អភិបាលរាជធានីណែនាំឲ្យអាជ្ញាធរខណ្ឌទាំង១៤ និងកម្លាំងមានសមត្ថកិច្ចត្រូវបង្កើត Group Telegram ជាមួយម្ចាស់ទីតាំងរស់នៅប្រមូលផ្ដុំ ដើម្បីងាយស្រួលរាយការណ៍សុំអន្តរាគមន៍។
ឯកឧត្តម ឃួង ស្រេង អភិបាលរាជធានីភ្នំពេញបានណែនាំដល់អាជ្ញាធរមូលដ្ឋានខណ្ឌទាំង១៤ និងកម្លាំងមានសមត្ថកិច្ចត្រូវបង្កើតគ្រុបតេឡេក្រាម (Telegram Group) ជាមួយម្ចាស់ទីតាំងរស់នៅប្រមូលផ្ដុំក្នុងមូលដ្ឋានខ្លួន ដើម្បីងាយស្រួលទំនាក់ទំនង ពិសេសក្នុងការរាយការណ៍ ឬស្នើសុំកិច្ចអន្តរាគមន៍ណាមួយពីម្ចាស់ទីតាំងទាំងនោះ ប៉ុន្តែហាមដាច់ខាតការទារលុយកាក់ពីម្ចាស់ទីតាំងទាំងនោះ ហើយត្រូវបំពេញភារកិច្ចដោយភាពទទួលខុសត្រូវខ្ពស់ និងត្រៀមលក្ខណៈគ្រប់ពេលវេលា ដើម្បីចេញប្រតិបត្តិការ។
អភិបាលរាជធានីលើឡើងដូច្នេះនៅក្នុងពិធីផ្សព្វផ្សាយច្បាប់ ស្ដីពី ការប្រឆាំងការឆបោកតាមប្រព័ន្ធបច្ចេកវិទ្យា និងអនុក្រឹត្យលេខ០៣ អនក្រ.បក របស់រាជរដ្ឋាភិបាល ស្ដីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្ដុំ នារសៀលថ្ងៃទី ៧ ខែឧសភា ឆ្នាំ២០២៦ ដោយមានតំណាងម្ចាស់បុរី ខុនដូ ផ្ទះសំណាក់ និងទីតាំងរស់នៅប្រមូលផ្ដុំសរុបប្រមាណជាង ៤០០នាក់បានចូលរួម។
បន្ទាប់ពីបានស្តាប់នូវការបកស្រាយ ពន្យល់ និងដោះស្រាយនូវចម្ងល់ពីអាជ្ញាធរ បងប្អូនប្រជាពលរដ្ឋម្ចាស់បុរី ខុនដូ ផ្ទះសំណាក់ និងទីតាំងរស់នៅប្រមូលផ្ដុំដែលបានចូលរួម បានសំដែងនូវការពេញចិត្ត ដោយទទួលបានភាពកក់ក្តៅពីថ្នាក់ដឹកនាំរបស់រដ្ឋបាលរាជធានីភ្នំពេញ និងបានប្តេជ្ញាក្នុងការចូលរួមសហការជាមួយអាជ្ញាធរ ដើម្បីទប់ស្កាត់រាល់បទល្មើសនានា ពិសេសបទល្មើសឆបោកតាមប្រព័ន្ធបច្ចេកវិទ្យានេះឱ្យមានប្រសិទ្ធភាពខ្ពស់៕
