ក្លិបបាល់ទាត់វិសាខា បន្តរក្សាកៅអី Top6 ក្រោយស្មើជាមួយណាហ្គាវើលដ៍ ១-១ ក្នុងកីឡដ្ឋានវិសាខា នៃពានរង្វាន់លីគកំពូលកម្ពុជា Cambodian Premier League រដូវកាលឆ្នាំ២០២៥-២៦ ប្រកួតសប្តាហ៍ទី១៨ កាលពីថ្ងៃទី២៥ ខែមករា ឆ្នាំ២០២៦។
ក្រោមការដឹកនាំរបស់លោក Scott Cooper គ្រូបង្វឹកថ្មីជនជាតិ អង់គ្លេស ៣ប្រកួតកន្លងមក ជួយឱ្យវិសាខា យកឈ្នះគិរីវង់សុខសែនជ័យ ក្នុងលទ្ធផល ២-១ នៅទឹកដីរបស់ខ្លួន ឈ្នះ ISI ដង្កោសែនជ័យ ៨-១ និងស្ម់ើជាមួយ ណាហ្គាវើលដ៍ ១-១ រក្សាកៅអី Top6 ឆ្លងកាត់១៧ប្រកួត ឈ្នះ៦ ស្មើ៧ និងចាញ់៤ មាន២៥ពិន្ទុ។
តារាងចំណាត់ថ្នាក់ ត្រឹមសប្ដាហ៍ទី១៨៖
ក្នុងនោះឃើញថាព្រះខ័នរាជស្វាយរៀង បន្តរក្សាកំពូលតារាង ភ្នំពេញក្រោនលេខ២ ចំណេងណាហ្គាវើលដ៍ ឡើងមកលេខ៣ ខណ:បឹងកេត បន្តរក្សានៅក្នុងតំបន់ Top4 បើទោះជាចាញ់អង្គរថាយហ្គឺរ កាលពីថ្ងៃទី២៥ មករា ក្នុងពហុកីឡដ្ឋានជាតិ។
ពានរង្វាន់លីគកំពូលកម្ពុជា (Cambodian Premier League) រដូវកាលឆ្នាំ២០២៥-២៦ ចាប់ផ្តើមពី ថ្ងៃសៅរ៍ ទី៩ ខែសីហា ឆ្នាំ២០២៥ ដោយតម្រូវក្រុមជាសមាជិកប្រកួតវិលជុំសន្សំពិន្ទុចំនួន២ជើង ហើយក្រុមចំណាត់ថ្នាក់លេខ១ដល់លេខ៦ បន្តប្រកួតយកជើងឯក ខណៈក្រុមលេខ៧ ដល់១១ ត្រូវប្រកួតយកចំណាត់ថ្នាក់។
គួរបញ្ជាក់ថា ពានរង្វាន់លីគកំពូលកម្ពុជា (Cambodian Premier League) រដូវកាលថ្មី ឆ្នាំ២០២៥-២០២៦មានសមាជិកក្រុម ១១ចូលរួមប្រកួតប្រជែង រួមមាន៖ ឡាយ ខេត្តព្រះសីហនុ បឹងកេត កងយោធពលខេមរភូមិន្ទ វិសាខា ព្រះខ័នរាជស្វាយរៀង ណាហ្គាវើលដ៍ អឹម អូ អាយ កំពង់ដេវ៉ា អង្គរថាហ្កឺរ អាយអេសអាយ ដង្កោសែនជ័យ និងគិរីវង់សុខសែនជ័យ៕
