នាព្រឹកថ្ងៃចន្ទ ១៤កើត ខែផល្គុន ឆ្នាំម្សាញ់ សប្ដស័ក ព.ស.២៥៦៩ ត្រូវនឹងថ្ងៃទី២ ខែមីនា ឆ្នាំ២០២៦ នៅវិមានសាមគ្គីភាពនៃព្រឹទ្ធសភា សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា បានអនុញ្ញាតឱ្យ លោកជំទាវ ល្វីស មូស៊ីគីវ៉ាបូ (Louise Mushikiwabo) អគ្គលេខាធិការនៃអង្គការអន្តរជាតិហ្វ្រង់កូហ្វូនី (OIF) ចូលជួបសម្ដែងការគួរសម និងពិភាក្សាការងារក្នុងឱកាសដែលលោកជំទាវបំពេញទស្សនកិច្ចផ្លូវការនៅកម្ពុជា។
ក្នុងជំនួបនោះ សម្តេចតេជោ ហ៊ុន សែន បានសម្តែងនូវការស្វាគមន៍យ៉ាងកក់ក្តៅចំពោះការវិលត្រឡប់មកកាន់កម្ពុជាជាថ្មីរបស់លោកជំទាវអគ្គលេខាធិការ។ សម្តេចតេជោបានសង្កត់ធ្ងន់ថា វត្តមានរបស់លោកជំទាវនៅពេលនេះ គឺជាការលើកទឹកចិត្តដ៏សំខាន់សម្រាប់កម្ពុជា ក្នុងការត្រៀមលក្ខណៈរៀបចំធ្វើជាម្ចាស់ផ្ទះ កិច្ចប្រជុំកំពូលហ្វ្រង់កូហ្វូនី (Francophonie Summit) ដែលគ្រោងនឹងប្រព្រឹត្តទៅក្នុងខែវិច្ឆិកា ឆ្នាំ២០២៦ ខាងមុខនេះ។
សម្តេចតេជោមានប្រសាសន៍ថា ទោះបីជាស្ថានភាពពិភពលោកបច្ចុប្បន្នមានភាពស្មុគស្មាញ ប៉ុន្តែសម្តេចសង្ឃឹមយ៉ាងមុតមាំថា កិច្ចប្រជុំកំពូលនៅកម្ពុជានឹងទទួលបានជោគជ័យជាប្រវត្តិសាស្ត្រ ទាំងសម្រាប់កម្ពុជាផ្ទាល់ និងសម្រាប់អង្គការ OIF ទាំងមូល។
លោកជំទាវ Louise Mushikiwabo បានថ្លែងអំណរគុណយ៉ាងជ្រាលជ្រៅចំពោះបដិសណ្ឋារកិច្ច និងបានកោតសរសើរចំពោះការអភិវឌ្ឍយ៉ាងរហ័សរបស់កម្ពុជា។ លោកជំទាវបានរំលេចថា៖
- សមិទ្ធផលថ្មី៖ ការចាប់អារម្មណ៍យ៉ាងខ្លាំងលើភាពស្រស់ស្អាតនៃ អាកាសយានដ្ឋានអន្តរជាតិតេជោ ដែលនឹងក្លាយជាច្រកទ្វារដ៏សំខាន់ក្នុងការទទួលប្រតិភូថ្នាក់ដឹកនាំពិភពលោក។
- សន្តិភាព៖ ការវាយតម្លៃខ្ពស់ចំពោះភាពជាអ្នកដឹកនាំរបស់សម្តេចតេជោ ក្នុងការស្វែងរកសន្តិភាពជូនជាតិមាតុភូមិ ដែលជាគ្រឹះនៃការរីកចម្រើននាពេលបច្ចុប្បន្ន។
- ការប្តេជ្ញាចិត្ត៖ អង្គការ OIF នឹងផ្ដល់ការគាំទ្រពេញទំហឹងដល់កម្ពុជា ដើម្បីឱ្យការរៀបចំកិច្ចប្រជុំកំពូលឆ្នាំ២០២៦ ប្រព្រឹត្តទៅដោយរលូន និងជោគជ័យ។
បញ្ហាព្រំដែន និងសន្តិសុខសម្រាប់ប្រតិភូ
ពាក់ព័ន្ធនឹងស្ថានភាពក្នុងតំបន់ លោកជំទាវអគ្គលេខាធិការក៏បានបង្ហាញការយកចិត្តទុកដាក់ចំពោះបញ្ហាព្រំដែនកម្ពុជា-ថៃ ដោយលោកជំទាវមានគម្រោងអញ្ជើញទៅសួរសុខទុក្ខបងប្អូននៅតំបន់ព្រំដែនផងដែរ។
ជាការឆ្លើយតប សម្តេចតេជោ ហ៊ុន សែន បានថ្លែងអំណរគុណចំពោះសុឆន្ទៈរបស់លោកជំទាវដែលគាំទ្រសន្តិភាព និងមិនចង់ឃើញសង្គ្រាម។ ជាមួយគ្នានេះ សម្តេចតេជោបានផ្ញើសារតាមរយៈលោកជំទាវ ដើម្បីបញ្ជាក់ជូនដល់ថ្នាក់ដឹកនាំបណ្តាប្រទេសនិយាយភាសាបារាំងទាំងអស់ថា៖
“សូមកុំមានការព្រួយបារម្ភ ចំពោះបញ្ហាជម្លោះព្រំដែនជាមួយថៃ ព្រោះវានឹងមិនជះឥទ្ធិពល ឬបង្កជាឧបសគ្គដល់ដំណើរការនៃកិច្ចប្រជុំកំពូលដ៏មានសារៈសំខាន់ខាងមុខនោះឡើយ។”
នៅកិច្ចបញ្ចប់នៃជំនួប សម្តេចតេជោ ហ៊ុន សែន បានជូនពរឱ្យលោកជំទាវអគ្គលេខាធិការ និងគណៈប្រតិភូ ទទួលបានជោគជ័យក្នុងបេសកកម្មការងារនៅកម្ពុជា ដើម្បីពង្រឹងកិច្ចសហប្រតិបត្តិការក្នុងគ្រួសារហ្វ្រង់កូហ្វូនីឱ្យកាន់តែរឹងមាំបន្ថែមទៀត៕
អត្ថបទ៖ត្រយង