ភ្នំពេញ ៖ កាលពីថ្ងៃទី២៤ ខែកុម្ភៈ ឆ្នាំ២០២៦ ចៅក្រមជំនុំជម្រះសាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសជនជាតិអង់គ្លេស២នាក់ ពីបទដឹកជញ្ជូនសារធាតុញៀនដោយខុសច្បាប់។
ជនជាប់ចោទទាំង២នាក់ ទី១.ឈ្មោះ HOGG JORDAN JAMES ភេទប្រុស ឆ្នាំកំណើត២០០៥ ជនជាតិអង់គ្លេស ផ្តន្ទាទោសដាក់ពន្ធនាគារ១០ និងពិន័យជាប្រាក់ចំនួន១០លានរៀល និងទី២.ឈ្មោះ CRELLIN CIARAN ASHLEY STEPHEN ភេទប្រុស កើតឆ្នាំ១៩៩៧ ផ្តន្ទាទោសដាក់ពន្ធនាគារ១៤ឆ្នាំ និងពិន័យជាប្រាក់ចំនួន១៤លានរៀល កាលពីពាក់កណ្តាលខែមិថុនា ឆ្នាំ២០២៥ ដែលសាលក្រមនេះដែរក៏បានបញ្ជាក់ថា ពេលជនជាប់ចោទទាំង២នាក់អនុវត្តទោសចប់ នឹងត្រូវបណ្ដោយចេញពីប្រទេសកម្ពុជា ហើយសំណុំរឿងនេះត្រូវបានបើកសវនាការជំនុំជម្រះកាលពីថ្ងៃទី២៧ ខែមករា ឆ្នាំ២០២៦ ដោយមានលោក ទិត សុទ្ធីបូរ៉ាឆាត ជាប្រធានក្រុមប្រឹក្សាជំនុំជម្រះ ។
ករណីបង្ក្រាបកញ្ឆាក្រៀមនេះ ដឹកនាំបញ្ជាផ្ទាល់ដោយ ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងគ្រឿងញៀន កម្លាំងជំនាញនៃមន្ទីរប្រឆាំងគ្រឿងញៀន សហការជាមួយសមត្ថកិច្ចគយ និងរដ្ឋាករប្រចាំអាកាសយានដ្ឋានអន្តរជាតិភ្នំពេញ (ច្រកអ្នកដំណើរចេញ) ក្រោមការសម្របសម្រួលពីលោក ស៊ិត វណ្ណ: ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ នាថ្ងៃទី១៧ ខែមិថុនា ឆ្នាំ២០២៥ បានបង្ក្រាបករណីដឹកជញ្ជូនកញ្ឆាក្រៀមប្រមាណជិត ២០ គីឡូក្រាម បម្រុងលោតឆ័ត្រឆ្លងដែនទៅក្រៅប្រទេស តាមជើងហោះហើរនៅអាកាសយានដ្ឋានអន្តរជាតិភ្នំពេញ ។
ក្នុងប្រតិបត្តិការនេះ ដំបូងឡើយសមត្តកិច្ចបានធ្វើការឃាត់ខ្លួនឈ្មួញគ្រឿងញឿនម្នាក់ ភេទប្រុស ជនជាតិអង់គ្លេស ដោយចាប់យកកញ្ឆាក្រៀមចំនួន២២ដុំ មានទម្ងន់ស្មើ១៩គីឡូ ៩០២ក្រាម (ជិត២០គីឡូក្រាម) ៕
អត្ថបទ៖ ចតុម្មុខ
