សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងសារពិសេសដើម្បីជូនដំណឹងដល់ប្រជាពលរដ្ឋកម្ពុជាទាំងអស់ ឱ្យបានដឹងពីការសម្រេចចិត្តរបស់រាជរដ្ឋាភិបាលកម្ពុជា ពាក់ព័ន្ធនឹងការទាមទារដែនសមុទ្រត្រួតស៊ីគ្នាជាមួយនឹងប្រទេសថៃ។
នៅក្នុងខ្លឹមសារនៃវីដេអូថ្លែងការណ៍របស់ប្រមុខរាជរដ្ឋាភិបាលកម្ពុជា សម្ដេចធិបតី ហ៊ុន ម៉ាណែត បានគូសបញ្ជាក់ថា កម្ពុជា បានផ្ញើលិខិតជូនដំណឹងជាផ្លូវការទៅកាន់ភាគីថៃ និងអគ្គលេខាធិការអង្គការសហប្រជាជាតិ ដើម្បីចាប់ផ្ដើមដំណើរការនៃយន្តការផ្សះផ្សារដោយបង្ខំ ក្រោមអនុសញ្ញាអង្គការសហប្រជាជាតិស្ដីពីនីតិសមុទ្រ ឬ UNCLOS។ នាយករដ្ឋមន្ត្រីកម្ពុជាបានលើកឡើងថា ការដែល កម្ពុជាជ្រើសរើសយកយន្តការនេះគឺមានគោលដៅការពារអធិបតេយ្យភាពជាតិ និងសិទ្ធិលើដែនសមុទ្ររបស់កម្ពុជាដោយអនុឡោមតាមច្បាប់អន្តរជាតិ។
កម្ពុជានៅតែប្រកាន់ខ្ជាប់គោលការណ៍ដោះស្រាយវិវាទជាមួយប្រទេសជិតខាងដោយសន្តិវិធី ហើយកម្ពុជានៅតែមានគោលបំណងកសាងទំនាក់ទំនងជាមួយភាគីថៃ ដោយឈរលើមូលដ្ឋានសន្តិភាព កិច្ចសហប្រតិបត្តិការ និងការគោរពគ្នាទៅវិញទៅមក ប៉ុន្តែ អធិបតេយ្យភាពជាតិ និងសិទ្ធិលើដែនសមុទ្ររបស់កម្ពុជាត្រូវតែគោរពជាដាច់ខាត។ នេះគឺជាការអះអាងដ៏ម៉ឺងម៉ាត់របស់សម្ដេចធិបតី នាយករដ្ឋមន្ត្រីកម្ពុជា នៅក្នុងសេចក្ដីថ្លែងការណ៍នៅថ្ងៃទី២ ខែមិថុនា ឆ្នាំ២០២៦ នេះ។
សម្ដេចធិបតីនាយករដ្ឋមន្ត្រីក៏បានអះអាងនៅក្នុងសេចក្ដីថ្លែងការណ៍នោះដែរថា៖ «កម្ពុជា មិនដែលរំលោភបំពានអធិបតេយ្យភាពរបស់ប្រទេសដទៃឡើយ ជាមួយគ្នានេះ កម្ពុជាប្ដេជ្ញាចិត្តយ៉ាងដាច់ខាតក្នុងការការពារអធិបតេយ្យជាតិរបស់ខ្លួន នាពេលនេះកម្ពុជាប្រកាន់គោលជំហរទទួលខុសត្រូវដ៏មុតមាំនេះដោយមិនមែនតាមរយៈការប្រើកម្លាំង តែប្រើប្រាស់ច្បាប់ ដោយមិនមែនសកម្មភាពឯកតោភាគី តែតាមរយៈការរួមគ្នាដោះស្រាយដោយសន្តិវិធី»
សម្រាប់យន្តការផ្សះផ្សារដោយបង្ខំនេះ ធ្លាប់បានអនុវត្តដោយជោគជ័យ ដោះស្រាយវិវាទព្រំដែនសមុទ្ររវាងប្រទេសអូស្ត្រាលី និងទីម័រខាងកើតបានដោយជោគជ័យនៅឆ្នាំ២០១៨ ដូច្នេះការប្រើប្រាស់យន្តការផ្សះផ្សារដោយបង្ខំ ដើម្បីដោះស្រាយវិវាទព្រំដែនសមុទ្ររវាងកម្ពុជា និងថៃនាពេលនេះគឺជាការណីទីពីរហើយនៅក្នុងប្រវត្តិសាស្ត្ររបស់ UNClOS៕
ទស្សនាវីដេអូពិស្តារសូមចុច៖ Link
