ភ្នំពេញ៖ អ្នកគាំទ្រប្រមាណជិត២០០នាក់ តំណាងគ្រួសារ៥៩៤គ្រួសារ នៅថ្ងៃទី០១ខែធ្នូឆ្នាំ២០២៥ បាននាំគ្នាមកតវ៉ានៅមុខសាលាដំបូងរាជធានីភ្នំពេញ ដេីម្បីស្នើសុំកុំតុលាការចេញដីកាចាប់ខ្លួនអតីតឧកញ៉ា ហ៉ី គីមហុង ម្ចាស់ក្រុមហ៊ុន ពិភពដីមាស និងបង្កកទ្រព្យសម្បត្តិ។
ប្រជាពលរដ្ឋជាច្រើននាក់បានតវ៉ានៅមុខសាលាដំបូងរាជធានីភ្នំពេញ បានមួយសន្ទុះ ក៏មានខាងតុលាការ ចុះមកអញ្ជើញអ្នកតំណាង១៥នាក់ ចូលទៅជជែកពិភាក្សាគ្នានៅក្នុងសាលាដំបូងរាជធានីភ្នំពេញ ក្រោយពីជជែកគ្នាចប់ ខាងសាលាដំបូងបានទទួលយកសំណើរបស់តំណាងចំនួន១៥នាក់ ដែលមានចំណុចសំខាន់១. ស្នេីសុំតុលាការកុំចេញដីកាចាប់ខ្លួនអតីតឧកញ៉ា ហ៉ី គីមហុង ម្ចាស់ក្រុមហ៊ុន ពិភពដីមាស ២.ស្នើសុំតុលាការកុំបង្កកទ្រព្យសម្បត្តិរបស់ក្រុមហ៊ុន ពិភពដីមាស ៣.ស្នើសុំឲ្យតុលាការអនុវត្តនូវអ្វីដែលបងប្អូនស្នើសុំទុកពេល៣៦ខែ ស្មើនឹង៣ឆ្នាំ ឲ្យក្រុមហ៊ុនពិភពដីមាស ដើម្បីឲ្យក្រុមហ៊ុនមានពេលវេលាដោះស្រាយជូនប្រជាពលរដ្ឋ ។ពេលអ្នកតំណាងចេញពីសាលាដំបូង ហើយបាននិយាយប្រាប់រឿងជជែកគ្នាជាមួយខាងតុលាការប្រាប់បងប្អូនប្រជាពលរដ្ឋរួច ពួកគាត់សប្បាយចិត្តនឹងឯកភាពតាមអ្នកតំណាង ហើយពួកគាត់បឋននាំគ្នាត្រឡប់ទៅផ្ទះវិញ។
កម្លាំងស្នងការដ្ឋាននគរបាលរាជធានីភ្នំពេញ បានចាប់ខ្លួនឧកញ៉ា ហ៉ី គីមហុង ម្ចាស់ក្រុមហ៊ុនពិភពដីមាស និងក្រុមអង្គរក្សសរុប១៤នាក់ ពាក់ព័ន្ធករណីបោកប្រាស់ប្រជាពលរដ្ឋធ្វេីឡេីងកាលពីរសៀលថ្ងៃទី៧ ខែសីហា ឆ្នាំ២០២៣ នៅស្នាក់ការក្រុមហ៊ុនពិភពដីមាស ស្ថិតក្នុងភូមិត្រពាំងថ្លាន់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ តាមដីកា ពីបទឆបោកមានស្ថានទម្ងន់ទោស ការញុះញង់ឲ្យប្រព្រឹត្តប្រឆាំងនិងអ្នករាជការសាធារណៈ និងការសម្អាតប្រាក់ ។ ក្រោយពីឃុំខ្លួនបានប៉ុន្មានខែ ជនត្រូវចោទត្រូវបានតុលាការសម្រេចឱ្យនៅក្រៅឃុំបណ្ដោះអាសន្ន៕
