ភ្នំពេញ៖ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានគណៈកម្មាធិការជាតិគ្រប់គ្រងអាងទន្លេ នៅថ្ងៃទី០៥ ខែមិថុនា ឆ្នាំ២០២៦ បានអញ្ជើញជាអធិបតីភាពដឹកនាំកិច្ចប្រជុំគណៈកម្មាធិការជាតិគ្រប់គ្រងអាងទន្លេ នៅទីស្តីការក្រសួង ដើម្បីពិភាក្សាលើការងារគ្រប់គ្រងទន្លេ ស្ទឹង ព្រែក ច្រាំង-ឆ្នេរ និងដីចំណីមាត់ច្រាំង។
នៅក្នុងកិច្ចប្រជុំដ៏មានសារៈសំខាន់នេះ មានការធ្វើបទបង្ហាញផ្តោតលើប្រធានបទគន្លឹះចំនួនពីរ រួមមាន៖ ការគ្រប់គ្រងទន្លេ ស្ទឹង ព្រែក ផ្ដោតលើមូលដ្ឋានគតិយុត្តិ បទដ្ឋានបច្ចេកទេស យន្តការ និងនីតិវិធីអនុវត្តរបស់លេខាធិការដ្ឋាននៃគណៈកម្មាធិការជាតិគ្រប់គ្រងអាងទន្លេ។ ការសិក្សាជលវិទ្យានិងជលគតិ ការកំណត់ខ្សែបន្ទាត់មូលដ្ឋានសម្រាប់ការកែលម្អរំហូរទន្លេ (River Training Line) របស់នាយកដ្ឋានជលសាស្ត្រ និងការងារទន្លេ។
ឯកឧត្តមរដ្ឋមន្ត្រី បានមានប្រសាសន៍បញ្ជាក់ឱ្យដឹងថា ការងារគ្រប់គ្រងអាងទន្លេនៅកម្ពុជា ជាពិសេសដីចំណីច្រាំងទន្លេ ស្ទឹង បឹងបួ គឺនៅជួបបញ្ហាប្រឈមមួយចំនួន ដែលទាមទារឱ្យមានការចូលរួមកាន់តែសកម្មពីក្រសួងស្ថាប័នពាក់ព័ន្ធអន្តរវិស័យ។
ឯកឧត្តមរដ្ឋមន្ត្រី បានស្នើឱ្យអាជ្ញាធររាជធានី-ខេត្តនីមួយៗ លើកជាផែនការមេរៀបចំច្រាំងនៅតាមសមត្ថកិច្ចរបស់ខ្លួនដោយកំណត់ប្រវែង បរិមាណ និងថវិកា ដោយផ្តោតលើតំបន់ប្រឈមខ្លាំង រួចដាក់ជូនក្រសួងធនធានទឹក និងឧតុនិយម ឬក្រសួងសេដ្ឋកិច្ច និងហិរញ្ញវត្ថុ ដើម្បីពិនិត្យលទ្ធភាពដោះស្រាយរួម។
ទន្ទឹមនឹងនេះ ឯកឧត្តមរដ្ឋមន្ត្រី ក៏បានលើកទឹកចិត្តឱ្យម្ចាស់ដីឯកជនមានដីជាប់ទន្លេ ស្ទឹង បឹងបួ ចូលរួមក្នុងសាងសង់ច្រាំង ដោយស្នើសុំទៅអាជ្ញាធរដែនដី និងក្រសួងធនធានទឹក និងឧតុនិយម។
សូមបញ្ជាក់ថា រាជរដ្ឋាភិបាលកម្ពុជាកាលពីថ្ងៃទី២៤ ខែកក្កដា ឆ្នាំ២០១៥ បានចេញអនុក្រឹត្យលេខ៩៨អនក្រ.បក ស្ដីពីការគ្រប់គ្រងអាងទន្លេ ដើម្បីគ្រប់គ្រង អភិរក្ស និងអភិវឌ្ឍអាងទន្លេឱ្យមានប្រសិទ្ធភាព និងនិរន្តរភាព ដោយអនុលោមតាមច្បាប់ស្ដីពីការគ្រប់គ្រងធនធានទឹកនៅក្នុងព្រះរាជាណាចក្រកម្ពុជា។
ក្នុងនោះដែរ សមត្ថកិច្ចនិងយន្តការនៃការគ្រប់គ្រងអាងទន្លេគឺមានគណៈកម្មាធិការជាតិគ្រប់គ្រងអាងទន្លេ និង គណៈកម្មាធិការរាជធានីខេត្តគ្រប់គ្រងអាងទន្លេ ព្រមទាំងមានលេខាធិការដ្ឋានជាសេនាធិការ ដើម្បីធានាដល់កិច្ចដំណើរការឱ្យមានប្រសិទ្ធភាពខ្ពស់។ ដីចំណីមាត់ច្រាំង ឆ្នេរ និងពាមសមុទ្រ នៅតំបន់រាជធានី ឬក្រុងនៃខេត្តឬទីប្រជុំជន និងតំបន់អភិវឌ្ឍន៍ ត្រូវកំណត់ដោយលិខិតបទដ្ឋានគតិយុត្តដាច់ដោយឡែក៕
