យោងតាមការចុះផ្សាយរបស់ប្រព័ន្ធផ្សព្វផ្សាយរដ្ឋអ៊ីរ៉ង់ បានឱ្យដឹងថា ប្រធានាធិបតីអ៊ីរ៉ង់ លោក Masoud Pezeshkian បានចេញបទបញ្ជាផ្ទាល់ទៅកាន់ក្រសួងទំនាក់ទំនង និងបច្ចេកវិទ្យាព័ត៌មាន ដើម្បីស្តារ និងបើកឱ្យដំណើរការឡើងវិញនូវប្រព័ន្ធអ៊ីនធឺណិតអន្តរជាតិទូទាំងប្រទេស។ វិធានការនេះ ធ្វើឡើងក្នុងគោលបំណងបញ្ចប់ការបិទខ្ទប់ប្រព័ន្ធឌីជីថលស្ទើរតែទាំងស្រុង (Nationwide Blackout) ដែលបានអូសបន្លាយពេលអស់រយៈពេល ៨៧ ថ្ងៃមកហើយ។
ការសម្រេចចិត្តដ៏សំខាន់នេះ ត្រូវបានធ្វើឡើងបន្ទាប់ពីមានការអនុម័ត និងកិច្ចព្រមព្រៀងពីគណៈកម្មាធិការពិសេសទទួលបន្ទុកលំហសាយប័រ (Cyberspace Headquarters) ដែលដឹកនាំដោយអនុប្រធានាធិបតីទី១ លោក Mohammad-Reza Aref។
យោងតាមទិន្នន័យពីស្ថាប័នឃ្លាំមើលអ៊ីនធឺណិតសកល NetBlocks បានបង្ហាញថា ប្រជាជនអ៊ីរ៉ង់ប្រមាណ ៩០លាននាក់ ត្រូវបានកាត់ផ្ដាច់ពីពិភពខាងក្រៅតាមប្រព័ន្ធអនឡាញ ដោយសាររដ្ឋាភិបាលបានអនុវត្តវិធានការបិទខ្ទប់យ៉ាងតឹងរ៉ឹងជាពីរដំណាក់កាល៖
- ដំណាក់កាលទី១ (វិបត្តិបាតុកម្មក្នុងស្រុក)៖ ចាប់ផ្តើមតាំងពីដើមខែមករា ឆ្នាំ២០២៦ ដើម្បីបង្ក្រាបការធ្វើបាតុកម្មទ្រង់ទ្រាយធំជុំវិញបញ្ហាសេដ្ឋកិច្ច និងការធ្លាក់ចុះនៃតម្លៃរូបិយប័ណ្ណជាតិ (Rial)។
- ដំណាក់កាលទី២ (ការវាយប្រហារពីខាងក្រៅ)៖ ស្ថានភាពកាន់តែធ្ងន់ធ្ងរនៅចុងខែកុម្ភៈ បន្ទាប់ពីមានការវាយប្រហារយោធារួមគ្នាពីសំណាក់សហរដ្ឋអាមេរិក និងអ៊ីស្រាអែល មកលើទឹកដីអ៊ីរ៉ង់ ដែលធ្វើឱ្យអាជ្ញាធរសម្រេចបិទប្រព័ន្ធអ៊ីនធឺណិតអន្តរជាតិទាំងស្រុង ដើម្បីគ្រប់គ្រងព័ត៌មាន និងរូបភាពខូចខាតមិនឱ្យធ្លាយទៅក្រៅប្រទេស ដោយជំនួសមកវិញនូវការប្រើប្រាស់ប្រព័ន្ធអ៊ីនធឺណិតផ្ទៃក្នុងជាតិ (National Intranet)។
ការវិលត្រឡប់មក រកភាពប្រក្រតីវិញនៃប្រព័ន្ធទំនាក់ទំនងនេះ ធ្វើឡើងបន្ទាប់ពីសេដ្ឋកិច្ចផ្ទៃក្នុងរបស់អ៊ីរ៉ង់បានរងការខូចខាតយ៉ាងធ្ងន់ធ្ងរ ជាពិសេសការខាតបង់របស់អាជីវកម្មអនឡាញតូចធំជាង ១លានកន្លែង។ ម៉្យាងវិញទៀត វិធានការនេះស្របពេលដែលស្ថានភាពតានតឹងផ្នែកយោធាបានធូរស្រាល ក្រោយកិច្ចព្រមព្រៀងឈប់បាញ់ (Ceasefire) បានចាប់ផ្តើមឡើងកាលពីដើមខែមេសា កន្លងទៅ។
យ៉ាងណាមិញ ក្រុមអ្នកបច្ចេកវិទ្យាបានកត់សម្គាល់ថា បើទោះបីជាមានបញ្ជាឱ្យបើកដំណើរការឡើងវិញក៏ដោយ ក៏ដំណើរការបច្ចេកទេសក្នុងការដករបាំងបិទខ្ទប់លើបណ្តាញសង្គមធំៗ (ដូចជា Instagram, WhatsApp និង X) អាចនឹងត្រូវចំណាយពេលបន្តិចបន្តួចបន្ថែមទៀត ទើបប្រជាពលរដ្ឋអាចចូលប្រើប្រាស់បានពេញលេញដោយមិនចាំបាច់ប្រើប្រាស់ប្រព័ន្ធ VPN៕
