លោក ទូច សុឃៈ (សុខៈ) អ្នកនាំពាក្យរងក្រសួងមហាផ្ទៃ បានបញ្ជាក់ថា ការកំណត់ថ្មីអំពីឋានន្តរស័ក្កិឱ្យស្របតាមមុខតំណែង និងរចនាសម្ព័ន្ធអង្គភាពចំណុះក្រសួងមហាផ្ទៃ ក្នុងក្របខណ្ឌនគរបាលជាតិ គឺថ្នាក់ដឹកនាំក្រសួងមហាផ្ទៃបានសិក្សាយ៉ាងលម្អិត តាំងពីដើមអាណត្តិ ជាបន្តបន្ទាប់មក ដោយផ្អែកលើទិដ្ឋភាពសង្គម ជំនាញ រដ្ឋបាល មូលដ្ឋានច្បាប់ ជាធរមាន និងបរិបទអន្តរជាតិផងដែរ ទើបបានសម្រេចគោរពស្នើសុំការសម្រេចដ៏ខ្ពង់ខ្ពស់ពីប្រមុខរាជរដ្ឋាភិបាល។
លោកបញ្ជាក់បន្ថែមថា ទន្ទឹមនឹងនេះខ្ញុំសូមបញ្ជាក់ជូនថា ការកំណត់ឋានន្តរស័ក្កិឱ្យស៊ីទៅតាមមុខតំណែង ឱ្យស្របទៅតាមរចនាសម្ព័ន្ធចាត់តាំងនៃអង្គភាពចំណុះក្រសួងមហាផ្ទៃថ្មីនេះ គឺមិនប៉ះពាល់ដល់មន្ត្រីដែលកំពុងបំពេញការងារ ដែលកំពុងពាក់ឋានន្តរស័ក្កិ ដែលកំពុងតែកាន់មុខតំណែងដូចការកំណត់ថ្មីនេះទេ គឺនៅរក្សាភាពដើមដដែល ពុំមានការរុះរើ រៀបរយជាថ្មី ឬសម្រួលបន្ថយទៅតាមការកំណត់ថ្មីនោះឡើយ។
ដូចគ្នាដែល បងប្អូនជានគរបាល់ជាតិចំណុះក្រសួងមហាផ្ទៃ ដែលកំពុងតែកាន់មុខតំណែងនិមួយៗតាមការកំណត់ថ្មីនេះ ហើយមានឋានន្តរស័ក្កិស្របតាមការកំណត់ថ្មី គឺអនុវត្តទៅតាមការកំណត់ថ្មីនេះតែម្ដង។ ចំពោះការកំណត់ថ្មីនេះ គឺសំដៅអនុវត្ត ទៅលើមន្ត្រីជំនាន់បន្តវេន ពោលគឺមន្ត្រីនគរបាលជាតិ ដែលនឹងឡើងមកកាន់តំណែងនាពេលខាងមុខតាមប្រអប់និមួយៗដែលបានកំណត់ ពោលគឺមន្ត្រីនគរបាល់ជាតិនេះ មិនត្រូវមានឋានន្តរស័ក្កិលើសពីការកំណត់ថ្មីនេះជាដាច់ខាត។ នេះគឺជាគោលការណ៍ម៉ឺងម៉ាត់ សម្រាប់អនុវត្តចំពោះការតែងតាំងនៅពេលក្រោយៗ ហើយក៏ចំពោះបងប្អូនដែលពាក់ឋានន្តរស័ក្កិ និងកាន់មុខតំណែងស្របទៅតាមការកំណត់ថ្មីនេះដែរ។
លោកសង្កត់ធ្ងន់ថា ការកំណត់ថ្មីនេះ មិនមានការប៉ះពាល់សតិអារម្មណ៍ណាមួយ គឺមានតែការធ្វើឱ្យរួមរស់ជាសុខដុមនីយកម្ម ជាមួយគ្នាកាន់តែមានភាពល្អប្រសើរ និងការរៀនសូត្រពីគ្នាទៅវិញទៅមកដើម្បីបន្តវេនតែប៉ុណ្ណោះ។ ពោលគឺគោរពទៅតាមគោលការណ៍ “រក្សាចាស់ បង្កើតថ្មី” ដើម្បីប្រសិទ្ធភាពនៃការដឹកនាំ បម្រើសេវាជូនប្រជាពលរដ្ឋ ថែរក្សាសន្តិសុខ សណ្តាប់ធ្នាប់ និងសុវត្ថិភាពសង្គមរបស់យើង។
គួរបញ្ជាក់ថា រាជរដ្ឋាភិបាលកម្ពុជា បានសម្រេចយល់ព្រមជាគោលការណ៍ ក្នុងការកំណត់ឋានន្តរស័ក្តិខ្ពស់បំផុត (ឋានន្តរស័ក្តិបន្តផ្ទួន) សម្រាប់មន្ត្រីនគរបាលជាតិ ដែលកាន់មុខតំណែងនីមួយៗ នៅក្នុងរចនាសម្ព័ន្ធអគ្គស្នងការដ្ឋាននគរបាលជាតិ និងអង្គភាពនគរបាលថ្នាក់ប្រហាក់ប្រហែល។
