ខេត្តកំពង់ឆ្នាំង៖ សិស្សានុសិស្ស យុវជន និងគ្រូបង្រៀនសរុបប្រមាណ ៣០០ នាក់ បានសម្តែងនូវការចាប់អារម្មណ៍យ៉ាងខ្លាំង ក្នុងការចុះមកស្វះសែងឈ្វេងយល់ និងសិក្សាអំពីប្រវត្តិវត្ថុសិល្បៈបុរាណខ្មែរ ដែលធ្លាប់ត្រូវគេលួចនាំចេញទៅក្រៅប្រទេសដោយខុសច្បាប់ នៅក្នុងព្រឹត្តិការណ៍ «ការតាំងពិព័រណ៍សាធារណៈមិនអចិន្ត្រៃយ៍» អំពីរូបថតព័ត៌មានវត្ថុសិល្បៈខ្មែរ ដែលកំពុងប្រព្រឹត្តទៅនៅលើបរិវេណសួនច្បារ ឯកឧត្តមបណ្ឌិតសភាចារ្យ អ៊ុក រ៉ាប៊ុន នាខេត្តកំពង់ឆ្នាំង។
ព្រឹត្តិការណ៍ពិព័រណ៍ដ៏មានអត្ថន័យនេះ ត្រូវបានបើកសម្ពោធជាផ្លូវការនៅថ្ងៃទី៣០ ខែកក្កដា ឆ្នាំ២០២៦ ក្រោមរូបភាពកិច្ចសហការរវាង នាយកដ្ឋានបុរាណវត្ថុ និង មន្ទីរវប្បធម៌និងវិចិត្រសិល្បៈខេត្តកំពង់ឆ្នាំង។ ពិធីសម្ពោធពិព័រណ៍នេះដែរ បានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់លោកវឿនវុទ្ធី អគ្គនាយករងនៃអគ្គនាយកដ្ឋានបេតិកភណ្ឌ នៃក្រសួងវប្បធម៌និងវិចិត្រសិល្បៈ លោកឈឹមវុទ្ធា អភិបាលរងខេត្តកំពង់ឆ្នាំង និងឯកឧត្តមពៅប៊ុនថន សមាជិកក្រុមប្រឹក្សាខេត្ត។
ការរៀបចំពិព័រណ៍សាធារណៈបែបមិនអចិន្ត្រៃយ៍នាពេលនេះ មិនត្រឹមតែជាការបង្ហាញពីរូបថតព័ត៌មាននៃសម្បត្តិបេតិកភណ្ឌដែលរាជរដ្ឋាភិបាលកម្ពុជាទាមទារបានត្រឡប់មកវិញពីក្រៅប្រទេសប៉ុណ្ណោះទេ ប៉ុន្តែថែមទាំងមានគោលបំណងសំខាន់ៗដូចជា៖ អប់រំមហាជន និងសិស្សានុសិស្សឱ្យយល់ច្បាស់ពីគុណតម្លៃឥតគណនានៃមរតកដូនតា។ ដាស់អារម្មណ៍យុវជនដែលជាទំពាំងស្នងឫស្សី ឱ្យស្គាល់ពីភាពសម្បូរបែប និងលក្ខណៈពិសេសនៃសិល្បៈវប្បធម៌ខ្មែរដែលបន្សល់ទុកជាច្រើនជំនាន់។ជាពិសេស បំផុសស្មារតីឱ្យកូនខ្មែរគ្រប់រូបចូលរួមថែរក្សា ការពារ និងអភិរក្សសម្បត្តិវប្បធម៌ជាតិ ដែលជាអត្តសញ្ញាណ និងជាដួងព្រលឹងរបស់ជាតិ ស្របតាមទិសដៅ «កម្ពុជាព្រះរាជាណាចក្រនៃវប្បធម៌»។
ការស្វះសែងចូលរួមយ៉ាងសកម្មរបស់សិស្សានុសិស្សជាង ៣០០ នាក់នាឱកាសនេះ គឺជាសញ្ញាណដ៏វិជ្ជមានមួយដែលស្តែងឱ្យឃើញពីការភ្ញាក់រលឹក និងក្តីស្រឡាញ់យ៉ាងជ្រាលជ្រៅរបស់កុលបុត្រកុលធីតាខ្មែរចំពោះបេតិកភណ្ឌវប្បធម៌ជាតិខ្លួន៕
