តាមរដ្ឋបាលខេត្តកែបបានឱ្យដឹងថា ដោយអនុវត្តតាមអនុសាសន៍ណែនាំដ៏ខ្ពង់ខ្ពស់របស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងការចង្អុលណែនាំជាប្រចាំពីលោកឧត្តមសេនីយ៍ទោ សម្បត្តិ សុធារដ្ឋ ស្នងការនគរបាលខេត្តកែប កម្លាំងសមត្ថកិច្ចបានបន្តជំរុញយ៉ាងសកម្មនូវយុទ្ធនាការផ្សព្វផ្សាយគោលនយោបាយ «ភូមិ ឃុំ សង្កាត់ មានសុវត្ថិភាព» នៅតាមបណ្តាគ្រឹះស្ថានសិក្សាក្នុងមូលដ្ឋាន។
នៅព្រឹកថ្ងៃទី២១ ខែឧសភា ឆ្នាំ២០២៦ លោកវរសេនីយ៍ត្រី សៅ អុល នាយរងការិយាល័យចរាចរណ៍ផ្លូវគោក បានដឹកនាំក្រុមការងារចុះសហការជាមួយមន្ទីរពាក់ព័ន្ធ អាជ្ញាធរមូលដ្ឋាន កម្លាំងប៉ុស្តិ៍រដ្ឋបាល ព្រមទាំងលោកនាយកសាលា ដើម្បីរៀបចំកម្មវិធីផ្សព្វផ្សាយគោលនយោបាយសុវត្ថិភាពនៅតាមបណ្តាគ្រឹះស្ថានសិក្សា។
កម្មវិធីនេះត្រូវបានប្រារព្ធឡើងនៅវិទ្យាល័យ ប៊ុនរ៉ានី ហ៊ុនសែន ចរិយាវង្ស ស្ថិតនៅសង្កាត់អូរក្រសារ ក្រុងកែប ខេត្តកែប។ ក្នុងឱកាសនោះ មានលោកគ្រូ អ្នកគ្រូ និងសិស្សានុសិស្ស សរុបចំនួន ៩៧៣ នាក់ (ស្រី ៥១៧ នាក់) បានអញ្ជើញចូលរួមដោយផ្តល់នូវបរិយាកាសប្រកបដោយភាពកក់ក្តៅ និងយកចិត្តទុកដាក់ខ្ពស់។
គោលនយោបាយភូមិ ឃុំ សង្កាត់ មានសុវត្ថិភាព ជាអ្វី?
គោលនយោបាយ«ភូមិ ឃុំ សង្កាត់ មានសុវត្ថិភាព» គឺជាគោលនយោបាយអាទិភាយមួយរបស់ក្រសួងមហាផ្ទៃ ដែលដាក់ចេញក្នុងគោលបំណងពង្រឹងសន្តិសុខ សុវត្ថិភាព និងសណ្តាប់ធ្នាប់សាធារណៈនៅតាមមូលដ្ឋានទូទាំងប្រទេស។ គោលនយោបាយនេះផ្តោតសំខាន់លើចំណុចស្នូលដូចខាងក្រោម៖
១. ការបង្ការ និងទប់ស្កាត់បទល្មើស ៖ គោលនយោបាយនេះលើកទឹកចិត្តឱ្យមានការចូលរួមពីសហគមន៍ក្នុងការបង្ការបទល្មើសគ្រប់ប្រភេទ រួមមាន អំពើលួចឆក់ អំពើហិង្សាក្នុងគ្រួសារ គ្រឿងញៀន ការជួញដូរមនុស្ស និងបទល្មើសតាមប្រព័ន្ធបច្ចេកវិទ្យា។ សមត្ថកិច្ច និងអាជ្ញាធរមូលដ្ឋានត្រូវបង្កើនការល្បាត និងបង្កើតយន្តការទទួលព័ត៌មានពីប្រជាពលរដ្ឋ។