យោងតាមលិខិតផ្លូវការរបស់ទីស្តីការគណៈរដ្ឋមន្ត្រី លេខ ៣១៩ សជណ.មយ ចុះថ្ងៃទី២១ ខែឧសភា ឆ្នាំ២០២៦ ដែលចុះហត្ថលេខាដោយ លោក យឿន ណាត រដ្ឋលេខាធិការ តំណាងឱ្យឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ផ្ញើជូន ឯកឧត្តមអភិសន្ដិបណ្ឌិត ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានឱ្យដឹងថា ការសម្រេចនេះធ្វើឡើងបន្ទាប់ពីមានចំណារយល់ព្រមដ៏ខ្ពង់ខ្ពស់បំផុតពី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា កាលពីថ្ងៃទី១៩ ខែឧសភា ឆ្នាំ២០២៦។
ផ្អែកតាមសេចក្តីជូនដំណឹងដដែលនោះ ការកំណត់ឋានន្តរស័ក្តិបន្តផ្ទួនស្របតាមមុខតំណែងនីមួយៗ ត្រូវបានបែងចែកយ៉ាងលម្អិតដូចខាងក្រោម៖
- អគ្គស្នងការនៃអគ្គស្នងការដ្ឋាននគរបាលជាតិ៖ មានឋានន្តរស័ក្តិ នាយឧត្តមសេនីយ៍
- អគ្គនាយកនៃអគ្គនាយកដ្ឋាននានាថ្នាក់ប្រហាក់ប្រហែល៖ មានឋានន្តរស័ក្តិ ឧត្តមសេនីយ៍ឯក
- អគ្គស្នងការរងនៃអគ្គស្នងការដ្ឋាននគរបាលជាតិ៖ មានឋានន្តរស័ក្តិ ឧត្តមសេនីយ៍ឯក
- អគ្គនាយករងនិងថ្នាក់ប្រហាក់ប្រហែល៖ មានឋានន្តរស័ក្តិ ឧត្តមសេនីយ៍ទោ
- ប្រធានសេនាធិការដ្ឋាន និងប្រធាននាយកដ្ឋានកណ្តាល៖ មានឋានន្តរស័ក្តិ ឧត្តមសេនីយ៍ទោ
- អនុប្រធានសេនាធិការដ្ឋាន និងអនុប្រធាននាយកដ្ឋានកណ្តាល៖ មានឋានន្តរស័ក្តិ ឧត្តមសេនីយ៍ត្រី
- ប្រធាននាយកដ្ឋាន ស្នងការនៃស្នងការដ្ឋាននគរបាលរាជធានី ខេត្ត និងថ្នាក់ប្រហាក់ប្រហែល៖ មានឋានន្តរស័ក្តិ ឧត្តមសេនីយ៍ត្រី
- អនុប្រធាននាយកដ្ឋាន ស្នងការរងនៃស្នងការដ្ឋាននគរបាលរាជធានី ខេត្ត និងថ្នាក់ប្រហាក់ប្រហែល៖ មានឋានន្តរស័ក្តិ វរសេនីយ៍ឯក
- នាយការិយាល័យ អធិការនៃអធិការដ្ឋាននគរបាលក្រុង ស្រុក ខណ្ឌ និងថ្នាក់ប្រហាក់ប្រហែល៖ មានឋានន្តរស័ក្តិ វរសេនីយ៍ទោ
- នាយរងការិយាល័យ អធិការរងនៃអធិការដ្ឋាននគរបាលក្រុង ស្រុក ខណ្ឌ និងថ្នាក់ប្រហាក់ប្រហែល៖ មានឋានន្តរស័ក្តិ វរសេនីយ៍ត្រី
- នាយផ្នែក នាយប៉ុស្តិ៍នគរបាលរដ្ឋបាលឃុំ សង្កាត់ និងថ្នាក់ប្រហាក់ប្រហែល៖ មានឋានន្តរស័ក្តិ អនុសេនីយ៍ឯក
- នាយរងផ្នែក នាយរងប៉ុស្តិ៍នគរបាលរដ្ឋបាលឃុំ សង្កាត់ និងថ្នាក់ប្រហាក់ប្រហែល៖ មានឋានន្តរស័ក្តិ អនុសេនីយ៍ទោ។
ការកំណត់គោលការណ៍ឋានន្តរស័ក្តិបន្តផ្ទួនថ្មីនេះ ត្រូវបានគេមើលឃើញថា ជាការរៀបចំសណ្តាប់ធ្នាប់រចនាសម្ព័ន្ធដឹកនាំ ឱ្យកាន់តែមានសង្វាក់ការងារច្បាស់លាស់ ឆ្លើយតបទៅនឹងតួនាទី ភារកិច្ច និងការទទួលខុសត្រូវរបស់មន្ត្រីនគរបាលជាតិគ្រប់លំដាប់ថ្នាក់ ក្នុងការបម្រើជាតិ និងប្រជាពលរដ្ឋឲ្យកាន់តែមានប្រសិទ្ធភាពខ្ពស់៕
