នាយកដ្ឋានធនធានភូគព្ភសាស្ត្រ បង្ហាញពីមូលហេតុ គ្រោះរញ្ជួយដីកម្រិតធ្ងន់ ៧.៨ រិចទ័រ នៅហ្វីលីពីន បណ្តាលឱ្យផ្ទះសម្បែងបាក់បែកខ្ទេចខ្ទី ព្រមទាំងព្រមានពីគ្រោះថ្នាក់រលកយក្សស៊ូណាមិនៅតាមបណ្តោយឆ្នេរ ក្រោយរកឃើញស្រទាប់ផែនដីក្នុងបាតសមុទ្រ លូនចូលក្រោមស្រទាប់ផែនដីអឺរ៉ាស៊ី (Eurasian Plate)។
ករណីគ្រោះធម្មជាតិដ៏អាក្រក់នៅហ្វីលីពីន បានកើតឡើងកាលពីវេលាម៉ោង ០៦:៣៧ នាទីព្រឹក ថ្ងៃទី៨ ខែមិថុនា ឆ្នាំ២០២៦ កន្លងទៅ។ ការរញ្ជួយដីបានកើតឡើងនៅក្នុងសមុទ្រ ក្នុងកម្រិតវាយប្រហារ ៧.៨ រិចទ័រ និងមានជម្រៅ ៥៥.២ គីឡូម៉ែត្រ ដោយចំណុចកណ្តាលនៃរញ្ជួយដីនេះ ស្ថិតនៅក្បែរតំបន់ឆ្នេរ ចម្ងាយប្រហែល ២៦ គីឡូម៉ែត្រ ភាគនិរតីនៃទីក្រុង Kablalan ភាគខាងត្បូងនៃប្រទេសហ្វីលីពីន។
ហេតុការណ៍រញ្ជួយដីនៅប្រទេសហ្វីលីពីននេះ មូលហេតុ គឺបណ្តាលមកពីស្រទាប់ផែនដីនៃសមុទ្រភីលីពីន (Philippine Sea Plate) បានលូនចូលទៅក្រោមស្រទាប់ផែនដីអឺរ៉ាស៊ី (Eurasian Plate)…។
គ្រោះធម្មជាតិរញ្ជួយដីនេះ បានបណ្តាលឱ្យអគារ និងផ្ទះសម្បែងរបស់ប្រជាពលរដ្ឋនៅក្នុងទីក្រុង General Santos City ដួលរលំខ្ទេចខ្ទី ហើយអាជ្ញាធរក៏បានប្រកាសអាសន្នព្រមានពីគ្រោះថ្នាក់រលកយក្សស៊ូណាមិ នៅតាមបណ្តោយឆ្នេរសមុទ្រផងដែរ។
គួរដឹងថាគ្រោះរញ្ជួយដីលើកនេះបានសម្លាប់អាយុជីវិតជនជាតិហ្វីលីពីនចំនួន៣៥នាក់ និងមានអ្នករបួសចំនួនជាង២០០នាក់ គិតត្រឹមព្រឹកថ្ងៃទី៩ ខែមិថុនា ឆ្នាំ២០២៦ នេះ៕
