រាជធានីភ្នំពេញ៖ នាព្រឹកថ្ងៃទី១៤ ខែមករា ឆ្នាំ២០២៦ នៅទីស្តីការក្រសួងមហាផ្ទៃ បានរៀបចំកិច្ចប្រជុំត្រួតពិនិត្យលទ្ធផលការងារប្រចាំខែធ្នូ ឆ្នាំ២០២៥ និងលើកទិសដៅអនុវត្តបន្ត របស់ក្រុមការងារចម្រុះសម្រាប់ពង្រឹងការគ្រប់គ្រងមណ្ឌលអប់រំកែប្រែ និងពន្ធនាគាររាជធានី-ខេត្ត។
កិច្ចប្រជុំនេះប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម ឆែម សាវុធ រដ្ឋលេខាធិការក្រសួងមហាផ្ទៃ និងជាប្រធានក្រុមការងារចម្រុះ ព្រមទាំងមានការអញ្ជើញចូលរួមពី ឯកឧត្តម ឧត្តមអគ្គានុរក្សថ្នាក់លេខ១ ឈន សាណាត អគ្គនាយកនៃអគ្គនាយកដ្ឋានពន្ធនាគារ និងសមាជិកក្រុមការងារពាក់ព័ន្ធជាច្រើនរូបទៀត។
ក្រៅពីការត្រួតពិនិត្យលទ្ធផលការងារកន្លងមក កិច្ចប្រជុំក៏បានប្រកាសសមាសភាពក្រុមការងារសម្រាប់ចុះពង្រឹងការគ្រប់គ្រងនៅតាមមណ្ឌលអប់រំកែប្រែទាំង ៤។ ក្នុងឱកាសនោះ ឯកឧត្តម រដ្ឋលេខាធិការ បានដាក់ចេញនូវសេចក្តីណែនាំ និងទិសដៅការងារសំខាន់ៗចំនួន ៤ ចំណុច៖
- រៀបចំផែនការសកម្មភាពឆ្នាំ២០២៦៖ ក្រុមការងារចម្រុះត្រូវរៀបចំផែនការឱ្យបានច្បាស់លាស់ ដើម្បីពង្រឹងការងារនៅតាមមណ្ឌលអប់រំកែប្រែ និងពន្ធនាគាររាជធានី-ខេត្ត។
- ពង្រឹងវិន័យ និងមនសិការវិជ្ជាជីវៈ៖ អគ្គនាយកដ្ឋានពន្ធនាគារ ត្រូវរៀបចំឯកសារ និងលិខិតបទដ្ឋានគតិយុត្តផ្សេងៗ ដើម្បីផ្សព្វផ្សាយណែនាំដល់មន្ត្រីពន្ធនាគារទាំងអស់ អំពីការបង្ការទប់ស្កាត់គ្រឿងញៀន និងការគោរពវិន័យវិជ្ជាជីវៈ។
- ជំរុញការចុះអនុវត្តផ្ទាល់៖ ក្រុមការងារចុះតាមមណ្ឌលអប់រំកែប្រែ ត្រូវសម្រេចកិច្ចការឱ្យបានត្រឹមដំណាច់ខែមីនា ឆ្នាំ២០២៦ ដោយផ្តោតលើការផ្សព្វផ្សាយដល់មន្ត្រី ដើម្បីប្រមូលមូលដ្ឋានសរុបរបាយការណ៍ជូនគណៈកម្មការទទួលបន្ទុកអនុវត្តវិធានការរដ្ឋបាល។
- ប្រសិទ្ធភាពនៃការធ្វើរបាយការណ៍៖ ក្រុមការងារលេខាធិការដ្ឋាន ត្រូវបន្តទំនាក់ទំនងប្រមូលរបាយការណ៍តាមទម្រង់កំណត់ពីបណ្តារដ្ឋបាលរាជធានី-ខេត្ត ឱ្យបានគ្រប់ចំនួន និងទាន់ពេលវេលា។
កិច្ចប្រជុំនេះ បង្ហាញពីការប្តេជ្ញាចិត្តយ៉ាងមុតមាំរបស់ក្រសួងមហាផ្ទៃ ក៏ដូចជាអគ្គនាយកដ្ឋានពន្ធនាគារ ក្នុងការបង្កើនប្រសិទ្ធភាពគ្រប់គ្រង និងទប់ស្កាត់ការរីករាលដាលនៃគ្រឿងញៀននៅក្នុងពន្ធនាគារទូទាំងប្រទេស៕
អត្ថបទ៖ត្រយង