វ៉ាស៊ីនតោន៖ យោធាសហរដ្ឋអាមេរិកកាលពីថ្ងៃព្រហស្បតិ៍ សប្ដាហ៍នេះ (ម៉ោងក្នុងសស្រុក) បានធ្វើការវាយប្រហារថ្មីមួយទៀតលើទូកដែលសង្ស័យថាមានការជួញដូរគ្រឿងញៀនដែលដំណើរការដោយអ្វីដែលរដ្ឋបាល លោក ត្រាំ បានចាត់ថ្នាក់ថាជាអង្គការភេរវករដែលបានកំណត់។ នេះបើយោងតាមការចេញផ្សាយដោយសារព័ត៌មាន Fox Baltimore នាថ្ងៃទី៤ ខែធ្នូ ឆ្នាំ២០២៥។
ជនសង្ស័យជួញដូរគ្រឿងញៀនចំនួន ៤នាក់ត្រូវបានសម្លាប់ក្នុងការវាយប្រហារនេះដែលជាការវាយប្រហារលើទូកសង្ស័យជួញដូរគ្រឿងញៀនលើកទី២២ ក្រោមការដឹកនាំរបស់លោក Pete Hegseth រដ្ឋមន្រ្តីក្រសួងសង្គ្រាម ចាប់តាំងពីដើមខែកញ្ញា មក ដោយអ្នកស្លាប់សរុបពីការវាយប្រហារតាមសមុទ្ររបស់អាមេរិក កើនឡើងដល់ ៨៦នាក់។
ដំណឹងនេះកើតឡើង បន្ទាប់ពីលោកប្រធានាធិបតី ដូណាល់ ត្រាំ បាននិយាយថា សហរដ្ឋអាមេរិក នឹងពន្លឿនការវាយប្រហារយោធារបស់ខ្លួនលើទូកដឹកគ្រឿងញៀន ដែលត្រូវបានចោទប្រកាន់ថាជារបស់ប្រទេសវ៉េណេស៊ុយអេឡា ហើយប្រធានាធិបតីនៃប្រទេសនេះ កំពុងប្រើប្រាស់ប្រាក់ចំណេញពីគ្រឿងញៀន ដើម្បីរក្សាអំណាចរបស់ខ្លួន។
លោក ត្រាំ ក៏បានថ្កោលទោសអតីតប្រធានាធិបតី ចូ បៃដិន ផងដែរ ដោយនិយាយថា ជនអន្តោប្រវេសន៍ឧក្រិដ្ឋជនខុសច្បាប់មួយចំនួនមកពីប្រទេស វ៉េណេស៊ុយអេឡា បានចូលទឹកដីសហរដ្ឋអាមេរិក អំឡុងពេលកាន់តំណែងរបស់លោក បៃដិន។
លោក ត្រាំ បានបន្ដថា «វេណេស៊ុយអេឡា បញ្ជូនគ្រឿងញៀន និងមនុស្សមកប្រទេសយើង ដែលពួកគេមិនគួរបញ្ជូនមកទេ ដោយអ្នកទាំងនោះជាអ្នកទោស ជាឃាតករ ក្រុមក្មេងទំនើង អ្នកជួញដូរគ្រឿងញៀនកម្រិតខ្ពស់ជាដើម»។
យ៉ាងណាម៉ិញ រដ្ឋមន្រ្តីក្រសួងសង្រ្គាមអាមេរិក កំពុងស្ថិតក្រោមការតាមដានយ៉ាងខ្លាំង ជុំវិញការវាយប្រហារដោយយោធាលើអ្នកជួញដូរគ្រឿងញៀនដែលត្រូវបានចោទប្រកាន់នៅតំបន់ការ៉ាប៊ីន និងតំបន់ប៉ាស៊ីហ្វិកភាគខាងកើត។
យោងតាមមន្ត្រីអាមេរិក ទីក្រុងវ៉ាស៊ីនតោនកំពុងដាក់ពង្រាយទាហានប្រហែល១៥,០០០នាក់ និងនាវាចម្បាំងច្រើនជាង ១២គ្រឿង ទៅកាន់តំបន់ការ៉ាប៊ីនក្បែរប្រទេសវ៉េណេស៊ុយអេឡា ក្រោមប្រតិបត្តិការ «Southern Spear» ក្នុងគោលបំណងកម្ចាត់ក្រុមជួញដូរគ្រឿងញៀន។
ទាក់ទិននឹងបញ្ហានេះ ប្រទេសវ៉េណេស៊ុយអេឡាបានច្រានចោលការចោទប្រកាន់ពីការជួញដូរគ្រឿងញៀនថាជារឿងនយោបាយ ដោយលោកប្រធានាធិបតី នីកូឡាស ម៉ាឌូរ៉ូ អះអាងថា ឥរិយាបថយោធានេះត្រូវបានរៀបចំឡើងដើម្បីបង្កអស្ថិរភាព និងចង់ផ្តួលរំលំរដ្ឋាភិបាលរបស់លោក។
សូមជម្រាបថា លោក ម៉ាឌូរ៉ូ ត្រូវបានចោទប្រកាន់ជាលើកដំបូងនៅក្នុងឆ្នាំ២០២០ ដោយរដ្ឋអាជ្ញាអាមេរិក ដែលថា លោកបានដើរតួនាទីសំខាន់ក្នុងការសមគំនិតរត់ពន្ធកូកាអ៊ីនដ៏ច្រើនសន្ធឹកសន្ធាប់ចូលទៅក្នុងទឹកដីអាមេរិក។
ក្រៅតែពីលោក ម៉ាឌូរ៉ូ នៅមានមន្ត្រីធំៗមួយចំនួនទៀតរបស់វ៉េណេស៊ុយអេឡា ក៏ត្រូវអាមេរិកប្រកាសចាប់ខ្លួនផងដែរ ដូចជា រដ្ឋមន្ត្រីការពារជាតិលោក Vladimir Padrino និងអតីតអនុប្រធានាធិបតី Tareck El Aissami៕
