យោងតាមការចុះផ្សាយព័ត៌មាននៅថ្ងៃទី ១៧ ខែសីហា ឆ្នាំ ២០២៦ នេះឱ្យដឹងថា ក្រសួងទេសចរណ៍កំពុងតែបើកទំព័រប្រវត្តិសាស្ត្រថ្មីមួយក្នុងការជំរុញ «ទេសចរណ៍ភាពយន្ត (Film Tourism)» ដោយប្រែក្លាយវិស័យភាពយន្តជាតិឱ្យទៅជាអំណាចទន់ (Soft Power) ដ៏មានឥទ្ធិពល ក្នុងការទាក់ទាញទស្សនិកជន និងផលិតករអន្តរជាតិឱ្យមកកាន់កម្ពុជា។
នៅក្នុងជំនួបពិភាក្សាការងាររវាង ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងជាប្រធានក្រុមការងារអន្តរក្រសួង ដើម្បីសម្របសម្រួល និងគាំទ្រវិស័យទេសចរណ៍ភាពយន្ត និងការទស្សនាប្រាសាទនាពេលរាត្រីនៅកម្ពុជា ជាមួយគណៈប្រតិភូសមាគមភាពយន្តកម្ពុជា ដឹកនាំដោយ លោក ឆាយ បូរ៉ា ប្រធានសមាគម ភាគីទាំងពីរបានឯកភាពគ្នាក្នុងការរឹតចំណងសហការយ៉ាងជិតស្និទ្ធរវាងវិស័យទេសចរណ៍ និងវិស័យសិល្បៈភាពយន្ត។
ក្នុងឱកាសនោះ ឯកឧត្តមរដ្ឋមន្ត្រី បានគូសបញ្ជាក់យ៉ាងស៊ីជម្រៅថា ភាពយន្ត គឺជាអំណាចទន់ដ៏មានឥទ្ធិពល ដែលអាចនាំយករូបភាពដ៏ល្អផូរផង់ វប្បធម៌ ប្រវត្តិសាស្ត្រ ប្រពៃណី បេតិកភណ្ឌ និងសម្រស់ធម្មជាតិរបស់កម្ពស់កម្ពុជា ទៅប៉ះពាល់ដល់បេះដូងទស្សនិកជនរាប់លាននាក់ជុំវិញពិភពលោក ព្រមទាំងបំផុសគំនិតឱ្យពួកគេចង់មកកម្សាន្ត និងទទួលយកបទពិសោធន៍នៅកម្ពុជាដោយផ្ទាល់។
ទន្ទឹមនឹងនេះ លោក ឆាយ បូរ៉ា ក៏បានគោរពរាយការណ៍អំពីសមិទ្ធផល បញ្ហាប្រឈម និងទិសដៅការងារខាងមុខ ដើម្បីរួមគ្នាលុបបំបាត់ឧបសគ្គ និងជំរុញឱ្យឧស្សាហកម្មភាពយន្តកម្ពុជាកាន់តែមានភាពរស់រវើក និងអាចប្រកួតប្រជែងលើឆាកអន្តរជាតិបាន។
កាន់តែពិសេសជាងនេះទៅទៀត ដើម្បីប្រែក្លាយចក្ខុវិស័យនេះឱ្យទៅជាសកម្មភាពជាក់ស្តែង នៅថ្ងៃទី ២០ ខែសីហា ឆ្នាំ ២០២៦ ខាងមុខនេះ ក្រសួងទេសចរណ៍នឹងរៀបចំសិក្ខាសាលាស្តីពី «ការជំរុញទេសចរណ៍ភាពយន្តនៅកម្ពុជា» ដើម្បីប្រមូលផ្តុំភាគីពាក់ព័ន្ធទាំងអស់ មកជជែកដេញដោល និងកំណត់យន្តការអាទិភាពក្នុងការប្រើប្រាស់សិល្បៈភាពយន្តជាចលករថ្មី ក្នុងការទាក់ទាញភ្ញៀវទេសចរ និងផលិតករអន្តរជាតិមកកាន់ព្រះរាជាណាចក្រកម្ពុជា៕
