ហាណូយ៖ នៅក្នុងជំនួបពិភាក្សាផ្លូវការនៅទីក្រុងហាណូយ កាលពីថ្ងៃទី៨ ខែមិថុនា នាយករដ្ឋមន្ត្រីវៀតណាម និងនាយករដ្ឋមន្ត្រីកម្ពុជា បានឯកភាពគ្នាយ៉ាងពេញទំហឹងក្នុងការបង្កើនទំនាក់ទំនងនយោបាយ សេវាកិច្ច និងសន្តិសុខឱ្យកាន់តែស៊ីជម្រៅ សំដៅជំរុញកិច្ចសហប្រតិបត្តិការជាក់ស្តែង និងការតភ្ជាប់តំបន់ឱ្យមានការរីកចម្រើនទៅមុខមួយកម្រិតទៀត។
នាយករដ្ឋមន្ត្រីវៀតណាម លោក ឡេ មិញហ៊ុង (Le Minh Hung) បានសម្តែងការស្វាគមន៍យ៉ាងកក់ក្តៅចំពោះដំណើរទស្សនកិច្ចរបស់សមភាគីកម្ពុជា សម្តេចមហាបវរធិបតី ហ៊ុន ម៉ាណែត និងការអញ្ជើញចូលរួមក្នុងវេទិកាអនាគតអាស៊ានលើកទី៣ (AFF-3) ដោយលោកបានគូសបញ្ជាក់ថា ព្រឹត្តិការណ៍នេះនឹងជួយពង្រឹងទំនុកចិត្តខាងនយោបាយ ធ្វើឱ្យចំណងមិត្តភាពប្រពៃណីទ្វេភាគីកាន់តែរឹងមាំ ព្រមទាំងជំរុញសាមគ្គីភាព កិច្ចសហប្រតិបត្តិការ និងការតភ្ជាប់នៅក្នុងក្របខ័ណ្ឌអាស៊ាន ដើម្បីសន្តិភាព និងកិច្ចសហប្រតិបត្តិការក្នុងតំបន់ និងពិភពលោក។
លោកនាយករដ្ឋមន្ត្រីវៀតណាម ក៏បាននាំនូវការសួរសុខទុក្ខពីសំណាក់ថ្នាក់ដឹកនាំជាន់ខ្ពស់វៀតណាម ថ្វាយចំពោះព្រះករុណា ព្រះបាទសម្តេចព្រះបរមនាថ នរោត្តម សីហមុនី, សម្តេចព្រះមហាក្សត្រី នរោត្តម មុនិនាថ សីហនុ, សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងថ្នាក់ដឹកនាំជាន់ខ្ពស់កម្ពុជាដទៃទៀតផងដែរ។
លោកបានអះអាងជាថ្មីនូវគោលនយោបាយរបស់វៀតណាម ដែលជានិច្ចកាលតែងតែផ្តល់សារៈសំខាន់ និងអាទិភាពខ្ពស់បំផុតដល់ទំនាក់ទំនង «ភាពជាអ្នកភូមិផងរបងជាមួយគ្នាដ៏ល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង» រវាងវៀតណាម និងកម្ពុជា ព្រមទាំងបានថ្លែងអំណរគុណដល់សម្តេចធិបតី ហ៊ុន ម៉ាណែត និងថ្នាក់ដឹកនាំកម្ពុជា ចំពោះសច្ចៈវិរិយភាពចំពោះបក្ស រដ្ឋ និងប្រជាជនវៀតណាម។
លោក ឡេ មិញហ៊ុង បានសម្តែងនូវជំនឿចិត្តយ៉ាងមុតមាំថា ក្រោមការដឹកនាំដ៏ត្រឹមត្រូវរបស់គណបក្សប្រជាជនកម្ពុជា ក្រោមការគ្រប់គ្រងប្រកបដោយការសម្រេចចិត្តខ្ពស់របស់រាជរដ្ឋាភិបាល និងការឯកភាពគ្នារបស់ប្រជាជន កម្ពុជានឹងបន្តបោះជំហានទៅមុខលើគ្រប់វិស័យ ដើម្បីសម្រេចបាននូវដំណាក់កាលទី១ នៃយុទ្ធសាស្ត្របញ្ចកោណ និងឈានទៅសម្រេចគោលដៅក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។
