យោងតាមការចុះផ្សាយរបស់ New Straits Times បានឲ្យដឹងថា សហព័ន្ធសីប៉ាក់តាក្រម៉ាឡេស៊ី The Malaysia Sepak Takraw Federation (MSF) បានដាក់ពាក្យបណ្តឹងទៅកាន់សហព័ន្ធសីប៉ាក់តាក្រម៉ាអន្តរជាតិ (ISTAF) ជុំវិញការមិនពេញចិត្តចំពោះមន្ត្រីជាន់ខ្ពស់ថៃមួយចំនួននៅវគ្គផ្តាច់ព្រ័ត្រផ្នែកបុរសព្រឹត្តិការណ៍សីប៉ាក់តាក្រជើងឯកពិភពលោកឆ្នាំ២០២៦ (Sepaktakraw World Cup 2026) នៅទីក្រុងគូឡាឡាំពួ។
ពាក្យបណ្តឹងនេះពាក់ព័ន្ធនឹងការប្រកួតវគ្គផ្តាច់ព្រ័ត្ររវាងក្រុមជម្រើសជាតិម៉ាឡេស៊ី និងក្រុមថៃ នៅឯកីឡដ្ឋាន Titiwangsa ការប្រកួតផ្នែកបុរសវិញ្ញាសាក្រុម៣នាក់ (Regu Event) បានរងការរំខានដោយភាពចលាចល បន្ទាប់ពីក្រុមថៃបានដកខ្លួនចេញពីការប្រកួត នៅពាក់កណ្តាលទី ដើម្បីតវ៉ានឹងការសម្រេចចិត្តរបស់អាជ្ញាកណ្តាល ហើយក្រោយមកម្ចាស់ផ្ទះម៉ាឡេស៊ីត្រូវបានប្រកាសថាជាអ្នកឈ្នះក្នុងលទ្ធផល ២ទល់នឹង១។
ម៉ាឡេស៊ីបន្តទៀតថាអំឡុងពេលមានភាពចម្រូងចម្រាសកើតឡើងពីការសម្រេចចិត្តរបស់អាជ្ញាកណ្តាលក្នុងការប្រកួតសិតទី ៣ គេបានសង្កេតឃើញមន្ត្រីថៃ៣រូប ដែលគ្មានឈ្មោះក្នុងបញ្ជីចុះឈ្មោះក្រុម និងបញ្ជីប្រកួតផ្លូវការនោះ បានចូលទៅជិត និងចោមរោមគ្នានៅតំបន់កៅអីបម្រុងរបស់ក្រុមថៃ អំឡុងការប្រកួតកំពុងដំណើរការ។
លោកបានបន្តថា ក្នុងនាមជាថ្នាក់ដឹកនាំជាន់ខ្ពស់នៃកីឡាសីប៉ាក់តាក្រថៃ និងជាតំណាងដែលកាន់តំណែងសំខាន់ៗនៅក្នុងចលនាកីឡា និងរចនាសម្ព័ន្ធអូឡាំពិក ទង្វើនេះ គឺជារឿងដ៏គួរឱ្យខកចិត្ត និងព្រួយបារម្ភយ៉ាងខ្លាំង ដែលបានសង្កេតឃើញមន្ត្រីទាំងនោះ មិនបានជួយសម្រួលស្ថានការណ៍ ឬលើកទឹកចិត្តឱ្យកីឡាករថៃត្រឡប់មកកាន់ទីលានប្រកួតវិញ ដើម្បីបញ្ចប់ការប្រកួតឱ្យស្របតាមច្បាប់នៃការប្រកួត និងបទប្បញ្ញត្តិនៃការប្រកួតនោះទេ។
ផ្ទុយទៅវិញ វត្តមាន និងការប្រាស្រ័យទាក់ទងរបស់មន្ត្រីទាំងនោះជាមួយនឹងកីឡាករ អំឡុងពេលផ្អាកការប្រកួត ហាក់បីដូចជាបានរួមចំណែកបន្ថែមទៀតដល់ការរំខាន និងភាពមិនច្បាស់លាស់ជុំវិញស្ថានភាពប្រកួត នៅក្នុងដំណាក់កាលដ៏សំខាន់មួយនៃវគ្គផ្តាច់ព្រ័ត្រ៕
