បន្ទាប់ពីមានការចាប់អារម្មណ៍និងមតិវែកញែកច្រើនលើបណ្តាញសង្គមពាក់ព័ន្ធនឹងស្នាដៃនិពន្ធសៀវភៅថ្មីរបស់ខ្លួន លោកបណ្ឌិតទូច សុឃៈ (សុខៈ) អ្នកនាំពាក្យរងក្រសួងមហាផ្ទៃ និងជាអ្នកស្រាវជ្រាវដែលមានចំណូលចិត្តចងក្រងព្រឹត្តិការណ៍សង្គមបានចេញមុខពន្យល់យ៉ាងក្បោះក្បាយពីគោលបំណងពិតប្រាកដ និងស្រាយបំភ្លឺយ៉ាងលម្អិតជុំវិញខ្លឹមសារសៀវភៅដែលលោកកំពុងនិពន្ធមានចំណងជើងថា«កម្ពុជាឈ្នះថៃសម័យតេជោធិបតី»ដើម្បីជម្រះមន្ទិលសង្ស័យរបស់មហាជន។
លោកបណ្ឌិតបានបញ្ជាក់នៅថ្ងៃទី២៦ ខែមករា ឆ្នាំ២០២៦ នេះ ថាស្នាដៃមួយនេះ ត្រូវបានរៀបចំឡើងតាំងពីកំឡុងខែមិថុនា ឬកក្កដា ឆ្នាំ២០២៥ មកម្ល៉េះដោយមានការចាប់អារម្មណ៍យ៉ាងខ្លាំងពីសំណាក់សិស្ស និស្សិតនិងសាធារណជនជាច្រើនដែលចង់បានទៅសិក្សា ប៉ុន្តែលោកបានសម្រេចចិត្តមិនទាន់បោះពុម្ពផ្សាយនៅឡើយទេរហូតដល់ដំណោះស្រាយលើបញ្ហានានាត្រូវបានគ្រប់គ្រងបានទាំងស្រុង។ រហូតមកដល់ពេលនេះសៀវភៅនេះសរសេរបានជាង ៧០០ ទំព័រហើយ និងត្រូវបានព្យាករណ៍ថាអាចកើនឡើងដល់ជិត ១,០០០ ទំព័រដោយខ្លឹមសារសំខាន់គឺផ្ដោតលើការដកស្រង់នូវយុទ្ធសាស្ត្រធំៗយ៉ាងតិចចំនួន ៦ដែលកម្ពុជាបានប្រើប្រាស់ដើម្បីដោះស្រាយបញ្ហាជាមួយភាគីថៃ។
លោកបណ្ឌិតបានសង្កត់ធ្ងន់ថាយុទ្ធសាស្ត្រដែលលោកលើកយកមកបង្ហាញ មិនមែនសំដៅលើការប្រើប្រាស់កម្លាំងបាយ ឬអំពើហិង្សានោះឡើយដែលនេះគឺជាការបកស្រាយខុសពីការយល់ឃើញរបស់បងប្អូនមួយចំនួនដែលគិតតែរឿងច្បាំងឬការប្រយុទ្ធគ្នាតែមួយមុខ។ ផ្ទុយទៅវិញ ភាពឈ្នះដែលលោកចង់បង្ហាញគឺជាជ័យជម្នះដោយភាពថ្លៃថ្នូរ និងស្របតាមច្បាប់អន្តរជាតិ ដែលធ្វើឱ្យភាគីថៃក៏អស់ចិត្តនិងអាចទទួលយកបាន ដែលនាំទៅរកសន្តិភាពយូរអង្វែងរវាងប្រទេសទាំងពីរ។
លោកបណ្ឌិត ទូច សុឃៈ (សុខៈ) បានបង្ហាញការជឿជាក់យ៉ាងមុតមាំលើការដឹកនាំរបស់ សម្ដេចមហាបវរធិបតី ហ៊ុន ម៉ាណែតនាយករដ្ឋមន្ត្រីនៃកម្ពុជា ដែលកំពុងប្រើប្រាស់យុទ្ធសាស្ត្រ «ស្ងាត់តែមិនស្ងៀម»។ លោកយល់ឃើញថាការប្រើប្រាស់ពេលវេលា និងភាពអត់ធ្មត់គឺជាអំណាចដ៏ខ្លាំងក្លាបំផុតក្នុងការការពារជាតិ តាមរយៈនយោបាយការទូត និងផ្លូវច្បាប់ដោយមិនយកប្រទេសណាមួយជាសត្រូវឡើយ។ លោកបានប្រៀបធៀបយុទ្ធសាស្ត្រនេះទៅនឹង«ល្បែងអុក» និងរបៀប «ស្ទូចត្រី»ដែលត្រូវការពេលវេលា និងការបន្លាយខ្សែវែងដើម្បីចាប់ត្រីធំ។
ឆ្លើយតបមកកាន់សារព័ត៌មានត្រយង តាមរយៈសារអេឡិចត្រូនិច លោកបណ្ឌិត បានបញ្ជាក់ច្បាស់ៗ មួយៗ ថា៖