ជាការឆ្លើយតប សម្តេចធិបតី ហ៊ុន ម៉ាណែត បានអបអរសាទរចំពោះការរីកចម្រើនយ៉ាងខ្លាំងក្លារបស់វៀតណាម ដោយបានលើកឡើងពីកំណើនសេដ្ឋកិច្ចជាង៨% ក្នុងឆ្នាំ២០២៥ ដែលជាអត្រាខ្ពស់បំផុតនៅក្នុងតំបន់។ សម្តេចធិបតីជឿជាក់ថា ក្រោមការដឹកនាំរបស់គណបក្សកុម្មុយនីស្តវៀតណាម និងការគ្រប់គ្រងប្រកបដោយប្រសិទ្ធភាពរបស់រដ្ឋាភិបាលវៀតណាម វៀតណាមនឹងទទួលបានសមិទ្ធផលកាន់តែធំធេងថែមទៀត សម្រេចបាននូវគោលដៅសតវត្សរ៍ទាំង២ របស់ខ្លួន និងលើកកម្ពស់តួនាទី និងឋានៈរបស់ខ្លួននៅក្នុងតំបន់ និងលើឆាកអន្តរជាតិ។
សម្តេចធិបតី បានបញ្ជាក់ពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការសហការយ៉ាងជិតស្និទ្ធជាមួយរដ្ឋាភិបាលវៀតណាម ដើម្បីអនុវត្តឱ្យមានប្រសិទ្ធភាពនូវលទ្ធផលនៃជំនួបជាន់ខ្ពស់រវាងការិយាល័យនយោបាយមជ្ឈិមបក្សកុម្មុយនីស្តវៀតណាម និងគណៈកម្មាធិការអចិន្ត្រៃយ៍នៃគណបក្សប្រជាជនកម្ពុជា ក៏ដូចជាជំនួបរវាងថ្នាក់ដឹកនាំបក្សកម្ពុជា វៀតណាម និងឡាវ ក្នុងអំឡុងពេលទស្សនកិច្ចផ្លូវរដ្ឋនៅកម្ពុជារបស់លោក តូ ឡាំ (To Lam) អគ្គលេខាធិការមជ្ឈិមបក្ស និងជាប្រធានរដ្ឋវៀតណាម កាលពីខែកុម្ភៈ ឆ្នាំ២០២៦កន្លងទៅ ព្រមទាំងកិច្ចព្រមព្រៀងកម្រិតខ្ពស់ដទៃទៀត។
ជាមួយគ្នានេះ មេដឹកនាំទាំង២ បានសម្តែងនូវការពេញចិត្តចំពោះការរីកចម្រើននៃទំនាក់ទំនងទ្វេភាគីក្នុងរយៈពេលប៉ុន្មានឆ្នាំចុងក្រោយនេះ ដោយទំនុកចិត្តខាងនយោបាយកាន់តែរឹងមាំ ហើយទំនាក់ទំនងការពារជាតិ និងសន្តិសុខនៅតែជាសសរស្ដម្ភដ៏សំខាន់។ កិច្ចសហប្រតិបត្តិការលើវិស័យពាណិជ្ជកម្ម វិនិយោគ និងទេសចរណ៍ បន្តជាចំណុចលេចធ្លោ ដោយពាណិជ្ជកម្មទ្វេភាគីសម្រេចបានជិត ៥ពាន់លានដុល្លារអាមេរិក ក្នុងរយៈពេល ៤ខែដំបូងនៃឆ្នាំ ២០២៦ សន្ទុះនេះកើនឡើង ៩,៦% ធៀបនឹងឆ្នាំមុន។ ក្នុងរយៈពេលដូចគ្នានេះ វៀតណាមបានទទួលស្វាគមន៍ប្រជាជនកម្ពុជាជិត ៤០០,០០០នាក់ ដែលកើនឡើង ៤១,៦% ជារៀងរាល់ឆ្នាំ។ កិច្ចការព្រំដែនសម្រេចបានវឌ្ឍនភាពគួរឱ្យកត់សម្គាល់ ខណៈកិច្ចសហប្រតិបត្តិការលើវិស័យអប់រំ សង្គម-វប្បធម៌ និងការផ្លាស់ប្តូររវាងប្រជាជននិងប្រជាជនកាន់តែរីកធំធាត់។
ដោយផ្អែកលើគោលដៅរួមក្នុងការបំប្លែង «មិត្តភាពប្រពៃណី» ទៅជា «កម្លាំងចលករនៃកំណើន» និង «ភាពជិតស្និទ្ធខាងប្រវត្តិសាស្ត្រ» ទៅជា «ភាពជិតស្និទ្ធខាងយុទ្ធសាស្ត្រ» ភាគីទាំង២ បានកំណត់ទិសដៅធំៗដើម្បីជំរុញការតភ្ជាប់។ ភាគីទាំង២ បានឯកភាពបន្តពង្រឹងគ្រឹះនៃទំនុកចិត្តខាងនយោបាយ និងរក្សាទំនាក់ទំនងសន្តិសុខ-ការពារជាតិឱ្យបានជិតស្និទ្ធ ដោយប្ដេជ្ញាមិនអនុញ្ញាតឱ្យកម្លាំងអរិភាពណាមួយប្រើប្រាស់ទឹកដីនៃប្រទេសទាំង២ ដើម្បីបំផ្លិចបំផ្លាញ ឬគំរាមកំហែងដល់សន្តិសុខ និងផលប្រយោជន៍របស់ប្រទេសមួយទៀតឡើយ។
