កីឡាករ វឿន វាសនា របស់កម្ពុជា ជាប់ឈ្មោះជាកីឡាករមានពិន្ទុច្រើន និងស្មាត់វាយផ្ដាច់បានពិន្ទុច្រើនជាងគេ នៃការប្រកួតលីគបាល់ទះ តៃវ៉ាន់ Enterprise Volleyball League រដូវកាលឆ្នាំ២០២៥-២៦
គិតត្រឹមថ្ងៃទី១១ ខែមករា ឆ្នាំ២០២៥ កីឡាករ វឿន វាសនា បានបង្ហាញខ្លួន និងជួយក្រុមបាល់ទះ Win Streak ឈ្នះ២៦ប្រកួត និងចាញ់២ប្រកួត ក្នុងចំណោមការប្រកួតសរុប ២៨ប្រកួត ។
ស្របពេលស្មាត់ធំរូបនេះ រកបានពិន្ទុសរុបចំនួន ៥៧០ ពិន្ទុ ក្នុងនាមជាកីឡាករវាយផ្ដាច់ ច្រើនជាងគេនៅដើមឆ្នាំ២០២៥ នេះ ខណៈការប្រកួតថ្ងៃទី១១ ខែមករា ឆ្នាំ២០២៥ កន្លងទៅ វឿន វាសនា រកបាន៣១ពិន្ទុ ច្រើនជាងគេប្រចាំសប្តាហ៍ ។
សូមជម្រាបថា កីឡាករ វឿន វាសនា បានចេញទៅប្រកបអាជីពនៅតៃវ៉ាន់ នៅឆ្នាំ២០២៣ ដោយបានជួយក្រុមឈ្នះជើងឯក២រដូវកាលជាប់ៗគ្នា ស្របពេលឆ្នាំ២០២៥-២៦ វឿន វាសនា បានបន្តជួយ Win Streak ឈរកំពូលតារាង មាន៧៣ពិន្ទុ គិតត្រឹមសប្តាហ៍ទី១៤។
នៅថ្ងៃទី១៧ ខែមករា ឆ្នាំ២០២៦ ខាងមុខ ក្រុមបាល់ទះ Win Streak ត្រៀមប៉ះ Taoyuan Leopards និងប្រកួតទី២សម្រាប់សប្តាហ៍ទី១៥ គឺត្រូវប៉ះ Taipei East Power ថ្ងៃទី១៨ ខែមករា ឆ្នាំ២០២៦ នៃលីគបាល់ទះ តៃវ៉ាន់ Enterprise Volleyball League រដូវកាលឆ្នាំ២០២៥-២៦ ៕
