សហព័ន្ធកីឡាបាល់ទះកម្ពុជា នារសៀលថ្ងៃទី១៤ មករា បានរៀបចមំពិធីចាប់ឆ្នោត នៃការប្រកួតកីឡាបាល់ទះជ្រើសរើសជើងឯកថ្នាក់ជាតិ និងដណ្ដើមពានរង្វាន់សម្តេចក្រឡាហោម ស ខេង រដូវកាលទី៤ ដែលមានការចូលរួមពីសមាគម-ក្លិបនិងសាធារណជនជាច្រើន នៅផ្សារទំនើប ជីប ម៉ុង ២៧១ មេហ្គាម៉ល។
លោកបណ្ឌិត អាំង សិរីពិសិដ្ឋ អនុប្រធា និងជាអគ្គលេខាធិការសហព័ន្ធកីឡាបាល់ទះកម្ពុជា បានមានប្រសាសន៍ថា៖ អ្វីដែលកាន់តែពិសេសសម្រាប់រដូវកាលថ្មីពានរង្វាន់សម្តេចក្រឡាហោម ស ខេង គឺមានទាំងវិញ្ញាសារនារី ស្របពេលក្រុមបុរសមានរហូតដល់ ៣២ក្រុម ក្រុមនារីមាន ៨ក្រុម។
លោកបណ្ឌិត បន្ថែមថា៖ ចំពោះលក្ខន្តិកៈនៃការប្រកួតជ្រើសរើសជើងឯកថ្នាក់ជាតិ និងដណ្ដើមពានរង្វាន់សម្តេចក្រឡាហោម ស ខេង រដូវកាលទី៤ គឺគ្រប់បណ្ដាលក្លិបទាំង ២៥រាជធានី ៣២ក្លិបដែលបានចូលរួម អាចមានសិទ្ធប្រើប្រាស់អត្តពលិកជម្រើសជាតិបានចំនួន ២នាក់នៅលើទីលាន និងកីឡាករបរទេសបានចំនួន ១នាក់ប៉ុណ្ណោះ។
សម្រាប់ប្រាក់ឧបត្ថម្ភ ប្រាក់រង្វាន់ និងពានរង្វាន់ឯកត្តជន បុរសមានដូចខាងក្រោម៖
- លេខ១ ទទួលបាន ពានរង្វាន់ ១ មេដាយមាស និងថវិកា ៥០,០០០,០០០(ហាសិបលាន) រៀល
- លេខ២ ទទួលបាន មេដាយប្រាក់ និងថវិកា ២០,០០០,០០០(ម្ភៃលាន) រៀល
- លេខ៣ ទទួលបាន មេដាយសំរិទ្ធ និងថវិកា ១២,០០០,០០០(ដប់ពីរលាន) រៀល
- លេខ៤ ទទួលបាន ថវិកា ៨,០០០,០០០(ប្រាំបីលាន) រៀល
**ពានឯកត្តជន ចំនួន ៨ពាន ក្នុងមួយពានថវិកាចំនួន ១,០០០,០០០ (មួយលាន)រៀល សរុប ៨,០០០,០០០ (ប្រាំលាន)រៀល។
សម្រាប់ក្រុមកីឡាការិនី ទទួលបានជ័យលាភី៖
- លេខ១ ទទួលបាន ពានរង្វាន់ ០១ មេដាយមាស និងថវិកា ១៥,០០០,០០០ (ដប់ប្រាំលាន) រៀល
- លេខ២ ទទួលបាន មេដាយប្រាក់ និងថវិកា ៨,០០០,០០០(ប្រាំបីលាន) រៀល
- លេខ៣ ទទួលបាន មេដាយសំរិទ្ធ និងថវិកា ៤,០០០,០០០(បួនលាន) រៀល
- លេខ៤ ទទួលបានថវិកា ២,០០០,០០០(ពីរលាន) រៀល
ដូចនេះ សម្រាប់ប្រាក់រង្វាន់សរុប នៃការប្រកួតកីឡាបាល់ទះជ្រើសរើសជើងឯកថ្នាក់ជាតិ និងដណ្ដើមពានរង្វាន់សម្តេចក្រឡាហោម ស ខេង រដូវកាលទី៤ មានចំនួន ១២៧,០០០,០០០ (មួយរយម្ភៃប្រាំពីរលាន)។
លទ្ធផលចាប់ពូលក្រុមទាំង ៣២ រួចរាល់ សម្រាប់ផ្នែកបុរស៖
លទ្ធផលចាប់ពូលក្រុមទាំង ៨ រួចរាល់ សម្រាប់ផ្នែកនារី៖
ការប្រកួតត្រូវបានកំណត់កាលបរិច្ឆេទប្រកួតចាប់ពីថ្ងៃទី៧ ខែកុម្ភៈ រហូតដល់ថ្ងៃទី១ ខែមីនា ឆ្នាំ២០២៦ នៅទីលានកីឡាបាល់ទះក្នុងវិមាន នៃពហុកីឡដ្ឋានជាតិអូឡាំពិក ដោយប្រកួតលើវិញ្ញាសាទាំងផ្នែកបុរស និងនារី។
សូមរំលឹកថា សម្រាប់ពានរង្វាន់បាល់ទះសម្តេចក្រឡាហោម ស ខេង លើកទី៣ ឆ្នាំ២០២៤ កន្លងទៅ មានចំនួន ៣១សមាគម-ក្លិប មកពី ២៥រាជធានី-ខេត្ត ទូទាំងប្រទេសកម្ពុជា ស្របពេលម្ចាស់ជើងឯក បានទៅលើក្លិបកីឡាបាល់ទះស្នងការដ្ឋាននគរបាលខេត្តស្វាយរៀង ក្រោយយកឈ្នះសមាគមកីឡាបាល់ទះក្រសួងមហាផ្ទៃ ក្នុងលទ្ធផល ៣-២ ក្នុងវិមាន នៃពហុកីឡដ្ឋានជាតិអូឡាំពិក។
គួរបញ្ជាក់ថា ការប្រកួតកីឡាបាល់ទះដណ្ដើមពានរង្វាន់សម្ដេចក្រឡាហោម ស ខេង ឆ្នាំ២០២៤ គឺជាការប្រកួតដណ្ដើមពានកីឡាបាល់ទះដ៏ធំ ដែលកន្លងទៅត្រូវបានរៀបចំ ៣ដង រួចមកហើយ ដោយ រដូរកាលទី១ ឆ្នាំ២០២២ ម្ចាស់ជើងឯក គឺសមាគមកីឡាបាល់ទះវិសាខា B និង រដូលកាលទី២ ឆ្នាំ២០២៣ ម្ចាស់ជើងឯក គឺសមគមកីឡាបាល់ទះក្រសួងមហាផ្ទៃ B និងចុងក្រោយរដូវកាលទី៣ ឆ្នាំ២០២៤ ម្ចាស់ជើងឯក គឺស្នងការដ្ឋាននគរបាលខេត្តស្វាយរៀង៕
