កំពង់ស្ពឺ៖ ជនសង្ស័យចំនួន ២នាក់ប្តីប្រពន្ធ ត្រូវបានកម្លាំងប្រឆាំងគ្រឿងញៀន ស្នងការខេត្តកំពង់ស្ពឺ ចាប់ខ្លួនបានបន្តបន្ទាប់ ក្នុងប្រតិបត្តិការបង្ក្រាបគ្រឿងញៀន កាលពីថ្ងៃទី៦-៧ ខែមេសា ឆ្នាំ២០២៦ នៅចំណុចភូមិក្រាំងពង្រ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ។
ជនសង្ស័យទាំង២នាក់ ១.ឈ្មោះ វង់ ស៊ីថា ហៅញ៉ាញ់ ភេទប្រុស អាយុ ៣៥ឆ្នាំ រស់នៅភូមិជាំ ឃុំតាសាល ស្រុកឱរ៉ាល់ ខេត្តកំពង់ស្ពឺ។ ២.ឈ្មោះ ឯម ស្រីនា ភេទស្រី អាយុ ៣៥ឆ្នាំ (ត្រូវជាប្រពន្ធ) នៅចំណុចភូមិត្រស់សាលា សង្កាត់ស្វាយក្រវ៉ាន់ ក្រុងច្បារមន។
តាមសមត្ថកិច្ចបានឱ្យដឹងថា កម្លាំងក្រោមការសម្របសម្រួលនីតិវិធីពីឯកឧត្ដម សុិន វិរៈ ព្រះរាជអាជ្ញា នៃអយ្យការអមសាលាដំបូងខេត្ដកំពង់ស្ពឺ បង្ក្រាបបទល្មើសជាក់ស្តែង ឃាត់ខ្លួនជនសង្ស័យជាប្តី នៅចំណុចខាងលើ កាលពីថ្ងៃទី០៦ ខែមេសា ឆ្នាំ២០២៦ បានគ្រឿងញៀនចំនួន ២កញ្ចប់ធំ, ទូរស័ព្ទ ១គ្រឿង, ម៉ូតូ ១គ្រឿង និងបន្តទៅឆែកឆេរផ្ទះ នៅថ្ងៃទី០៧ ខែមេសា សមត្ថកិច្ចដកហូតបាន ថ្នាំញៀន ប្រភេទមេតំហ្វេតាមីនចំនួន ៣២កញ្ចប់ (ធំ១២,តូច២០) ប្រភេទម្សៅខេ(K)ចំនួន ២កញ្ចប់, ប្រភេទអ៊ឹមឌីអ៊ឹមអេ (MDMA) ចំនួន ៤៩កញ្ចប់, ម្សៅប្រភេទJNX ចំនួន ៦កំប៉ុង, ម្សៅម៉ដ្ឋរូបស្លឹកឈើចំនួន ៤កញ្ចប់ធំ, បារីអេឡិចត្រូនិចចំនួន ៣៩ដើម, ទឹកអាកុលចំនួន ៣លីត្រ, ឧបករណ៍កែច្នៃផលិតគ្រឿងញៀនមួយចំនួន, កាំបិត ១ដើម, អាវុធកែច្នៃ ១ដើម, វ៉ាលីចំនួន២, ថង់សម្រាប់វេចខ្ចប់គ្រឿងញៀនមួយចំនួន។
បន្ទាប់ពីឃាត់ខ្លួនជនសង្ស័យជាប្តីបាន កម្លាំងសមត្ថកិច្ចបន្តទៅឃាត់ខ្លួនជនសង្ស័យជាប្រពន្ធ នៅចំណុចភូមិត្រស់សាលា សង្កាត់ស្វាយក្រវ៉ាន់ ក្រុងច្បារមន។ ជនសង្ស័យទាំង២នាក់ រួមជាមួយវត្ថុតាង សមត្ថកិច្ចនាំយកទៅសាកសួរ និងកសាងសំណុំរឿងនៅស្នងការខេត្តកំពង់ស្ពឺ ដើម្បីបញ្ជូនទៅតុលាកាខេត្តចាត់ការបន្តតាមនីតិវិធីច្បាប់៕
អត្ថបទ៖ តាតុងសែនជ័យ
