យោងតាមបញ្ជីដែលគេហទំព័រ Transter Markt បានបង្ហាញកាលពីពេលកន្លងទៅថ្មីៗនេះ ក្នុងនោះលេចចេញឈ្មោះកីឡាករខ្មែរ ម្នាក់ដែលអាចរកគ្រាប់បាល់បាន ក្នុងការប្រកួតពានរង្វាន់លីគកំពូលកម្ពុជា សម្រាប់រដូវកាលឆ្នាំ២០២៥-២៦នេះ។
កីឡាករម្នាក់នោះមានឈ្មោះថា « វីរៈ ដារ៉ា » ជាអ្នកចាំទីរបស់ក្លិបបាល់ទាត់ព្រះខ័នរាជស្វាយរៀង ជាប់ឈ្មោះជាកីឡាកររកគ្រាប់បាល់បានក្នុងនាមជាអ្នកចាំទី ខណៈគ្រាប់បាល់ដ៏អស្ចារ្យនោះគឺរូបគេរកបានក្នុងការប្រកួតទល់នឹងក្រុមអាយអេសអាយដង្កោសែនជ័យ កាលពីថ្ងៃទី១៩ ខែវិច្ឆិកា ឆ្នាំ២០២៥ កន្លងទៅ។ គ្រាប់បាល់ដែលអ្នកចាំទីវ័យ២២ឆ្នាំរូបនេះ រកបានគឺជាគ្រាប់បាល់លឿនជាងគេដំផុត ពោលគឺអាចរកបាននៅត្រឹមនាទីទី ០.០៩វិនាទីប៉ុណ្ណោះ។
ក្រៅពីកីឡាករវីរៈ ដារ៉ា របស់ម្ពុជា នៅមានអ្នកចាំទីចំនួន ៥រូបទៀតដែលអាចរកគ្រាប់បាល់បាន ប៉ុន្តែមិនទាន់បំបែកកំណត់ត្រារបស់កីឡាករខ្មែរបាន ក្នុងនោះរួមមាន៖
- កីឡាករ Alex Ruiz អ្នកចាំទីរបស់ក្លិប FC Sanra Coloma សមាជិកនៃលីគទី៣ នៃប្រទេសអង់ដូរ៉ា រកបាន១គ្រាប់
- កីឡាករ Denovan Torres អ្នកចាំទីរបស់ក្លិប Juticalpa សមាជិកនៃលីគទី២ ហុងឌូរ៉ាស រកបាន១គ្រាប់
- កីឡាករ Timothy Shiraoka អ្នកចាំទីរបស់ Ahuilas-Umak សមាជិកលីគទី១នៃប្រទេសហ្វីលីពីន រកបាន១គ្រាប់
- កីឡាករ Ismel Morgado អ្នកចាំទីរបស់ ART Jalapa សមាជិកលីគទី១ នៃប្រទេសនីការ៉ាហ្គា រកបាន១គ្រាប់
- កីឡាករ Serigne Saliou Fall អ្នកចាំទីរបស់ ASC La Linguere សមាជិកលីគទី២ នៃប្រទេស សេណេហ្គាល់រកបាន១គ្រាប់
កីឡាករ វីរៈ ដារ៉ា ជាកូនអ្នកខេត្តបាត់ដំបង បានចាប់ផ្តើមអាជីពដំបូងជាអ្នកចាំទីនៅក្លិបបាល់ទាត់ខេត្តព្រៃវែង ថែមទាំងបានជួយក្រុមមួយនោះឈ្នះជើងឯកពានរង្វាន់សម្តេចតេជោ ហ៊ុន សែន ថ្នាក់ខេត្ត កាលពីឆ្នាំ២០២០ ។ ក្រោយមករូបគេទៅចូលរួមជាមួយវិសាខា នៅឆ្នាំ២០២២ និងបានជួយក្លិបនៅរាជធានីមួយនេះឈ្នះជើងឯកពានរង្វាន់សម្តេចថ្នាក់ជាតិ នៅឆ្នាំដដែល ថែមទៀតផង មុនរូបគេទៅចូលរួមជាមួយក្រុមនៅភាគខាងកើតព្រះខ័នរាជស្វាយរៀង៕
