រាជធានីភ្នំពេញ៖ នារសៀលថ្ងៃទី១១ ខែកុម្ភៈ ឆ្នាំ២០២៦ នៅវិទ្យាស្ថានបច្ចេកវិទ្យាកម្ពុជា ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញជាអធិបតីក្នុងវេទិកាពិភាក្សាទី១ ក្រោមប្រធានបទ “អភិវឌ្ឍមូលធនមនុស្សប្រកបដោយបរិយាបន្ន និងភាពធន់”។ វេទិកានេះគឺជាផ្នែកមួយនៃសន្និបាតបូកសរុបការងារអប់រំ យុវជន និងកីឡា ឆ្នាំសិក្សា២០២៤-២០២៥ និងលើកទិសដៅឆ្នាំសិក្សា២០២៥-២០២៦។
ក្នុងឱកាសនោះ ឯកឧត្តមឧបនាយករដ្ឋមន្ត្រី បានផ្តល់អនុសាសន៍គន្លឹះ និងទស្សនវិស័យវែងឆ្ងាយលើការកែទម្រង់វិស័យអប់រំកម្ពុជាដូចខាងក្រោម៖
១. មូលធនមនុស្សជាខែលការពារជាតិក្នុងស្ថានភាពមិនប្រាកដប្រជា
ឯកឧត្តមបណ្ឌិតសភាចារ្យ បានលើកឡើងថា បច្ចុប្បន្នពិភពលោកកំពុងស្ថិតក្នុងស្ថានភាពមិនប្រាកដប្រជា ដែលបង្កឡើងដោយការប្រកួតប្រជែងអំណាចរវាងប្រទេសមហាអំណាច និងសង្គ្រាមពាណិជ្ជកម្ម។ ក្នុងស្ថានភាពនេះ ឯកឧត្តមបានសង្កត់ធ្ងន់ថា៖
“ប្រសិនបើកម្ពុជាមិនមានទិសដៅយុទ្ធសាស្ត្រច្បាស់លាស់ទេ យើងនឹងងាយរងគ្រោះដោយសារសម្ពាធទាំងនេះ។ ដូច្នេះ ការវិនិយោគលើធនធានមនុស្ស មានតួនាទីយ៉ាងសំខាន់បំផុតក្នុងបរិបទបច្ចុប្បន្ន ដើម្បីធានាបាននូវស្ថិរភាពសង្គម និងការអភិវឌ្ឍ។”
២. ការត្រៀមខ្លួនចំពោះបដិវត្តន៍បច្ចេកវិទ្យា AI
ពាក់ព័ន្ធនឹងការរីកចម្រើននៃបច្ចេកវិទ្យាឌីជីថល ឯកឧត្តមរដ្ឋមន្ត្រីបានណែនាំឱ្យវិស័យអប់រំត្រូវតែបត់បែនឱ្យចំគោលដៅ៖
- បច្ចេកវិទ្យា AI៖ នឹងមានផលជះខ្លាំងលើការអប់រំ ដែលនាំឱ្យជំនាញខ្លះបាត់បង់ និងជំនាញថ្មីៗកើតឡើង។
- ការឆ្លើយតប៖ ការសិក្សារៀនសូត្រត្រូវតែឆ្លើយតបឱ្យទាន់ពេលវេលាទៅនឹងការវិវត្តនៃ AI ដើម្បីបណ្តុះបណ្តាលយុវជនឱ្យមានសមត្ថភាពពេញលេញក្នុងការប្រកួតប្រជែង។
៣. ស្មារតីសាមគ្គីភាព និងមនសិការស្នេហាជាតិ
ឯកឧត្តមឧបនាយករដ្ឋមន្ត្រី ក៏បានថ្លែងនូវការកោតសរសើរយ៉ាងជ្រាលជ្រៅចំពោះថ្នាក់ដឹកនាំ មន្ត្រីអប់រំ និងជាពិសេសបុគ្គលិកអប់រំក្នុងខេត្តទាំង ៧ ដែលរងផលប៉ះពាល់ពីជម្លោះព្រំដែន។ ឯកឧត្តមបានចាត់ទុកការខិតខំផ្តល់សេវាអប់រំដល់សិស្សានុសិស្សទោះក្នុងកាលៈទេសៈលំបាកថា ជាស្មារតីឯកភាពសាមគ្គីភាព និងមនសិការស្នេហាជាតិដ៏ខ្ពង់ខ្ពស់។
៤. កិច្ចពិភាក្សាលើបទបង្ហាញយុទ្ធសាស្ត្រទាំង ៥
ក្នុងវេទិកានោះដែរ ក៏មានការធ្វើបទបង្ហាញពីវាគ្មិនជំនាញលើប្រធានបទសំខាន់ៗ រួមមាន៖ ការអប់រំកុមារតូច, ការគ្រប់គ្រងលទ្ធផលសិក្សាសិស្សបឋម និងមធ្យមសិក្សា, កំណែទម្រង់គ្រូបង្រៀន និងការអនុវត្តសាកល្បងគន្លងអប់រំថ្មី ដែលសម្របសម្រួលដោយ ឯកឧត្តម ហុង គឹមជាង អនុរដ្ឋលេខាធិការ។
ជាកិច្ចបញ្ចប់ ឯកឧត្តមបណ្ឌិតសភាចារ្យ ហង់ជួន ណារ៉ុន បានវាយតម្លៃខ្ពស់ថា សមិទ្ធផលកន្លងមកសបញ្ជាក់ថា កម្ពុជាកំពុងដើរលើផ្លូវដ៏ត្រឹមត្រូវ ហើយត្រូវបន្តខិតខំបន្ថែមទៀតដើម្បីឈានទៅដល់កម្រិតស្តង់ដាដែលអាចប្រកួតប្រជែងជាមួយប្រទេសជិតខាងបានយ៉ាងជឿជាក់។
សូមរំលឹកថា សន្និបាតអប់រំឆ្នាំ២០២៦ នេះ នឹងបន្តប្រព្រឹត្តទៅរហូតដល់ថ្ងៃទី១៣ ខែកុម្ភៈ ឆ្នាំ២០២៦ តាមរយៈការពិភាក្សា និងការដាក់ចេញនូវទិសដៅយុទ្ធសាស្ត្រថ្មីៗបន្ថែមទៀត៕
អត្ថបទ៖ត្រយង