សារ៉េត គ្រីយ៉ា ជាប់ឈ្មោះជាកីឡាករល្អប្រចាំការប្រកួត Star of the Match ស្របពេលព្រះខ័នរាជស្វាយរៀង ឈរលេខរៀងទី៣ នៅពូល B ពានរង្វាន់ក្លិបក្នុងតំបន់អាស៊ាន ASEAN Club Championship (Shopee Cup) 2025/26។
ក្នុងជំនួបបង្គ្រប់កិច្ចក្នុងពូល B រវាងក្រុមព្រះខ័នរាជស្វាយរៀង របស់កម្ពុជា ទល់នឹងក្រុម Bangkok United FC របស់ថៃ បញ្ចប់ដោយលទ្ធផល ១-១ ក្រោមក្រសែភ្នែកអ្នកគាំទ្រជាច្រើន នាថ្ងៃទី២២ ខែមេសា ឆ្នាំ២០២៦ នៅកីឡដ្ឋាន Hàng Đẫy ប្រទេសវៀតណាម។
ការប្រកួតចាប់ផ្ដើមនៅម៉ោង ៦:៣០នាទីល្ងាច ក្រុមទាំង២ បានបើកការសម្រុកគ្នាទៅវិញទៅមក រហូតដល់នាទីទី ១៦ ក្រុម Bangkok United បានបើកការនាំមុខ ១គ្រាប់រកបានដោយកីឡាករ Rungrath។ ការប្រកួតកាន់តែមានកម្ដៅបន្ថែមទៀត រហូតដល់ចុងតង់ទី១ សារ៉េត គ្រីយ៉ា បានតែតបញ្ចូលទី១គ្រាប់បានវិញ ដែលជាការបញ្ជូនបាល់បានយ៉ាងល្អពីកិឡាករ Ryo Fujii ដោយរក្សាលទ្ធផល ១-១ រហូតដល់ចប់ការប្រកួត។
កម្មវិធីប្រកួតវគ្គពាក់កណ្ដាលផ្ដា់ព្រ័ត្រ ៖
- ជើងទី១ ថ្ងៃទី៦ ឧសភា ២០២៦៖ Selangor ជួបជាមួយ Nam Định នៅទឹកដី ម៉ាឡេស៊ី
- ជើងទី១ ថ្ងៃទី៦ ឧសភា ២០២៦៖ Johor ជួបជាមួយ Buriram នៅទឹកដី ម៉ាឡេស៊ី
- ជើងទី២ ថ្ងៃទី១៣ ឧសភា ២០២៦៖ Nam Định ជួបជាមួយ Selangor នៅទឹកដី វៀតណាម
- ជើងទី២ ថ្ងៃទី១៣ ឧសភា ២០២៦៖ Buriram ជួបជាមួយ Johor នៅទឹកដី ថៃ
គួរបញ្ជាក់ថា Buriram United ថៃ គឺជាម្ចាស់ជើងឯកឆ្នាំចាស់ នៃពានរង្វាន់ក្លិបកំពូលអាស៊ាន ASEAN Club Championship (Shopee Cup 2024/25) ក្រោយឈ្នះ Cong An Hanoi វៀតណាម ៣ទល់២ ដោយបាល់កាត់សេចក្ដី១១ម៉ែត្រ កាលពីថ្ងៃទី២១ ខែឧសភា ឆ្នាំ២០២៥។
ពានរង្វាន់ជើងឯកតំបន់អាស៊ាន ASEAN Club Championship រៀបចំឡើង ២លើកមក ឆ្នាំ២០០៣ ជើងឯកក្រុម East Bengal របស់ឥណ្ឌា ក្រោយយកឈ្នះក្រុម BEC Tero Sasana របស់ថៃ នៅវគ្គផ្ដាច់ព្រ័ត្រ ក្នុងទីក្រុងហ្សាកាតា ប្រទេសឥណ្ឌូណេស៊ីុ។ បន្ទាប់មកនៅឆ្នាំ២០០៥ ជើងឯកបានទៅក្រុម Tampines Rovers របស់សិង្ហបុរី ក្រោយយកឈ្នះក្រុម Pahang FA របស់ម៉ាឡេស៊ី ដោយលទ្ធផល ៤-២ នៅទីក្រុងបានដារសេរីបេហ្គាវ៉ាន់ ប្រទេសប្រ៊ុយណេ៕
