តុលាការចោទប្រកាន់មន្ត្រីនគរបាលជាន់ខ្ពស់ពាក់ព័ន្ធបទល្មើសពុករលួយ និងសម្អាតប្រាក់

ភ្នំពេញ៖ តំណាងអយ្យការអមសាលាដំបូងរាជធានីភ្នំពេញ នៅរសៀលថ្ងៃទី២៤ ខែមេសា ឆ្នាំ២០២៦ នេះ បានសម្រេចចោទប្រកាន់មន្ត្រីនគរបាលជាន់ខ្ពស់កម្រិតផ្កាយ២ និងផ្កាយ៣ រួមទាំងបក្ខពួក ចំនួន ៦នាក់ ក្រោមបទចោទធ្ងន់ៗពាក់ព័ន្ធនឹងអំពើពុករលួយ និងការសម្អាតប្រាក់។

យោងតាមការបញ្ជាក់របស់លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញ សំណុំរឿងនេះត្រូវបានបញ្ជូនទៅកាន់ចៅក្រមស៊ើបសួរដើម្បីចាត់ការតាមនីតិវិធីបន្ត។ បុគ្គលដែលត្រូវបានចោទប្រកាន់រួមមាន៖

• ១. ឈ្មោះ អ៊ុក ហៃសីឡា និង ២. ឈ្មោះ សរ សំណាង៖ ត្រូវបានចោទប្រកាន់ពីបទ ស៊ីសំណូក, សម្អាតប្រាក់ និងបទមិនប្រកាសទ្រព្យសម្បត្តិ និងបំណុល (តាមច្បាប់ស្ដីពីការប្រឆាំងអំពើពុករលួយ និងក្រមព្រហ្មទណ្ឌ)។

• ៣. ឈ្មោះ កូ ពិសី និង ៤. ឈ្មោះ យ៉ាត កុសល (ហៅអួង)៖ ត្រូវបានចោទប្រកាន់ពីបទ សមគំនិតក្នុងអំពើស៊ីសំណូក និងសមគំនិតក្នុងអំពើសម្អាតប្រាក់។

• ៥. ឈ្មោះ មាស ម៉ារិន៖ ត្រូវបានចោទប្រកាន់ពីបទ ផ្ដើមគំនិតក្នុងអំពើស៊ីសំណូក, សមគំនិតក្នុងអំពើសូកប៉ាន់ និងបទសម្អាតប្រាក់។

• ៦. ឈ្មោះ HOANG CHI PHU (ហៅ Tony ឬ Nam) ជនជាតិវៀតណាម (កំពុងគេចខ្លួន)៖ ត្រូវបានចោទប្រកាន់ពីបទ សូកប៉ាន់។

ការសម្រេចចោទប្រកាន់នេះ ធ្វើឡើងបន្ទាប់ពីមានការស៊ើបអង្កេតយ៉ាងល្អិតល្អន់លើភស្តុតាងដែលពាក់ព័ន្ធនឹងការរំលោភអំណាចដើម្បីផលប្រយោជន៍ផ្ទាល់ខ្លួន និងការចរាចរណ៍សាច់ប្រាក់មិនត្រឹមត្រូវ។ ករណីនេះកំពុងស្ថិតក្នុងដៃចៅក្រមស៊ើបសួរ ដើម្បីសម្រេចថាតើត្រូវឃុំខ្លួនបុគ្គលទាំងនេះជាបណ្ដោះអាសន្ន ឬយ៉ាងណា៕

អត្ថបទ៖ ចតុម្មុខ