រាជធានីភ្នំពេញ៖ កាលពីថ្ងៃចន្ទ ទី២៦ ខែមករា ឆ្នាំ២០២៦ អគ្គនាយកដ្ឋានធនធានមនុស្ស នៃក្រសួងមហាផ្ទៃ បានរៀបចំសន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ ក្រោមអធិបតីភាពដ៏ខ្ពង់ខ្ពស់របស់ ឯកឧត្តមសន្តិបណ្ឌិត ចាន់ អ៊ាន រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
សមិទ្ធផលលេចធ្លោក្នុងឆ្នាំ២០២៥
អង្គសន្និបាតបានវាយតម្លៃខ្ពស់ចំពោះលទ្ធផលដែលសម្រេចបានគួរឱ្យកត់សម្គាល់ រួមមាន៖
- ការអនុវត្តផែនការសកម្មភាព៖ សម្រេចបានរហូតដល់ ៨៩.៨៧% ស្របតាមផែនការយុទ្ធសាស្ត្រ ៥ឆ្នាំ (២០២៤-២០២៨)។
- ការកែទម្រង់ច្បាប់៖ បានរៀបចំ និងបង្កើតលិខិតបទដ្ឋានគតិយុត្តថ្មីៗជាច្រើន ដើម្បីពង្រឹងការគ្រប់គ្រងមន្ត្រីរាជការ។
- ការបណ្តុះបណ្តាល៖ បានបញ្ជូនមន្ត្រីទៅសិក្សាបំប៉នជំនាញទាំងក្នុង និងក្រៅប្រទេស ដើម្បីលើកកម្ពស់សមត្ថភាពវិជ្ជាជីវៈ។
- ឌីជីថលូបនីយកម្ម៖ បានធ្វើទំនើបកម្មប្រព័ន្ធគ្រប់គ្រងទិន្នន័យមន្ត្រីរាជការតាមរយៈប្រព័ន្ធ Online និង Offline ដើម្បីភាពងាយស្រួល និងប្រសិទ្ធភាព។
ទិសដៅការងារ និងការកែទម្រង់ធនធានមនុស្ស
ក្នុងឱកាសនោះ ឯកឧត្តមរដ្ឋលេខាធិការ បានបង្ហាញនូវការផ្លាស់ប្តូរជាវិជ្ជមាននៃការកែទម្រង់ធនធានមនុស្ស ៥ ចំណុចសំខាន់ៗ៖
- វិន័យ និងប្រសិទ្ធភាព៖ មន្ត្រីរាជការមានវិន័យការងារល្អជាងមុន និងទទួលខុសត្រូវខ្ពស់។
- តម្លាភាពក្នុងការរើសមន្ត្រី៖ ការជ្រើសរើសក្របខ័ណ្ឌមន្ត្រីត្រូវធ្វើឡើងផ្អែកលើគោលការណ៍គុណាធិបតេយ្យ និងយុត្តិធម៌។
- ការតែងតាំងមុខតំណែង៖ ការដំឡើងស័ក្តិ និងការផ្ទេរភារកិច្ច ត្រូវអនុវត្តយ៉ាងម៉ឺងម៉ាត់តាមបទបញ្ញត្តិ និងសមត្ថភាពជាក់ស្តែង។
- ការពង្រឹងវិន័យ៖ ការអនុវត្តទណ្ឌកម្មខាងវិន័យត្រូវបានធ្វើឡើងចំពោះមន្ត្រីដែលប្រព្រឹត្តខុស។
- សេវាសាធារណៈរហ័ស៖ ការពិនិត្យសំណុំរឿងបុគ្គលិកត្រូវបានធ្វើឡើងយ៉ាងឆាប់រហ័ស និងមានប្រសិទ្ធភាព។
អនុសាសន៍ផ្តាំផ្ញើ
ជាទីបញ្ចប់ ឯកឧត្តមសន្តិបណ្ឌិត ចាន់ អ៊ាន បានជំរុញឱ្យថ្នាក់ដឹកនាំ និងមន្ត្រីទាំងអស់នៃអគ្គនាយកដ្ឋានធនធានមនុស្ស បន្តកិច្ចសហការយ៉ាងជិតស្និទ្ធជាមួយអង្គភាពពាក់ព័ន្ធ និងខិតខំបំពេញភារកិច្ចដោយស្មារតីទទួលខុសត្រូវខ្ពស់ ដើម្បីសម្រេចឱ្យបាននូវផែនការយុទ្ធសាស្ត្រស្តីពីការគ្រប់គ្រង និងអភិវឌ្ឍធនធានមនុស្ស (២០២៦-២០៣០) ឱ្យកាន់តែប្រសើរឡើងថែមទៀត៕
អត្ថបទ៖ត្រយង