សមភាគីទាំង២ បានឈានដល់ការឯកភាពគ្នាយ៉ាងទូលំទូលាយលើការតភ្ជាប់ហេដ្ឋារចនាសម្ព័ន្ធ ព្រំដែន និងច្រកទ្វារព្រំដែន ដោយព្រមព្រៀងគ្នាក្នុងការជម្រុញការតភ្ជាប់ផ្លូវល្បឿនលឿនរវាងទីក្រុងហូជីមិញ-ម៉ុកបៃ និងបាវិត-ភ្នំពេញ, ពិនិត្យលទ្ធភាពពង្រីកការតភ្ជាប់ផ្លូវអាកាសរវាងប្រទេសទាំងពីរ និងតភ្ជាប់ជាមួយប្រទេសឡាវ ព្រមទាំងសិក្សាពីការបង្កើតតំបន់សេដ្ឋកិច្ចពិសេស និងតំបន់សេដ្ឋកិច្ចឆ្លងដែន។ លើសពីនេះ ភាគីទាំងពីរក៏បានប្ដេជ្ញាសម្រួលដល់ការបំពេញបែបបទគយ និងការចរាចរទំនិញផងដែរ។
ទាក់ទិននឹងបញ្ហានេះ សម្តេចធិបតី ហ៊ុន ម៉ាណែត បានគាំទ្រយ៉ាងពេញទំហឹងចំពោះសំណើរបស់ភាគីវៀតណាម ក្នុងការបង្កលក្ខណៈងាយស្រួលដល់ការវិនិយោគទៅវិញទៅមកលើវិស័យសក្តានុពល និងតម្រូវការរួម មានដូចជា៖ ការកែច្នៃកសិផល វារីវប្បកម្ម ថាមពលស្អាត សម្ភារៈសំណង់ និងភស្តុភារកម្ម។ ភាគីទាំងពីរបានសន្យាពង្រីកកិច្ចសហប្រតិបត្តិការលើវិស័យអប់រំ និងបណ្តុះបណ្តាល លើកកម្ពស់គុណភាពកម្លាំងពលកម្ម ព្រមទាំងបង្កលក្ខណៈងាយស្រួលដល់ប្រជាពលរដ្ឋដើមកំណើតវៀតណាមនៅកម្ពុជាក្នុងការរស់នៅឱ្យបានសមរម្យ។
នៅក្នុងបរិបទនៃស្ថានភាពតំបន់ និងពិភពលោកដែលមានការប្រែប្រួលយ៉ាងស្មុគស្មាញ និងមិនអាចប៉ាន់ស្មានបាន ភាគីទាំងពីរបានប្តេជ្ញាពង្រឹងការសម្របសម្រួលនៅតាមវេទិកាតំបន់ និងសកលលោក ជាពិសេសនៅក្នុងក្របខ័ណ្ឌសហប្រតិបត្តិការអនុតំបន់មេគង្គ អាស៊ាន និងអង្គការសហប្រជាជាតិ។ ភាគីទាំង២ បានសន្យារក្សាការផ្លាស់ប្តូរ និងពិគ្រោះយោបល់លើបញ្ហាយុទ្ធសាស្ត្រដែលមានផលប្រយោជន៍រួម និងធ្វើការជាមួយរដ្ឋសមាជិកអាស៊ានដទៃទៀត ដើម្បីពង្រឹងសាមគ្គីភាព និងភាពធន់ ជម្រុញការដោះស្រាយជម្លោះដោយសន្តិវិធី និងពង្រីកកិច្ចសហប្រតិបត្តិការជាមួយដៃគូ ដោយរក្សាឱ្យបាននូវមជ្ឈភាពអាស៊ាន (ASEAN Centrality)។
នៅចុងបញ្ចប់នៃជំនួបពិភាក្សា នាយករដ្ឋមន្ត្រីទាំង២ បានអញ្ជើញជាអធិបតីក្នុងពិធីផ្លាស់ប្តូរកិច្ចព្រមព្រៀងសហប្រតិបត្តិការព័ត៌មានសម្រាប់ដំណាក់កាលឆ្នាំ២០២៦-២០៣០ រវាងក្រសួងវប្បធម៌ កីឡា និងទេសចរណ៍វៀតណាម និងក្រសួងព័ត៌មានកម្ពុជា៕