២. សុវត្ថិភាពចរាចរណ៍ ៖ ការផ្សព្វផ្សាយអំពីច្បាប់ចរាចរណ៍ផ្លូវគោក និងការពាក់មួកសុវត្ថិភាព ការគោរពផ្លូវធ្វើដំណើរ និងការប្រឆាំងការបើកបរក្រោមឥទ្ធិពលគ្រឿងស្រវឹង គឺជាផ្នែកមួយដ៏សំខាន់នៃគោលនយោបាយនេះ។
៣. សុវត្ថិភាពសង្គមកិច្ច ៖ គោលនយោបាយនេះក៏ផ្តោតលើការការពារអំពើហិង្សាលើកុមារ និងស្ត្រី ការបង្ការគ្រោះថ្នាក់ពីគ្រឿងញៀនក្នុងសហគមន៍ និងការលើកកម្ពស់សុខុមាលភាពរបស់ប្រជាពលរដ្ឋ។
៤. ការចូលរួមពីសហគមន៍ ៖ គោលនយោបាយនេះសង្កត់ធ្ងន់លើការចូលរួមរបស់ប្រជាពលរដ្ឋគ្រប់រូប ដោយធ្វើឱ្យភូមិ ឃុំ សង្កាត់ ក្លាយជា “ខ្សែការពារទីមួយ” ក្នុងការទប់ស្កាត់បទល្មើស។ ប្រជាពលរដ្ឋត្រូវបានលើកទឹកចិត្តឱ្យផ្តល់ព័ត៌មានអំពីសកម្មភាពខុសច្បាប់ដល់សមត្ថកិច្ចតាមបណ្តាញនានា។
យ៉ាងណាមិញក្នុងពិធីនោះ លោកវរសេនីយ៍ត្រី សៅ អុល បានពន្យល់អំពីអត្ថន័យ សារៈសំខាន់ និងគោលបំណងនៃគោលនយោបាយ«ភូមិ ឃុំ សង្កាត់ មានសុវត្ថិភាព» ដោយសង្កត់ធ្ងន់ទៅលើការចូលរួមរបស់សហគមន៍ និងស្ថាប័នអប់រំក្នុងការកសាងសង្គមឱ្យមានសណ្តាប់ធ្នាប់ សុវត្ថិភាព និងចីរភាព។ លោកក៏បានជំរុញឱ្យសិស្សានុសិស្សទាំងអស់ក្លាយជាអ្នកផ្សព្វផ្សាយបន្តនូវចំណេះដឹងអំពីការបង្ការគ្រោះថ្នាក់ចរាចរណ៍ ការប្រើប្រាស់បច្ចេកវិទ្យាប្រកបដោយសុវត្ថិភាព និងការចៀសវាងនូវបាតុភូតអប្រិយផ្សេងៗក្នុងសង្គម។
គួរបញ្ជាក់ផងដែរថា កិច្ចការនេះបង្ហាញពីការប្តេជ្ញាចិត្តខ្ពស់របស់ស្នងការដ្ឋាននគរបាលខេត្តកែប ក្នុងការបន្តអនុវត្តគោលនយោបាយភូមិ ឃុំ សង្កាត់មានសុវត្ថិភាព ដោយយកមូលដ្ឋានស្ថាប័នអប់រំជាគោលដៅសំខាន់មួយ សំដៅកសាងបរិស្ថានសិក្សាប្រកបដោយសុវត្ថិភាព និងចូលរួមចំណែកទប់ស្កាត់បទល្មើសនានាក្នុងសង្គមជាតិ។ លោកឧត្តមសេនីយ៍ទោ សម្បត្តិ សុធារដ្ឋ ក៏បានថ្លែងបញ្ជាក់បន្ថែមថា ស្នងការដ្ឋាននគរបាលខេត្តនឹងបន្តពង្រីកយុទ្ធនាការផ្សព្វផ្សាយនេះទៅកាន់សាលារៀន និងសហគមន៍នានាបន្ថែមទៀត ដើម្បីធានាបាននូវសុវត្ថិភាពជូនប្រជាពលរដ្ឋគ្រប់ៗរូប៕
