នៅព្រឹកថ្ងៃទី១៣ មករា នេះ សហព័ន្ធកីឡាបាល់ទះកម្ពុជា បានប្រកាសចេញតម្លៃសំបុត្រសម្រាប់កម្មវិធីប្រកួតកីឡាបាល់ទះ «WURKZ បាល់ទះសប្បុរសធម៌ » ដើម្បីប្រមូលថវិកា ជួយដល់ជនភៀសសឹកកម្ពុជា ដែលកំពុងត្រូវការ។
តាមរយ:ការបញ្ជាក់របស់សហព័ន្ធកីឡាបាល់ទះកម្ពុជា សំបុត្រនឹងមានលក់នៅថ្ងៃទី១៧ ខែមករា វេលាម៉ោង ៨:០០នាទីព្រឹកតទៅ មុខពហុកីឡដ្ឋានជាតិ(សាលប្រកួត)។ រាល់សំបុត្រចូលទស្សនាមួយសន្លឹកអាចដូរយកភេសជ្ជ: WURKZ មួយកំប៉ុង។
ចំពោះតម្លៃសំបត្រ មានដូចខាងក្រោម៖
- តំបន់អង្គុយផ្នែកខាងលើ តម្លៃ ៥០០០រៀល
- តំបន់អង្គុយផ្នែកខាងក្រោម តម្លៃ ១០០០០រៀល
ដោយឡែកសម្រាប់ទឹកប្រាក់ដែលអ្នកគាំទ្របានបរិច្ចាគទាំងអស់ នឹងត្រូវយកទៅជួយឧបត្ថម្ភបងប្អូនជនភៀសសឹក ទាំងស្រុងដែលពុំទាន់ អាចវិលត្រលប់ទៅផ្ទះវិញបានក្នុងការជួយសម្របសម្រួល ក្នុងការរស់នៅរបស់ពួកគាត់ ដោយរៀប ចំសាងសង់ បន្ទប់ទឹក ទឹកស្អាត និងអនាម័យផ្សេងៗ។
គួរបញ្ជាក់ថា កម្មវិធីប្រកួតកីឡាបាល់ទះ «WURKZ បាល់ទះសប្បុរសធម៌ » មានក្លិបបាល់ទះធំៗ ចំនួនចូលរួម រួមមាន៖ សមាគមកីឡាបាល់ទះវិសាខា សមាគមកីឡាបាល់ទះក្រសួងមហាផ្ទៃ ក្លិបបាល់ទះបញ្ជាការដ្ឋានអង្គរក្ស និងក្លិបបាល់ទះស្នងការរាជធានីភ្នំពេញ។ ការប្រកួតរៀចចំឡើង ១ថ្ងៃប៉ុណ្ណោះ នៅថ្ងៃទី១៧ ខែមករា ឆ្នាំ២០២៦ វេលាម៉ោង ៨:៣០នាទីព្រឹកតទៅ នៅទីលានកីឡាបាល់ទះក្នុងវិមាន នៃពហុកីឡដ្ឋានជាតិអូឡាំពិក៕
