ភូត្រាចាយ៉ា៖ នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម មានប្រសាសន៍ថា កម្ពុជា និងថៃ បានព្រមព្រៀងគ្នាចូលរួមកិច្ចប្រជុំពិសេសរដ្ឋមន្ត្រីការបរទេសអាស៊ាននៅថ្ងៃទី២២ ខែធ្នូ ខាងមុខនេះ នៅទីក្រុងគូឡាឡាំពួ ដើម្បីចាប់ផ្តើមកិច្ចចរចាទប់ស្កាត់ការកើនឡើងកម្ដៅបន្ថែមទៀតនៅតាមព្រំដែន។ នេះបើយោងតាមការចេញផ្សាយដោយសារព័ត៌មាន Vietnam News នាថ្ងៃព្រហស្បតិ៍ ទី១៨ ខែធ្នូ ឆ្នាំ២០២៥។
លោក អាន់វ៉ា បានបញ្ជាក់ថា គោលបំណងនៃកិច្ចប្រជុំនេះ គឺដើម្បីបញ្ចុះបញ្ចូលប្រទេសថៃ និងកម្ពុជា ឱ្យបញ្ឈប់ការកើនឡើងភាពតានតឹងនៅតាមបណ្ដោយព្រំដែនដែលកំពុងមានជម្លោះ។
លោក បន្ថែមថា «យើងកំពុងអំពាវនាវដល់ពួកគេឱ្យបញ្ឈប់ការវាយលុកនៅជួរមុខនេះជាបន្ទាន់ ហើយប្រសិនបើអាចធ្វើទៅបាន គឺបទឈប់បាញ់ជាបន្ទាន់។
ប្រធានអាស៊ានប្ដូរវេនរូបនេះ បន្ដថា ការសម្រេចចិត្តកោះប្រជុំបានកើតឡើងបន្ទាប់ពីការពិគ្រោះយោបល់ជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ។ លោកថា លោក ដូណាល់ ត្រាំ បានទូរស័ព្ទមកលោក និងសួរនាំពីការវិវត្តន៍ថ្មីៗ ហើយលោកបានប្រាប់លោក ត្រាំ ថា ការបញ្ចុះបញ្ចូលប្រទេសថៃ-កម្ពុជា ឱ្យបញ្ឈប់ការវាយលុក ពិតជាមានសារៈសំខាន់ណាស់។
យ៉ាងណាម៉ិញ ពេលនេះប្រទេសថៃ និងប្រទេសកម្ពុជា បានយល់ព្រមជាគោលការណ៍លើការដាក់ពង្រាយក្រុមអ្នកសង្កេតការណ៍អាស៊ាន (AOT) ដោយបន្ថែមថា រដ្ឋមន្រ្តីការពារជាតិម៉ាឡេស៊ី និងចាកចេញទៅកាន់តំបន់ព្រំដែននៅរយៈពេលប៉ុន្មានថ្ងៃខាងមុខនេះ ដើម្បីបន្ដការចូលរួមពិភាក្សាទាំងកម្រិតការទូត និងកម្រិតយោធា។
លោក អាន់វ៉ា បញ្ជាក់ថា ការយល់ព្រមចូលរួមកិច្ចប្រជុំពីភាគីទាំងសងខាង គឺជាជំហានវិជ្ជមានមួយដល់ការសម្របសម្រួលក្នុងតួនាទីរបស់អាស៊ាន។ លោកនៅតែមានសុទិដ្ឋិនិយមថា កិច្ចប្រជុំថ្ងៃទី២២ ខែធ្នូ ខាងមុខនេះ អាចជួយធានាឱ្យមានការបញ្ឈប់អរិភាពជាជំហានដំបូង និងបើកផ្លូវសម្រាប់កិច្ចពិភាក្សាឲ្យបានទូលំទូលាយលើការដោះស្រាយរយៈពេលវែង៕
