គូស្នេហ៍តារាល្បីលំដាប់ពិភពលោកដូចជាតួឯកស្រី «Fifty Shade of Grey» នាង Dakota Johnson តារាសម្ដែងវ័យ៣២ឆ្នាំ និងតារាចម្រៀងនាំមុខវង់តន្ត្រី Coldplay លោក Chris Martin បានសេពគប់គ្នាយ៉ាងស្ងាត់ៗ ចាប់តាំងពីអ្នកទាំងពីរបើកបង្ហើបឱ្យដឹងថាបានសេពគប់គ្នាកាលពីឆ្នាំ២០១៧។
ថ្វីត្បិតតែហ្វេនៗមិនសូវដឹងរឿងរ៉ាវស្នេហារបស់គូស្នេហ៍មួយគូនេះប៉ុន្មាន ប៉ុន្តែអ្វីគ្រប់គ្នាបានដឹងគឺ Dakota និង Chirs គឺជាហ្វេនគាំទ្រភាពយន្តភាគកូរ៉េល្បីល្បាញ «Squid Game» ដែលជាភាពយន្តភាគជាស៊េរីផលិតដោយ Netflix ហើយក៏ជាភាពយន្តដែលមានចំនួនចូលទស្សនាជាង១១១កលានដង យកឈ្នះជើងឯកចាស់ Bridgerton បានសម្រេច។
Dakota បានបង្ហើបឱ្យដឹងពីហេតុផលដែលខ្លួនចូលចិត្តទស្សនាភាពយន្ត Squid Game តាមរយៈសារព័ត៌មាន The Hollywood Reporter យ៉ាងដូច្នេះ «រឿងនេះមើលហើយតានតឹងខ្លាំងណាស់ ហើយថែមទាំងធ្វើឱ្យអារម្មណ៍អ្នកទស្សនាច្របូកច្របល់ ព្រោះមានពេលខ្លះគឺពោរពេញទៅស្នាមញញឹមនិងរីករាយ ប៉ុន្តែក្រោយពីនោះ សុខៗស្រាប់តែក្លាយជារឿងដ៏គួរឱ្យខ្លាចទៅវិញ ហើយនេះគឺជាល្បោយដែលគួរឱ្យចាប់អារម្មណ៍ក្នុងរឿងនេះ»
នៅក្នុងនោះ Dakota ក៏បានបង្ហើបឱ្យដឹងពីជីវិតឯកជនរបស់ខ្លួនថា អ្នកនាងបានប្រើប្រាស់ជីវិតផ្ទាល់ខ្លួនច្រើនរស់នៅជាមួយនឹង Chris ក្នុងអំឡុងពេលរាតត្បាតជំងឺកូវីដ-១៩ កន្លងមក សម្ព័ន្ធភាពអ្នកទាំងពីរដំណើរការទៅដោយរលូនចាប់តាំងពីអ្នកទាំងពីរផ្លាស់ប្ដូរមករស់នៅក្រោមដំបូលតែមួយកាលពីឆ្នាំ២០២០មកម្ល៉េះ ដោយ Chris បានទិញ Apartment ដ៏ទំនើបមួយតម្លៃ ១២,៥លានដុល្លារ។
ប្រភពមួយឱ្យសារព័ត៌មាន The People បានដឹងថាអ្នកទាំងពីរមានក្ដីសុខណាស់ក្នុងការប្រើប្រាស់ជីវិតរស់នៅជាមួយគ្នាព្រោះទាំង Dakota និង Chris ម្នាក់ៗចូលចិត្តសមុទ្រនិងចូលចិត្តកម្សាន្តនៅខាងក្រៅដូចគ្នា៕
