កាន់តែពិសេស និងអស្ចារ្យ មហោស្រពក្បាច់គុនចម្រុះ កម្ពុជា-ចិន (Cambodia-China Martial Arts Performance) នឹងសម្តែងរួមគ្នា អំពីយុទ្ធគុនខ្មែរបុរាណ និងក្បាច់គុនសៅលីង នៅព្រឹកថ្ងៃព្រហស្បត្តិ៍ ទី៣០ ខែមេសា ឆ្នាំ២០២៦ ពោលគឺនៅក្នុងសប្តាហ៍នេះផ្ទាល់ នៅជិតប្រាសាទបាយ័ន ខេត្តសៀមរាប។
ការរៀបចំថតឯកសារអំពីយុទ្ធគុនខ្មែរបុរាណ និងក្បាច់គុនសៅលីង រួមគ្នានេះគឺធ្វើឡើងក្នុងគោលបំណង ដើម្បីផ្សព្វផ្សាយទៅកាន់ពិភពលោក ឱ្យបានឈ្វេងយល់ពី យុទ្ធគុនខ្មែរបុរាណរបស់ខ្មែរ និងក្បាច់គុនសៅលីងរបស់ចិន នេះបើតាមការបញ្ជាក់ពីឯកឧត្តម វ៉ាត់ ចំរើន ប្រធានសហព័ន្ធកីឡាយុទ្ធគុនចម្រុះកម្ពុជា និងប្រធានសហព័ន្ធកីឡាគុនល្បុក្កតោកម្ពុជា កាលពីថ្ងៃទី២៨ ខែមេសា ឆ្នាំ២០២៦ កន្លងទៅ។
ឯកឧត្តម វ៉ាត់ ចំរើន បានបន្តថា៖ «ក្នុងនាមប្រធានសហព័ន្ធកីឡាគុនល្បុក្កតោកម្ពុជា យើងទទួលបានលិខិតស្នើសុំជួយសហការពីរដ្ឋមន្ត្រីក្រសួងទេសចរណ៍ ឯកឧត្តម ហួត ហាក់ ដោយឯកឧត្តមមានការយកចិត្តទុកដាក់ខ្ពស់ចំពោះយុទ្ធគុនសៅលីង និងយុទ្ធគុនចម្រុះកម្ពុជា។ ដូច្នេះ ក្នុងនាមជាប្រធានសហព័ន្ធកីឡាយុទ្ធគុនចម្រុះកម្ពុជា និងប្រធានសហព័ន្ធកីឡាគុនល្បុក្កតោកម្ពុជា ផងនោះ ឯកឧត្តមបានត្រៀមលក្ខណៈតាមការស្នើសុំនេះរួចរាល់ហើយ។ កាលពីឆ្នាំមុន ការសម្តែងក្បាច់គុនរួមគ្នានៃក្បាច់គុនទាំងពីរនេះទទួលបានជោគជ័យ »។
ឯកឧត្តម វ៉ាត់ ចំរើន សង្កត់ធ្ងន់ថា ៖ «យុទ្ធគុនរបស់ប្រទេសនីមួយៗ គឺមានចរិតលក្ខណៈវប្បធម៌ ទេសចរណ៍ និងនយោបាយ ព្រមទាំងការបង្ហាញពីទំនាក់ទំនងល្អរវាងប្រទេសនីមួយៗ ដែលជាមរតកវប្បធម៌នៃប្រទេសនីមួយៗ។ មរតកវប្បធម៌នេះបានស៊ីជម្រៅខ្លាំងសម្រាប់កម្ពុជាយើង ពីព្រោះកម្ពុជាមានអរិយធម៌ខ្ពង់ខ្ពស់រុងរឿង នៅសម័យអង្គរ ក៏អាស្រ័យរឿងយុទ្ធគុននេះដែរ។ អរិយធម៌រុងរឿងខ្ពង់ខ្ពស់នេះ ក៏ដោយសារតែរឿងយុទ្ធគុននេះដែរ។ សម័យនោះ ទាល់តែយុទ្ធគុនយើងខ្លាំង បានយើងរុងរឿងបាន ដែលយើងមានយុទ្ធគុន យុទ្ធមន្ត យុទ្ធសិល្បិ៍ យុទ្ធសាស្ត្រល្អ ទើបយើងអាចរុងរឿងបាន។ ដូច្នេះយើងទាំងអស់គ្នា កុំភ្លេចនូវអ្វីដែលដូនតាយើងបន្សល់ទុកឱ្យរហូតដល់បច្ចុប្បន្ននេះ»។
ជាមួយគ្នានេះ តាមរយៈការសម្តែង «មហោស្រពក្បាច់គុនចម្រុះ កម្ពុជា-ចិន» (Cambodia-China Martial Arts Performance) ដែលនឹងប្រព្រឹត្តទៅចាប់ពីម៉ោង ៧:០០នាទីព្រឹក ថ្ងៃទី៣០ ខែមេសា ឆ្នាំ២០២៦ នាបរិវេណខាងជើងប្រាសាទបាយ័ន ខេត្តសៀមរាបនេះ ជាព្រឹត្តិការណ៍មួយដ៏ល្អ។ ការសម្តែងរួមគ្នានេះ គឺជារឿងល្អមួយ ប៉ុន្តែអ្វីដែលជាអាថ៌កំបាំងនៅពីក្រោនខ្នងនៃការសម្តែងនេះ គឺការត្រៀមថតឯកសារផ្សព្វផ្សាយយុទ្ធគុនទាំងពីរនេះរួមគ្នា។ ការថតឯកសាររួមគ្នានេះនឹងប្រកបដោយភាពទាក់ទាញ និងស្តង់ដា ដែលជារឿងខ្លីមួយ ដើម្បីផ្សព្វផ្សាយទៅកាន់ពិភពលោកផងដែរ ដោយយើងគិតថា អាចនឹងផ្ទុះការចាប់អារម្មណ៍ ដោយសារតែយើងត្រៀមធ្វើក្នុងកម្រិតគុណភាពអន្តរជាតិ»។
គួរបញ្ជាក់ថា ក្រោមការរៀបចំរបស់ក្រសួងទេសចរណ៍ «មហោស្រពក្បាច់គុនចម្រុះ កម្ពុជា-ចិន» នៅបរិវេណខាងជើងប្រាសាទបាយ័ន ខេត្តសៀមរាប ជាការសម្តែងរួមគ្នាដ៏អស្ចារ្យរវាងក្បាច់គុនបុរាណខ្មែរ អាចរំពឹងថានឹងមានភ្ញៀវទេសចរណ៍ជាតិ និងអន្តរជាតិ ចូលរួមទស្សនាផ្ទាល់ និងដោយសេរីប្រមាណជាង ១,០០០នាក់៕
រូបភាព៖ ឃុត សៅ
