តារាចម្រៀង-តារាសម្ដែងជើងចាស់អ្នកនាង សូដា នីតា បានចេញមកប្រកាសស្វែងរកមុខអ្នកនាង សឿ សុធារ៉ា ឱ្យចូលខ្លួនទៅដោះស្រាយជាមួយអ្នកនាងប្រសិនបើមិនចង់ត្រូវបានដីការកោះហៅ ប៉ុន្តែមិនបានទម្លាយឱ្យស៊ីជម្រៅថាមានបញ្ហាអ្វីឱ្យប្រាកដនោះឡើយ ប៉ុន្តែឈានមកយប់ថ្ងៃទី២ ខែតុលាដដែល អ្នកនាង បានចេញមកប្រកាសទម្លាយឱ្យដឹងការពិតពាក់ព័ន្ធនឹងបំណុល ជិត៤ម៉ឺនដុល្លារ ដែលអ្នកនាង សឿ សុធារ៉ា បានជំពាក់ខ្លួន ថែមទាំងហ៊ានបោះចោលបំណុលដ៏ច្រើនសន្ធឹកសន្ធាប់នោះទៀត ប្រសិនបើអ្នកនាង សឿ សុធារ៉ា ដើរស្រាតតែ១ដងនោះ។
បញ្ហាដែលកើតមានខាងលើ ត្រូវបានអ្នកម្ដាយកូនមួយរូបនេះសម្រាយសាច់រឿងឱ្យដឹងតាមរយៈបណ្ដាញសង្គមដូច្នេះ «ដើមឡើយអ្នកនាង សឿ សុធារ៉ា ជំពាក់បំណុលតុងទីនគេត្រូវផុសផ្អើលហ្វេសប៊ុក កាលណោះអ្នកនាង សឿ សុធារ៉ាបានតេមករកអ្នកនាងដើម្បីយកលុយទៅឱ្យកូនតុងទីន ដើម្បីបិទមាត់កុំឱ្យគេផុស អ្នកនាងក៏យល់ព្រមជួយជាបន្តបន្ទាប់រហូតជិត៤ម៉ឺនដុល្លារ។ ប៉ុន្តែនៅពេលដោះស្រាយមានកេរ្តិ៍ឈ្មោះឡើងវិញស្រាប់តែកាត់ផ្ដាច់ទំនាក់ទំនង លែងតបឆាត ដែលជាទង្វើមួយមើលងាយដល់រូបអ្នកនាង»។
នៅមិនទាន់អស់ត្រឹមនេះនៅឡើយនោះទេ តារារៀមច្បងរូបនេះក៏បានទម្លាយបន្តទៀតដែរថា «អ្នកនាង សឿ សុធារ៉ា ប្រាប់ថាខ្លួនកើតរោគចិត្ត មានប័ណ្ណចេញពីពេទ្យ ថែមទាំងថាគ្មានលទ្ធភាពសង ចង់ឆ្កួត ចង់សម្លាប់ខ្លួន ហើយឱ្យអ្នកនាងបំភ្លេចលុយជំពាក់នោះចោល។» អ្នកនាង សូដា នីតា បានសង្កត់ធ្ងន់ថាប្រសិនបើអ្នកនាងដល់ថ្នាក់ឆ្កួតដើរស្រាត (តែ១ដង) អ្នកនាងនឹងចោលលុយជិត៤ម៉ឺនដុល្លារនោះ ហើយបើសិនអ្នកនាងពិតជាសម្លាប់ខ្លួនព្រោះបំណុលមែន អ្នកនាងក៏នឹងអហោរសិកម្ម ហើយចូលលុយបុណ្យ ១០០០ដុល្លារ (មួយពាន់ដុល្លារ) ថែមពីលើនោះទៀត។
ជាចុងក្រោយនៅក្នុងសំណេរដែលបង្ហោះជាសាធារណៈនោះ អ្នកនាង សូដា នីតា បានដៀលអ្នកនាង សឿ សុធារ៉ា ជាកូនបំណុលឈ្លើយ មិនចេះសម្រួល សម្ដីទន់ភ្លន់ តែមុខវិញក្រាស់ ចរិតអន់ ធ្លាក់រណ្ដៅហើយនៅមិនប្រឹងតោងទៀត។
គួរដឹងថាភាគីអ្នកនាង សឿ សុធារ៉ា មកដល់ពេលនេះមិនទាន់មានឃើញសកម្មភាពណាមួយតបត ឬឆ្លើយតបចំពោះការលើកឡើងរបស់អ្នកនាងសូដា នីតា នោះទេ មួយវិញទៀតពេលនេះ អ្នកនាងអាចនឹងកំពុងតែមមាញឹកសំរុកថតរឿងភាគបុរាណថ្មីមួយរបស់ស្ថានីយទូរទស្សន៍ហង្សមាស៕
