ផ្លូវការហើយ ចំពោះដំណើរទៅវគ្គផ្តាច់ព្រ័ត្រ ពានរង្វាន់កម្រិតទី៣ប្រចាំទ្វីបអាស៊ី AFC Challenge League រដូវកាលឆ្នាំ២០២៥-២៦ ដោយក្រុមព្រះខ័នរាជស្វាយរៀង តំណាងកម្ពុជា នឹងត្រៀចេញទៅប្រទេសគុយវ៉ែត ដើម្បីដណ្តើមជើងឯកទល់នឹងម្ចាស់ផ្ទះ Kuwait SC នៅថ្ងៃទី១៣ ខែឧសភា ឆ្នាំ២០២៦ ខាងមុខ។
ពេលនេះសារព័ត៌មានត្រយង សូមលើកយករឿងសំខាន់ៗមួយចំនួនអំពីប្រទេសគុយវ៉ែត មកជម្រាបជូនប្រិយមិត្ត ដូចតទៅ៖
ទី១) ព័ត៌មានទូទៅ និងល្វែងម៉ោង
នៅប្រទេសគុយវ៉ែត គឺប្រើម៉ោង AST (Arabia Standard Time) ដែលម៉ោងនោះគឺយឺតជាងកម្ពុជា ចំនួន៤ ម៉ោង ឧទាហរណ៍ថាប្រសិនបើនៅកម្ពុជា ម៉ោង ៧:០០ យប់ នោះនៅប្រទេសគុយវ៉ែត គឺម៉ោង ៣:០០ រសៀល។
ចំពោះចម្ងាយពីកម្ពុជា គិតតាមចម្ងាយផ្លូវអាកាសពីភ្នំពេញ ទៅកាន់ទីក្រុងគុយវ៉ែត មានប្រវែងប្រហែល ៦,៥០០ ទៅ ៦,៧០០ គីឡូម៉ែត្រ ដោយការហោះហើរត្រង់ ហើយអាចចំណាយពេលប្រហែល ៨ទៅ៩ ម៉ោង ប៉ុន្តែជាទូទៅត្រូវឆ្លងកាត់ប្រទេសផ្សេង ដោយត្រូវចំណាយពេលសរុបចន្លោះពី ១២ទៅ១៥ ម៉ោង។
ទី២) អាកាសធាតុ
សម្រាប់អាកាសធាតុនៅប្រទេសគុយវ៉ែត មានភាពខុសគ្នាខ្លាំងជាមួយកម្ពុជា ដោយនៅរដូវក្តៅ គឺរាប់ចាប់ពីខែមេសា ដល់ខែតុលា អាកាសធាតុមានភាពក្ដៅខ្លាំង និងស្ងួត ខណៈសីតុណ្ហភាពជាមធ្យមចន្លោះពី ៤០°C ទៅ ៤៧°C ហើយជួនកាលអាចឡើងដល់ ៥០°C ថែមទៀតផង។ ចំពោះរដូវរងា គឺរាប់ចាប់ពីវិច្ឆិកា ដល់ខែមីនា ខណៈសីតុណ្ហភាពពេលថ្ងៃចន្លោះពី ១៨°C ទៅ ២៥°C ។
ទី៣) កីឡដ្ឋាន Jaber Al-Mubarak Stadium
ក្រុម Kuwait SC នឹងប្រើប្រាស់កីឡដ្ឋាន Jaber Al-Mubarak Stadium ធ្វើជាទីតាំងការប្រកួតវគ្គផ្តាច់ព្រ័ត្រ ទល់នឹងក្រុមមកពីកម្ពុជា ព្រះខ័នរាជស្វាយរៀង ស្របពេលកីឡដ្ឋាននោះជាកីឡដ្ឋានសំខាន់មួយនៅគុយវ៉ែត សម្រាប់រៀបចំព្រឹត្តិការណ៍កីឡាក្នុងស្រុកនានា ហើយអាចផ្ទុកទស្សនិកជនចូលទស្សនាផ្ទាល់បានចំនួន១៥,០០០ នាក់។
ទី៤) ក្លិប Kuwait SC
មិនអាចមើលរំលងបានឡើយ ក្រោមមកពីតំបន់អាស៊ីខាងលេចមួយនេះមានប្រវត្តមិនធម្មតា ពោលគឺធ្លាប់គ្រងជើងឯកពានរង្វាន់លីគកំពូល ចំនួន២០លើក ពោលគឺរាប់តាំងពីឆ្នាំ ១៩៦៤ ដល់ឆ្នាំ២០២៦ នេះ។ ខណៈ ពានរង្វាន់នៅអន្តរជាតិ Kuwait SC ធ្លាប់គ្រងជើងឯកពានរង្វាន់ AFC Cup បានចំនួន ៣លើកថែមទៀតផង ដែលបច្ចប្បន្នពានរង្វាន់ប្រចាំទ្វីបមួយនោះមានឈ្មោះថា AFC Champions League Two ដោយឈ្នះ លើកដំបូងនៅឆ្នាំ២០០៩, លើកទី២ នៅឆ្នាំ២០១២ និងលើកទី៣ នៅឆ្នាំ២០១៣ ៕
