យ៉ាងហោចណាស់មនុស្ស ៣២នាក់បានស្លាប់ និងមនុស្ស ៦៤នាក់ផ្សេងទៀតបានរងរបួស ដោយសារកំណាច់តំណស្ពានកំពុងលើកស្ទូច និងស្ទូចឡើងទៅលើ បានបាក់សង្កត់លើទូរថភ្លើងក្នុងខ្សែរត់ចេញដំណើរពីទីក្រុងបាងកកទៅកាន់ខេត្ត នគររាជសីមា ដោយឆ្លងកាត់ផ្លូវទៅខេត្តឧបុនរដ្ឋធានី កាលពីព្រឹកថ្ងៃពុធ ម្សិលម៉ិញ។ នេះបើយោងតាមការចេញផ្សាយដោយសារព័ត៌មាន Bangkok Post នាថ្ងៃទី១៥ ខែមករា ឆ្នាំ២០២៦។
យោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុកឱ្យដឹងថា ផលប៉ះពាល់នៃការបាក់ស្រុតនេះ ពាក់ព័ន្ធនឹងរថយន្តស្ទូចដែលកំពុងលើកស្ទូចកំណាត់ស្ពានបេតុងខាងលើធ្លាក់ចំរថភ្លើង ហើយបណ្ដាលឱ្យមានភ្លើងឆេះយ៉ាងសន្ធោសន្ធៅចេញពីទូររថភ្លើងដោយសង្ស័យមានផ្ទុកឥន្ទៈក្នុងទូររថភ្លើង។
បើតាមការរាយការណ៍ពីក្រសួងសុខាភិបាលនៅម៉ោង ៥និង២០នាទីល្ងាច ម្សិលម៉ិញ មានអ្នកស្លាប់បានកើនឡើងដល់ចំនួន ៣២នាក់ បាត់ខ្លួន ៣នាក់ និងរបួស ៦៤នាក់។ របាយការណ៍ដដែលបន្តថា ក្នុងចំណោមអ្នករងរបួសមាន ៧នាក់របួសធ្ងន់, ៣៨នាក់របួសស្រាល និង១៩នាក់ទៀតរបួសមិនធ្ងន់មិនស្រាល។
បច្ចុប្បន្ន ក្រុមសមត្ថកិច្ច និងមន្ត្រីជំនាញថៃ កំពុងព្យាយាមក្នុងប្រតិបត្តិការចុះស្វែងរក និងជួយសង្គ្រោះអ្នកដំណើរបន្ដទៀត ខណៈការស៊ើបអង្កេតកំពុងបន្ដដំណើរការដូចគ្នា៕
