ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានបង្ហាញនូវទស្សនៈសុទិដ្ឋិនិយមនៅថ្ងៃច័ន្ទ ដោយបានលើកឡើងថា ផែនការសន្តិភាពរបស់រដ្ឋបាលលោក ត្រាំ ដែលត្រូវបានពិភាក្សាអស់រយៈពេលជាយូរមកហើយ អាចនឹងកំពុងដើរទៅរកទិសដៅរបស់ទីក្រុងកៀវហើយ។
យោងតាមទីភ្នាក់ងារសារព័ត៌មាន Associated Press បានឱ្យដឹងថា លោក Zelenskyy បានថ្លែងថា “វា មើលទៅល្អប្រសើរ” បន្ទាប់ពីបានចូលរួមកិច្ចពិភាក្សានៅទីក្រុងប៉ារីសក្នុងគោលបំណងកែសម្រួលសំណើ ដែលអាចកំណត់ថា សង្រ្គាមដ៏ធំបំផុតនៅអឺរ៉ុបចាប់តាំងពីសង្គ្រាមលោកលើកទី២ នឹងបញ្ចប់ដោយរបៀបណា។
លោក Zelenskyy បានផ្តល់សេចក្តីសង្ខេបដល់ក្រុមអ្នកសារព័ត៌មានបន្ទាប់ពីបានជួបជាមួយប្រធានាធិបតីបារាំង លោក អ៊ែមម៉ានុយអែល ម៉ាក្រុង ដែលជាផ្នែកមួយនៃកិច្ចខិតខំប្រឹងប្រែងផ្នែកការទូតចុងក្រោយ ខណៈដែលទីក្រុងកៀវ ទីក្រុងវ៉ាស៊ីនតោន និងដៃគូអឺរ៉ុបនានា កំពុងព្យាយាមកែលម្អក្របខ័ណ្ឌសន្តិភាពដែលត្រូវបានព្រាងឡើងដំបូងរវាងសហរដ្ឋអាមេរិក និងរុស្ស៊ី។
សេចក្តីអត្ថាធិប្បាយរបស់លោក Zelenskyy នេះបានកើតឡើងចំពេលដែលវិមានក្រឹមឡាំងបានបញ្ជាក់ថា ប្រធានាធិបតី វ្ល៉ាឌីមៀរ ពូទីន (Vladimir Putin) នឹងជួបជាមួយបេសកជនអាមេរិក លោក ស្ទីវ វីតកូហ្វ (Steve Witkoff) នៅថ្ងៃអង្គារនេះ។ លោក វីតកូហ្វ គឺជាឥស្សរជនដែលតួនាទីរបស់លោកត្រូវបានត្រួតពិនិត្យយ៉ាងយកចិត្តទុកដាក់កាលពីសប្តាហ៍មុន បន្ទាប់ពីមានរបាយការណ៍ថា លោកបានបង្ហាត់បង្រៀនទីប្រឹក្សាជាន់ខ្ពស់របស់លោក ពូទីន អំពីរបៀបដើម្បីផ្សព្វផ្សាយផែនការសន្តិភាពទៅកាន់ប្រធានាធិបតីអាមេរិក លោក ដូណាល់ ត្រាំ។
ដំណើរទស្សនកិច្ចរបស់លោក Zelenskyy នៅទីក្រុងប៉ារីសបានកើតឡើងបន្ទាប់ពីកិច្ចប្រជុំកាលពីថ្ងៃអាទិត្យរវាងមន្ត្រីអ៊ុយក្រែន និងអាមេរិក ដែលរដ្ឋមន្ត្រីការបរទេស លោក ម៉ាកូ រ៉ូប៊ីអូ បានពណ៌នាថា ជាកិច្ចប្រជុំដែលផ្តល់ផលច្រើន។ ទីក្រុងវ៉ាស៊ីនតោន និងទីក្រុងកៀវ បាននិងកំពុងធ្វើការដើម្បី កែសម្រួលផែនការដែលបង្កើតដោយសហរដ្ឋអាមេរិក ដែលផែនការនេះត្រូវបានរិះគន់ថា មានលក្ខណៈលម្អៀងខ្លាំងពេកទៅរកការទាមទាររបស់រុស្ស៊ី រួមទាំងការដាក់កំហិតលើកងទ័ពអ៊ុយក្រែន និងការធ្វើសម្បទានទាក់ទងនឹងសមាជិកភាពណាតូ។
វិមានក្រឹមឡាំងបានអះអាងថា កងកម្លាំងរបស់ពួកគេបានកាន់កាប់ទីក្រុង ប៉ូក្រូវស្គ៍ ភាគខាងកើត ដែលជាចំណុចសំខាន់នៅក្នុងខ្សែក្រវ៉ាត់ការពារនៃតំបន់ដូណេតស្គ៍។ ប៉ុន្តែប្រធានាធិបតីអ៊ុយក្រែនបាន ច្រានចោល ការអះអាងនោះ។ លោកក៏បានច្រានចោលការអះអាងពីមុនរបស់រុស្ស៊ីអំពីការកាន់កាប់ទីក្រុងគូព្យ៉ានស្គ៍ (Kupiansk) ដោយនិយាយថា កងទ័ពអ៊ុយក្រែនបានបោសសម្អាតកងកម្លាំងរុស្ស៊ីស្ទើរតែទាំងអស់នៅទីនោះ។
លោក ម៉ាក្រុង បានពណ៌នាអំពីការចរចាបច្ចុប្បន្នថា ជាដំណាក់កាលត្រៀម ប៉ុន្តែបាននិយាយថា កិច្ចការទូតបានឈានដល់ពេលមួយដែលអាចជា ចំណុចរបត់ សម្រាប់សន្តិសុខរបស់អ៊ុយក្រែន និងអឺរ៉ុប។ លោកបានសង្កត់ធ្ងន់ថា កិច្ចព្រមព្រៀងចុងក្រោយណាមួយត្រូវតែរួមបញ្ចូលដៃគូអឺរ៉ុប និងគាំទ្រដល់ ការធានាសន្តិសុខដ៏រឹងមាំ សម្រាប់អ៊ុយក្រែនក្នុងករណីមានបទឈប់បាញ់។
ចំពេលមានការជំរុញថ្មីសម្រាប់សន្តិភាព ការប្រយុទ្ធនៅតែបន្តពាសពេញអ៊ុយក្រែន។ ការវាយប្រហារដោយកាំជ្រួចរបស់រុស្ស៊ីលើទីក្រុង ឌីណីប្រូ បានសម្លាប់មនុស្ស ៤ នាក់ និងធ្វើឱ្យមនុស្សរាប់សិបនាក់រងរបួស។ កងទ័ពអាកាសអ៊ុយក្រែនបានរាយការណ៍ថា រុស្ស៊ីបានបាញ់យន្តហោះដ្រូន ៨៩ គ្រឿងនៅពេញមួយយប់ ហើយភាគច្រើនត្រូវបានស្ទាក់ចាប់បាន។ វិមានក្រឹមឡាំងក៏បានចោទប្រកាន់អ៊ុយក្រែនពីបទវាយប្រហារហេដ្ឋារចនាសម្ព័ន្ធប្រេងរបស់រុស្ស៊ី រួមទាំងស្ថានីយសំខាន់មួយនៅក្បែរ ណូវ៉ូរ៉ូស៊ីអ៊ីក ផងដែរ៕
