យោងតាមរយៈទំព័រហ្វេសប៊ុករបស់ស្ថានទូតអាល្លឺម៉ង់ប្រចាំនៅកម្ពុជាបានស្រាយចម្ងល់តើកម្ដៅ ៣៥អង្សានៅអាល្លឺម៉ង់ ខុសគ្នាពីបណ្ដាប្រទេសនៅអាស៊ីបែបណា។ តាមរយៈការបង្ហោះផ្សាយនោះបានលាតត្រដាងថា មនុស្សភាគច្រើនប្រហែលជាគិតថា សីតុណ្ហភាព 35∘C មានសភាពដូចគ្នានៅគ្រប់ទីកន្លែង ហើយថែមទាំងអាចយល់ថា «នៅអាស៊ីមានអាកាសធាតុក្តៅជាង» ទៀតផង។ ប៉ុន្តែតាមពិតទៅ អាកាសធាតុខុសគ្នាមានន័យថាមនុស្សជួបប្រទះ និងរងឥទ្ធិពលពីកំដៅខុសៗគ្នា។
ខណៈពេលដែលបណ្តាប្រទេសនៅក្នុងតំបន់អាស៊ី មានភាពស៊ាំនិងបានសម្របខ្លួនទៅនឹងអាកាសធាតុក្តៅពេញមួយឆ្នាំទៅហើយនោះ ប្រទេសអាល្លឺម៉ង់វិញកំពុងតែចាប់ផ្តើមជួបប្រទះនូវរលកកំដៅញឹកញាប់ និងខ្លាំងក្លាជាងមុន ដែលនេះជាលទ្ធផលផ្ទាល់បណ្តាលមកពីការប្រែប្រួលអាកាសធាតុសកល។
វិធានការឆ្លើយតបរបស់ប្រទេសអាល្លឺម៉ង់ ដើម្បីប្រឈមមុខនឹងបញ្ហាប្រឈមថ្មីនេះ ប្រទេសអាល្លឺម៉ង់កំពុងតែបោះទុនវិនិយោគយ៉ាងសកម្មលើទិសដៅសំខាន់ៗចំនួន ៤ រួមមាន៖
- បង្កើនគម្របបៃតង៖ ដាំដើមឈើនៅក្នុងទីក្រុង និងបង្កើតកន្លែងបៃតងឱ្យបានកាន់តែច្រើន ដើម្បីជួយកាត់បន្ថយកម្តៅ។
- បង្កើតតំបន់ត្រជាក់សាធារណៈ៖ រៀបចំឱ្យមានទីតាំងសាធារណៈដែលអាចផ្តល់ភាពត្រជាក់ និងខ្យល់អាកាសបរិសុទ្ធជូនដល់ប្រជាពលរដ្ឋ។
- ផែនការសកម្មភាពកំដៅ៖ បង្កើតនិងអនុវត្តផែនការសកម្មភាពជាក់លាក់ ដើម្បីការពារក្រុមសហគមន៍ដែលងាយរងគ្រោះបំផុតពីឥទ្ធិពលនៃរលកកំដៅ។
- កសាងទីក្រុងធន់នឹងអាកាសធាតុ៖ ផ្លាស់ប្តូរនិងអភិវឌ្ឍរចនាសម្ព័ន្ធទីក្រុងឱ្យមានភាពធន់នឹងការប្រែប្រួលអាកាសធាតុសម្រាប់ពេលអនាគត។
ការប្រែប្រួលអាកាសធាតុលែងជារឿងឆ្ងាយខ្លួនទៀតហើយ។ ដូច្នេះការរៀបចំខ្លួន និងការវិនិយោគលើហេដ្ឋារចនាសម្ព័ន្ធបៃតង គឺជាគន្លឹះដ៏សំខាន់ក្នុងការការពារជីវភាពរស់នៅរបស់ប្រជាពលរដ្ឋអាល្លឺម៉ង់ក្នុងយុគសម័យថ្មីនេះ៕
