តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ បានសម្តែងនូវការព្រួយបារម្ភយ៉ាងខ្លាំងចំពោះការកើនឡើងគួរឱ្យតក់ស្លុត នៃការរំលោភបំពានយ៉ាងធ្ងន់ធ្ងរទៅលើកុមារនៅក្នុងតំបន់ជម្លោះប្រដាប់អាវុធនានាលើសកលលោក ព្រមទាំងបានអំពាវនាវយ៉ាងទទូចឱ្យមានការអនុវត្តកាតព្វកិច្ចផ្លូវច្បាប់អន្តរជាតិឱ្យបានពេញលេញ និងម៉ឺងម៉ាត់បំផុត ដើម្បីធានាសុវត្ថិភាព និងការពារកុមារទាំងនោះ។
ការថ្លែងអំពាវនាវនេះ ត្រូវបានលើកឡើងដោយ ឯកឧត្ដម កែវ ឈា តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ (អ.ស.ប.) នៅក្នុងឱកាសដែលឯកឧត្តមបានអញ្ជើញចូលរួម និងថ្លែងបទអន្តរាគមន៍នៅក្នុង «កិច្ចពិភាក្សាបើកចំហរបស់ក្រុមប្រឹក្សាសន្តិសុខអង្គការសហប្រជាជាតិ ស្តីពីកុមារ និងជម្លោះប្រដាប់អាវុធ» កាលពីថ្ងៃទី២៥ ខែមិថុនា ឆ្នាំ២០២៦ កន្លងទៅនេះ។
នៅក្នុងកិច្ចប្រជុំកម្រិតអន្តរជាតិនោះ ឯកឧត្តមតំណាងអចិន្ត្រៃយ៍កម្ពុជា បានមានប្រសាសន៍សង្កត់ធ្ងន់ថា បច្ចុប្បន្ននេះមានកុមារជាង ៦,៤០០ នាក់នៅកម្ពុជាដែលនៅតែបន្តរងគ្រោះដោយសារការភៀសសឹក។ ជាមួយគ្នានេះ ឯកឧត្តមបានគូសបញ្ជាក់យ៉ាងច្បាស់ពីសារៈសំខាន់ជាយុទ្ធសាស្ត្រ នៃការការពារសិទ្ធិទទួលបានការអប់រំរបស់កុមារ ដោយលើកឡើងពីគំនិតផ្តួចផ្តើមដ៏មានប្រសិទ្ធភាពរបស់កម្ពុជា ដូចជាកម្មវិធី “សាលារៀនបណ្ដោះអាសន្ននៅជំរំ” ដែលត្រូវបានរៀបចំឡើងយ៉ាងយកចិត្តទុកដាក់សម្រាប់កុមារភៀសសឹក ព្រមទាំងការធានាឱ្យបាននូវការផ្តល់ជំនួយមនុស្សធម៌ជាក់លាក់ ដែលឆ្លើយតបចំតម្រូវការ និងយកចិត្តទុកដាក់ខ្ពស់ចំពោះកុមាររងផលប៉ះពាល់ទាំងអស់។
ជាទីបញ្ចប់ ឯកឧត្ដម កែវ ឈា បានផ្តល់នូវការប្តេជ្ញាចិត្តយ៉ាងមុតមាំរបស់កម្ពុជា ក្នុងការបន្តធ្វើការយ៉ាងជិតស្និទ្ធជាមួយដៃគូអន្តរជាតិ និងគ្រប់ភាគីពាក់ព័ន្ធទាំងអស់ ដើម្បីធានាឱ្យបានថា កុមារគ្រប់រូបនៅគ្រប់ទិសទីនៅលើពិភពលោក អាចមានឱកាសរស់នៅ សិក្សារៀនសូត្រ និងរីកចម្រើនទៅមុខ នៅក្នុងបរិយាកាសមួយដែលប្រកបដោយសុខសន្តិភាព គ្មានអំពើហិង្សា និងគ្មានការភ័យខ្លាចឡើយ៕
