បាត់ដំបង៖ នៅថ្ងៃទី១២ ខែឧសភា ឆ្នាំ២០២៦ កម្លាំងនគរបាលស្រុកគាស់ក្រឡ បានឃាត់ខ្លួនស្ត្រីវ័យ ២២ឆ្នាំម្នាក់ ពាក់ព័ន្ធករណីរំលោភទំនុកចិត្ត ដោយខ្ចីម៉ូតូពីអ្នកស្គាល់ហើយយកទៅដាក់បញ្ចាំ ដើម្បីយកប្រាក់ចាយផ្ទាល់ខ្លួន។
ប្រតិបត្តិការនេះធ្វើឡើងក្រោមការណែនាំពីថ្នាក់ដឹកនាំនគរបាលជាតិ និងស្នងការដ្ឋាននគរបាលខេត្តបាត់ដំបង ដោយលោកអនុសេនីយ៍ឯក ចាន់ ថានូ អធិការនគរបាលស្រុកគាស់ក្រឡ បានដឹកនាំកម្លាំងសហការជាមួយនគរបាលប៉ុស្តិ៍រដ្ឋបាលអូរជ្រៅ នៃក្រុងប៉ោយប៉ែត ខេត្តបន្ទាយមានជ័យ ចុះប្រតិបត្តិការនាំខ្លួនជនសង្ស័យ។
ជនសង្ស័យមានឈ្មោះ ណាក់ ចន្នី ភេទស្រី អាយុ ២២ឆ្នាំ រស់នៅស្រុកគាស់ក្រឡ ខេត្តបាត់ដំបង។ សមត្ថកិច្ចបានដកហូតម៉ូតូម៉ាក Scoopy ពណ៌ក្រហម សេរីឆ្នាំ២០២០ មួយគ្រឿង ពីហាងបញ្ចាំមួយកន្លែងនៅសង្កាត់អូរជ្រៅ។
តាមការស្រាវជ្រាវ ករណីនេះកើតឡើងកាលពីថ្ងៃទី២៨ ខែមេសា ឆ្នាំ២០២៦ នៅភូមិគោកពោន ខេត្តបាត់ដំបង។ ជនសង្ស័យបានសុំខ្ចីម៉ូតូពីជនរងគ្រោះឈ្មោះ ឆាយ តាក់ អាយុ ៣៧ឆ្នាំ ដោយអះអាងថាខ្ចីប្រើបន្តិច ប៉ុន្តែក្រោយទទួលបានម៉ូតូហើយ បានជិះគេចខ្លួន ហើយយកទៅដាក់បញ្ចាំ មិនវិលត្រឡប់វិញឡើយ។
ក្រោយការសាកសួរ ជនសង្ស័យបានសារភាពថា មូលហេតុដែលប្រព្រឹត្តអំពើនេះ គឺដោយសារខ្វះប្រាក់ចាយ។
បច្ចុប្បន្ន សមត្ថកិច្ចបានរៀបចំបញ្ជូនជនសង្ស័យ និងសំណុំរឿងទៅកាន់ស្នងការដ្ឋាននគរបាលខេត្ត ដើម្បីអនុវត្តបន្តតាមនីតិវិធីច្បាប់។ ចំណែកម៉ូតូត្រូវបានប្រគល់ជូនម្ចាស់ដើមវិញ បន្ទាប់ពីបំពេញបែបបទរួចរាល់។
ករណីនេះជាឧទាហរណ៍មួយ បង្ហាញថា ការទុកចិត្តខុសកន្លែង អាចនាំឲ្យខាតបង់ទ្រព្យសម្បត្តិបានយ៉ាងងាយ។
អត្ថបទ៖ ភ្នាក់ងារខេត្តកណ្ដាល
