បាល់ទះ «តេជោលីគ» Techo League រដូវកាលឆ្នាំ២០២៥-២៦ ជាឱកាសសម្រាប់គ្រូថ្មី ជ្រើសរើសកីឡាករមានគុណផលត្រៀម Sea V.League ឆ្នាំ២០២៦។ នេះបើតាមប្រសាសន៍លោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជា ក្នុងសន្និសីទសារព័ត័មាន កាលពីព្រឹកថ្ងៃទី១០ ឧសភា ២០២៦ នៅមជ្ឈមណ្ឌលជាតិហ្វឹកហ្វឺនកីឡា។
ក្រោមការដឹកនាំរបស់លោក Li Huanning ជាគ្រូបង្វឹកថ្មីរបស់ក្រុមបាល់ទះជម្រើសជាតិកម្ពុជា នឹងត្រូវមានភារកិច្ចសំខាន់ក្នុងការសម្លឹងមើលកីឡាករដែលមានគុណផលពីការប្រកួតពានរង្វាន់«តេជោលីគ» Techo League រដូវកាលឆ្នាំ២០២៥-២៦ ដើម្បីត្រៀមក្នុងការប្រកួតពានរង្វាន់អន្តរជាតិសំខាន់ៗនាពេលខាងមុខ។
ដោយឡែកសម្រាប់ការប្រកួត ជើងទី១ ពានរង្វាន់ SEA V.League ឆ្នាំ២០២៦ នៅទឹកដីហ្វីលីពីន ជើងទី២ នៅទឹកដីឥណ្ឌូណេស៊ី។ ជុំវិញការប្រកួតនេះ លោក អាំង សិរីពិសិដ្ឋ បានបង្ហាញការព្រួយបារម្មណ៍ ព្រោះថាការរំកិល ពានរង្វាន់ តេជោលីគ មកលេងនៅខែ៥ បានធ្វើអោយមានពេលខ្លីត្រឹម ១០ថ្ងៃប៉ុណ្ណោះ ក្នុងការប្រមូលផ្ដុំ។
សហព័ន្ធកីឡាបាល់ទះកម្ពុជា បានសម្រេចតែងតាំងលោក Li Huanning ជាគ្រូបង្វឹកថ្មីរបស់ក្រុមបាល់ទះជម្រើសជាតិកម្ពុជា ក្រោយការចែកផ្លូវជាមួយលោក Li Jun ដើម្បីដឹកនាំក្រុមបាល់ទះជម្រើសជាតិកម្ពុជា ត្រៀមក្នុងការប្រកួតជើងឯកអាស៊ីអាគ្នេយ៍ SEA V.League ឆ្នាំ២០២៦ និងស៊ីហ្គេម លើកទី៣៤ នៅម៉ាឡេស៊ី នាឆ្នាំក្រោយជាដើម៕
