ភ្នំពេញ៖ នារសៀលថ្ងៃទី៩ ខែកុម្ភៈ ឆ្នាំ២០២៦ ឯកឧត្តម កែវ រ៉េមី ទេសរដ្ឋមន្ត្រី និងជាប្រធានគណៈកម្មាធិការសិទ្ធិមនុស្សកម្ពុជា (គ.ស.ម.ក.) បានទទួលជួបពិភាក្សាការងារជាមួយ ឯកឧត្តម Ueno Atsushi ឯកអគ្គរាជទូតជប៉ុនប្រចាំកម្ពុជា ដើម្បីពិភាក្សាអំពីស្ថានភាពសិទ្ធិមនុស្ស និងបញ្ហាប្រឈមនៅតាមព្រំដែន។
ចំណុចសំខាន់ៗនៃកិច្ចពិភាក្សា៖
- ការរំលោភកិច្ចព្រមព្រៀងបទឈប់បាញ់៖ ឯកឧត្តមទេសរដ្ឋមន្ត្រី បានជម្រាបជូនភាគីជប៉ុនថា ទោះបីមានកិច្ចព្រមព្រៀងបទឈប់បាញ់កាលពីថ្ងៃទី២៧ ខែធ្នូ ឆ្នាំ២០២៥ ក៏ដោយ ក៏ជនភៀសសឹកកម្ពុជាប្រមាណ ៩ម៉ឺននាក់ នៅមិនទាន់អាចត្រឡប់ទៅផ្ទះសម្បែងវិញបានឡើយ។ មូលហេតុគឺដោយសារភាគីថៃបន្តកាន់កាប់ទឹកដីកម្ពុជាខុសច្បាប់ និងដាក់រាំងខ្ទប់ដោយបន្លាលួស និងទូកុងតឺន័រ ដែលផ្ទុយនឹងខ្លឹមសារនៃកិច្ចព្រមព្រៀង។
- ផលប៉ះពាល់សិទ្ធិមនុស្សធ្ងន់ធ្ងរ៖ សកម្មភាពរារាំងទាំងនេះបានធ្វើឱ្យប៉ះពាល់ដល់សិទ្ធិសេរីភាពមូលដ្ឋានរបស់ប្រជាពលរដ្ឋ ជាពិសេស ស្រ្តី កុមារ និងជនពិការ ក្នុងការទទួលបានការអប់រំ សេវាសុខភាព និងលំនៅឋានសមរម្យ។
- ការបំផ្លិចបំផ្លាញដោយអាវុធធុនធ្ងន់៖ ឯកឧត្តមបានលើកឡើងពីការប្រើប្រាស់អាវុធគ្រប់ប្រភេទ រួមទាំងគ្រាប់បែកចង្កោម និងយន្តហោះចម្បាំងរបស់យោធាថៃ ដែលបានវាយប្រហារលើគោលដៅស៊ីវិល បំផ្លាញសាលារៀន មន្ទីរពេទ្យ និងបេតិកភណ្ឌពិភពលោកគឺ “ប្រាសាទព្រះវិហារ”។
- ជំនឿលើច្បាប់អន្តរជាតិ៖ កម្ពុជានៅតែប្រកាន់ខ្ជាប់នូវការដោះស្រាយជម្លោះតាមរយៈយន្តការច្បាប់អន្តរជាតិ ហើយសង្ឃឹមថាប្រទេសជប៉ុននឹងប្រើប្រាស់តួនាទីដ៏សំខាន់របស់ខ្លួន ដើម្បីជំរុញឱ្យភាគីថៃដោះស្រាយបញ្ហាឱ្យបានត្រឹមត្រូវ។
ការឆ្លើយតបពីភាគីជប៉ុន៖
ជាការឆ្លើយតប ឯកឧត្តម Ueno Atsushi បានបញ្ជាក់ថា នឹងនាំយកព័ត៌មាន និងស្ថានភាពជាក់ស្តែងនៅព្រំដែនកម្ពុជា-ថៃ ជម្រាបជូនរដ្ឋាភិបាលជប៉ុននៅទីក្រុងតូក្យូ។ ជាមួយគ្នានេះ រដ្ឋាភិបាលជប៉ុនក៏បាននិងកំពុងផ្តល់ជំនួយមនុស្សធម៌ដល់ជនភៀសសឹកកម្ពុជា ដើម្បីជួយសម្រាលទុក្ខលំបាក និងបន្តកិច្ចសហប្រតិបត្តិការល្អរវាងប្រទេសទាំងពីរ។
កិច្ចជំនួបបានបញ្ចប់ទៅក្នុងបរិយាកាសស្និទ្ធស្នាល និងយោគយល់គ្នាខ្ពស់ក្នុងគោលដៅស្វែងរកសន្តិភាព និងយុត្តិធម៌ជូនប្រជាពលរដ្ឋ៕
អត្ថបទ៖ត្រយង