«មកដល់ពេលនេះគឺសៀវភៅមិនទាន់បានបញ្ចប់នៅឡើយទេខ្លឹមសារជាង ៧០០ទំព័រដែលសរសេរបានហ្នឹង ហើយ ក៏មិនមានការចាំបាច់នៅក្នុងការបោះពុម្ពផ្សាយនៅក្នុងពេលនេះដែរ។ ការបោះពុម្ពផ្សាយ គឺសូមបញ្ជាក់ម្ដងទៀតគឺនៅពេលដែលដំណោះស្រាយត្រូវបានគ្រប់គ្រងបាន មួយរយភាគរយ ហើយយើងអាចនឹងប្រែប្រួលចំណងជើងទៅតាមស្ថានការណ៍ជាក់ស្ដែង តែយ៉ាងណាក៏ដោយគឺ ដើម្បីជាមេរៀន ជាបទពិសោធន៍ សម្រាប់ប្រជាពលរដ្ឋ ចងចាំនូវព្រឹត្តិការណ៍ដែលកើតឡើងចំពោះកម្ពុជា និងជាមេរៀនដកពិសោធន៍សម្រាប់អនាគតទៅមុខទៀត ក្នុងកាលៈទេសៈណាមួយដែលកម្ពុជារងការយាយីពីភាគីណាមួយជាដើម។»
ការលើកឡើងខ្លីរបស់លោក បណ្ឌិត គឺបានបញ្ជាក់យ៉ាងច្បាស់ហើយថា សៀវភៅនេះស្ថិតក្នុងការ និពន្ធចងក្រង និង ស្រាវជ្រាវ មិនទាន់ចេញផ្សាយជាផ្លូវការនៅឡើយទេ ហើយលោកបានចែករំលែកពីចំណងជើងសៀវភៅថ្មីនេះ នៅលើបណ្ដាញសង្គមផ្ទាល់ខ្លួន គឺតាំងតែពីថ្ងៃទី៧ ខែកក្កដា ឆ្នាំ២០២៥ កន្លងមកម្ល៉េះ មិនមែនទើបតែបង្ហោះផ្សាយនៅពេលថ្មីៗនេះឡើយ ។
ចំពោះបញ្ហានេះដែរ ត្រូវបានលោក មួង សារ៉េត ដែលជាអ្នកសារព័ត៌មានឯករាជ្យនៅសហរដ្ឋអាមេរិក បានផ្ញើសារសុំឱ្យបងប្អូនខ្មែរ ពិសេសគឺខ្មែរនៅសហរដ្ឋអាមេរិក កុំចូលរួមចែកចាយ នូវក្របសៀវភៅគំរូព្រៀងខាងលើជាបន្តទៀត ព្រោះអ្វីដែលលោក បណ្ឌិត ទូច សុឃៈ បានលើកយកមកបង្ហោះនោះ គឺតាំងពីដើមខែកក្កដា ឆ្នាំ២០២៥ ហើយគ្រាន់តែជាក្របសៀវភៅព្រៀង មិនទាន់ចេញផ្សាយទៅទៀត ដែលការយកមកចែកចាយបែបនេះគឺ ប្រៀបបាននឹងការលាបពណ៌ និងបង្កនូវភាពអយុត្តិធម៌ចំពោះលោក បណ្ឌិត ទូច សុឃៈ ខ្លាំងទៅទៀត។
ដោយឡែកក្នុងវីដេអូនោះ លោក មួង សារ៉េត ក៏បានលើកជាសំណូមពរ និងស្នើទៅកាន់លោក បណ្ឌិត ទូច សុ
ឃៈ ឱ្យមានការពិចារណាលើការកែសម្រួលចំណងជើងផងដែរ ដោយលោកបណ្ឌិតក៏បានឆ្លើយតបវិញដោយសារវិជ្ជមានថា ក្នងនាមជាអ្នកនិពន្ធចងក្រងនិងរៀបរៀង គឺរមែងទទួលយកនូវរាល់សំណូមពររបស់មិត្តអ្នកអានមកពិចារណាក្នុងការកែសម្រួលនូវចំណងជើង ដោយការកែសម្រួលចំណងជើងនេះ គឺត្រូវសិក្សា វិភាគ ទៅតាមស្ថានភាពចំពោះមុខ ទៅតាមស្ថានភាពចាំបាច់ ទៅតាមការប្រែប្រួលនៃព្រឹត្តិការណ៍ពីមួយដំណាក់កាលទៅមួយដំណាក់កាល។ ជារួមការនិពន្ធសៀវភៅនីមួយៗ អ្នកនិពន្ធ មានឆន្ទៈធំបំផុត គឺតម្កល់នូវឧត្តមប្រយោជន៍របស់ប្រជាជននិងជាតិជាធំ ដើម្បីជាឯកសារប្រវត្តិសាស្ត្រសម្រាប់កូនខ្មែរគ្រប់ៗជំនាន់តរៀងទៅ៕
