ប្លង់គោលព្រះសារមន្ទីរនៅខេត្តស្ទឹងត្រែង ដែលបានបង្ហោះផ្សព្វផ្សាយនៅលើបណ្ដាញទំនាក់ទំនងសង្គមហ្វេសប៊ុកនៅព្រឹកថ្ងៃទី១៥ ខែមិថុនា ឆ្នាំ២០២៦ នេះ កំពុងទទួលបានការចាប់អារម្មណ៍យ៉ាងខ្លាំង ពីសាធារណជន។
គំរូប្លង់គោល ជាច្រើនសន្លឹកនោះបានបង្ហាញឱ្យឃើញថា នៅក្នុងបរិវេណនោះចែកចេញជា៣អគារសំខាន់ៗ រួមមានអគារទី១ គឺអគារព្រះករុណាសម្ដេចព្រះនរោត្តម សីហនុ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ អគារទី២ គឺអគារព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្ដីថ្លៃថ្នូរ និងសុភមង្គលនៃព្រះរាជាណាចក្រកម្ពុជា និងអគារទី៣ គឺអគារមជ្ឈមណ្ឌលសន្និបាតអាស៊ាន។
ព្រះសារមន្ទីរ ក្នុងខេត្តស្ទឹងត្រែង មិនត្រឹមតែជា សំណង់ស្ថាបត្យកម្មដ៏ស្អាតប៉ុណ្ណោះទេ តែក៏ជាការចងចាំព្រះវីរៈភាពរបស់ ព្រះករុណាព្រះបរមរតនកោដ្ឋ ជាទី គោរព ការពសក្ការៈដ៏ខ្ពង់ខ្ពស់បំផុត ដែលមួយព្រះជន្មបានបម្រើប្រជាជាតិ ប្រជារាស្ត្រ មាតុភូមិកម្ពុជា ជាទីស្នេហារបស់ព្រះអង្គផងដែរ។
សមិទ្ធផលនេះនឹងកែប្រែមុខមាត់ខេត្តស្ទឹងត្រែង ឱ្យទៅជាចំណុចស្នូលនៃទេសចរណ៍បែបប្រវត្តិសាស្ត្រ និងវប្បធម៌ និងទីតាំងរៀបចំកិច្ចប្រជុំសំខាន់ៗកម្រិតតំបន់ ដែលអាចទាក់ទាញភ្ញៀវទេសចរមកទស្សនា សិក្សាស្វែងយល់ និងជួយជំរុញសេដ្ឋកិច្ចក្នុងតំបន់បន្ថែមទៀត។
ព្រះសារមន្ទីរ ក្នុងខេត្តស្ទឹងត្រែងគឺជា “ការប្រមូលផ្ដុំ ចងក្រងឯកសារជាដួងព្រលឹង វប្បធម៌ និងប្រវត្តិសាស្ត្ររួមរបស់ជាតិ” ដែលមិនត្រឹមតែបំរើផលប្រយោជន៍ក្នុងការចងក្រងរាល់ឯកសារសំខាន់ៗជាស្នាព្រះហស្ថរបស់ប៉ុណ្ណោះទេ ប៉ុន្តែទីតាំងនេះ ក៏ជាការវិនិយោគលើ “បញ្ញាញាណ” អ្នកជំនាន់ក្រោយៗ ឱ្យបានរៀនសូត្រនិងស្វែងយល់ពីអតីតកាល ដើម្បីកសាងអនាគតសង្គមជាតិ៕
