាយកម្ពុជា គួរតែបង្វែរក្ដីបារម្ភទៅជាការរួបរួមគ្នាជាធ្លុងមួយ និងខិតខំចូលរួមចំណែកក្នុងការអភិវឌ្ឍជាតិឲ្យរីកចម្រើន ចេញផុតពីសម្ពាធរបស់រដ្ឋជិតខាង។ ជាពិសេស ជំរុញវិស័យភស្តុភារកម្ម ដែលកំពុងដើរតួនាទីយ៉ាងសំខាន់ក្នុងការអភិវឌ្ឍន៍សេដ្ឋកិច្ចជាតិ តាមរយៈបង្កើតឲ្យមានការដឹកជញ្ជូនជម្រុះទាំងផ្លូវថ្នល់ ផ្លូវដែក និងផ្លូវទឹក។
លោកបណ្ឌិត គិន ភា និង លោកបណ្ឌិតជ័យ តិច លើកឡើងស្របគ្នាថា ជាជាងការអង្គុយវិភាគ តាមការចាក់រុកលើបណ្ដាញសង្គម ហើយបារម្ភហួសហេតុ, ពលរដ្ឋ និងរាជរដ្ឋាភិបាល ត្រូវរិះរកវិធីសាស្ត្រពង្រឹងខ្លួនឯងទាំងវិស័យសេដ្ឋកិច្ច សង្គម និងវិស័យការពារជាតិ។
សូមជម្រាបថា កាលពីអំឡុងដើមខែមិថុនាឆ្នាំ ២០២៥ រដ្ឋវៀតណាមបានបើកការដ្ឋានសាងសង់ផ្លូវប្រវែង ១.៨ គម. និងស្ពានប្រវែងជាង ២៤០ កាត់សមុទ្រទៅកាន់កំពង់ផែកោះ ឫស្សី ដែលវៀតណាមហៅថាកោះហាទៀង ដោយគ្រោងចំណាយថវិកាចំនួន ៤៨ លានដុល្លារសហរដ្ឋអាមេរិក គ្រោងនឹងបញ្ចប់ការសាងសង់នៅឆ្នាំ ២០២៧។ នេះជាដំណក់កាលទី១ នៃគម្រោងកំពង់ផែពហុបំណងកោះឫស្សី ដែលបច្ចុប្បន្នស្ថិតក្រោមការគ្រប់គ្រងរបស់វៀតណាម៕
អត្ថបទ៖ ឈិន ធារ៉ាត់
