ក្លិបបាល់ទាត់ព្រះខ័នរាជស្វារៀង បានបញ្ចប់ការប្រកួតទី៣ របស់ខ្លួនក្នុងពានរង្វាន់ក្លិបក្នុងតំបន់អាស៊ាន ASEAN Club Championship (Shopee Cup) 2024/25 វគ្គចែកពូល កាលពីថ្ងៃទី៤ ខែធ្នូ ឆ្នាំ២០២៥ ដោយបញ្ចប់ទៅបានត្រឹមស្មើជាមួយ Johor Darul Ta’zim FC ក្នុងលទ្ធផល ២-២ ក្នុងពហុកីឡដ្ឋានជាតិមរតតេជោ។
ក្រោយក្រសែភ្នែកអ្នកគាំទ្រ ១ ៦៧៨២នាក់ ព្រះខ័នរាជស្វារៀង ពិតជាធ្វើបានល្អ ដោយដាក់សម្ពាធលើក្រុមភ្ញៀវ នៅតង់ទី១ ដោយបើកការនាំមុខបាន ១គ្រាប់នៅនាទីទី៣០ រកបានដោយកីឡាករសញ្ជាតិប្រេស៊ីល Cristian Roque រំលង់បាន ៦នាទី ពោលគឺនៅនាទីទី៣៦ ញាន សុស៊ីដាន់ បានបន្ថែម១គ្រាប់ទៀត ធ្វើអោយសម្លេងអ្នកគាំទ្រកាន់តែកកក្រើក ក្នុងពហុកីឡដ្ឋានជាតិមរតតេជោ។
លុះដល់វគ្គទី២ ក្រុមភ្ញៀវ Johor Darul Ta’zim FC បានកែប្រែស្ថានការណ៍ដោយដាក់សម្ពាធលើកព្រះខ័នរាជស្វារៀង វិញម្ដង ធ្វើអោយការប្រកួតការ់តែជក់ចិត្តរហូតដល់ពេញ៩០នាទីនៅរក្សាលទ្ធផល ២-០ តែអ្វីៗត្រូវបានប្រែប្រួលទៅវិញ ដោយនៅម៉ោងបន្ថែម ៨នាទី ក្រុមភ្ញៀវ Johor បានវាយបកវិញ ១ក្រាប់នៅនាទីទី៩០+២ ដោយកីឡាករ Lowry កៀកនឹងបញ្ចប់ទៅ Johor បានបន្ថែម១គ្រាប់ទៀត តាមស្មើនៅនាទីទី៩០+៦ ចប់ការប្រកួតក្រុមទាំង២ បានត្រឹមចែកគ្នាម្នាក់១ពិន្ទុ។
ក្រោយស្មើ Johor Darul Ta’zim FC លោក Matthew Mcconkey គ្រូបង្វឹក ព្រះខ័នរាជស្វាយរៀង ថ្លែងថា៖ ខ្ញុំមានមោទនភាពណាស់ចំពោះកូនក្រុមសម្រាប់ការប្រកួតថ្ងៃនេះ ដោយពួកគេធ្វើបានល្អ ហើយយើងពិតជាសិក្តសមនឹងទទួលបានជ័យជម្នះ។
គ្រូបង្វឹក សញ្ជាតិអៀរឡង់ខាងជើង រូបនេះបានបន្តថា ក្រោយ Odawara ប្តូរចេញលោកមើលឃើញថាក្រុម Johor បានដាក់សម្ពាធខ្លាំង បូករួមកីឡាករប្តូរចូលមានកម្ពស់ទាប ធ្វើឲ្យមានផលប៉ះពាល់បន្តិចបន្តួចប៉ុណ្ណោះ ប៉ុន្តែជារួមកីឡាករយើងទាំងអស់សុទ្ធតែមានគុណភាពល្អ។
លោកបន្ថែមថា ទោះបីស្មើក៏ដោយប៉ុន្តែលោកនៅតែពេញចិត្តចំពោះទម្រង់លេងថ្ងៃនេះរបស់កូនក្រុមខ្លួន ហើយបង្ហាញថាបាល់ទាត់កម្ពុជា មិនងាយស្រួលយកឈ្នះដូចមុនឡើយ។
ដោយលែកសម្រាប់គ្រូបង្វឹក Johor Darul Ta’zim FC ថ្លែងក្រោយស្មើ ព្រះខ័នរាជស្វាយរៀង ២-២ ថា តង់ទី១យើងធ្វើមិនបានល្អឡើយរហូតរបូត២គ្រាប់ ប៉ុន្តែតង់ទី២ យើងបានសិក្សាដើម្បីកែប្រែ រហូតតាមស្មើ។
គ្រូបង្វឹក បន្ថែមថា យ៉ាងណាមិញលោកមិនអាចទទួលយកលទ្ធផល និងទម្រង់លេងថ្ងៃនេះបានឡើយ គឺមិនដូចអ្វីដែលលោកចង់បាន។ ចំពោះក្រុមស្វាយរៀង ថ្ងៃនេះពួកគេលេងបានល្អបូករួមជាមួយកីឡាករល្អ កម្លាំង និងបច្ចេកទេសល្អ។
ជាចុងក្រោយលោក នៅតែសង្ឃឹមថាក្រុមលោកនឹងអាចឡើងទៅវគ្គបន្តបាន ក្រោយប្រកួតមិនទាន់ចាញ់សោះនៅពាន Shopee Cup។
ព្រះខ័នរាជស្វាយរៀង ឆ្លងកាត់ ៣ប្រកួតរួមមកនៅក្នុងពូល B ឈ្នះ ១ ស្មើ១ និងចាញ់ ១ មាន ៤ពិន្ទុ ឈរនៅលេខ៣ រួមមាន៖
សម្រាប់លទ្ធផល និងកម្មវិធីប្រកួតរបស់ព្រះខ័នរាជស្វាយរៀង នៅក្នុងពូល B កន្លងមករួមមាន៖
- ថ្ងៃទី២១ សីហា ២០២៥៖ Shan United FC ០-៣ ព្រះខ័នរាជស្វាយរៀង
- ថ្ងៃទី២៥ កញ្ញា ២០២៥៖ Nam Dinh FC ២-០ ព្រះខ័នរាជស្វាយរៀង
- ថ្ងៃទី៤ ធ្នូ ២០២៥៖ ព្រះខ័នរាជស្វាយរៀង ២-២ Johor Darul Ta’zim FC
- ថ្ងៃទី២៩ មករា ២០២៥៖ ព្រះខ័នរាជស្វាយរៀង ជួប Bangkok United FC
- ថ្ងៃទី៥ កុម្ភ: ២០២៥៖ Lion City Sailors FC ព្រះខ័នរាជស្វាយរៀង៕
