ប្រធានាធិបតីអាមេរិក លោក ចូ បៃដិន បាននិយាយថា លោកនឹងនិយាយជាមួយមេដឹកនាំផ្សេងទៀតមកពីក្រុមប្រទេសសេដ្ឋកិច្ចជឿនលឿនទាំង៧ (G7) នៅសប្ដាហ៍នេះ ដើម្បីដាក់ទណ្ឌកម្មដ៏ខ្លាំងក្លាបន្ថែមលើរុស្ស៊ី ជុំវិញការបន្ដ និង វាយលុកកាន់តែខ្លាំងនៅក្នុងសង្រ្គាមនៅអ៊ុយក្រែន។
រដ្ឋមន្រ្តីក្រសួងរតនាគារសហរដ្ឋអាមេរិក លោកស្រី Janet Yellen បាននិយាយថា អាមេរិកកំពុងពិភាក្សាជាប្រចាំជាមួយដៃគូរបស់ខ្លួនអំពីការដាក់ទណ្ឌកម្មបន្ថែមទៀត ហើយអាចចាត់វិធានការបន្ថែមដើម្បីដាក់សម្ពាធលើទីក្រុងមូស្គូ។
នៅក្នុងសន្និសិទសារព័ត៌មាន លោកស្រី Yellen នឹងមិនពិនិត្យមើលសកម្មភាពជាក់លាក់ណាមួយដែលកំពុងពិចារណានោះទេ ប៉ុន្ដែបានសង្កត់ធ្ងន់ថា វិធានការបន្ថែមទៀតទំនងជាកើតមាន «ប្រសិនបើរុស្ស៊ីបន្ដសង្រ្គាមឈ្លានពានអ៊ុយក្រែន»។
លោក បៃដិន បានប្រាប់អ្នកសារព័ត៌មានថា «យើងតែងតែបើកចំហចំពោះការដាក់ទណ្ឌកម្មបន្ថែម» នៅពេលដែលត្រូវបានសួរអំពីផែនការរបស់សហរដ្ឋអាមេរិក បន្ទាប់ពីសហភាពអឺរ៉ុបបានស្នើដាក់ទណ្ឌកម្មដ៏តឹងរ៉ឹងបំផុតរបស់ខ្លួនប្រឆាំងនឹងប្រទេសរុស្ស៊ី រួមទាំងការហ៊ុំព័ទ្ធប្រេងជាដំណាក់កាល។ លោកបន្ថែមថា «ខ្ញុំនឹងនិយាយជាមួយសមាជិក G7 នៅសប្ដាហ៍នេះអំពីអ្វីដែលយើងនឹងធ្វើ ឬ មិនធ្វើ»។
សេតវិមានបានបដិសេធមិនបញ្ជាក់អំពីពេលវេលាដែលលោក បៃដិន នឹងជួបមេដឹកនាំនៃប្រទេសទាំង៧ ដែលមានដូចជា អង់គ្លេស បារាំង អាល្លឺម៉ង់ ជប៉ុន កាណាដា និង អ៉ីតាលី នោះទេ។ ជាមួយគ្នាលេខាធិការសារព័ត៌មានសេតវិមានមិនបានបញ្ជាក់អំពីប្រភេទនៃទណ្ឌកម្មដែលអាមេរិកគ្រោងនឹងដាក់លើរុស្ស៊ីនោះទេ ប៉ុន្ដែបានបញ្ជាក់ថា អាមេរិកកំពុងបន្ដពិនិត្យមើលជម្រើសរបស់ខ្លួន។
លោកស្រី Yellen ជឿថា ទណ្ឌកម្មរបស់លោកខាងលិចបានធ្វើឲ្យប៉ះពាល់ដល់សេដ្ឋកិច្ចរុស្ស៊ីយ៉ាងធ្ងន់ធ្ងរ ដោយការរារាំងការវិនិយោគបរទេស និង រារាំងពីការទទួលបានទំនិញដែលរុស្ស៊ីត្រូវការ ដើម្បីប្រកួតប្រជែងក្នុងសេដ្ឋកិច្ចពិភពលោកក្នុងរយៈពេលយូរអង្វែង។
លោកស្រីបន្តថា ការជំរុញរបស់សហភាពអឺរ៉ុបឲ្យកាត់ផ្ដាច់ការនាំចូលប្រេងពីរុស្ស៊ីនៅឆ្នាំនេះអាចជំរុញឲ្យតម្លៃប្រេងឡើងថ្លៃ ហើយលោកស្រីត្រូវពិនិត្យមើលថាតើត្រូវសម្រេចយ៉ាងណាឲ្យពិតប្រាកដ។ សហរដ្ឋអាមេរិកនឹងធ្វើការជាមួយអឺរ៉ុបដើម្បីធ្វើឲ្យប្រាកដថា ប្រទេសនៅទីនោះមានការផ្គត់ផ្គង់ដែលពួកគេត្រូវការ។
វិធានការថ្មីដែលបានប្រកាសដោយសហភាពអឺរ៉ុបរួមមាន៖ ការដាក់ទណ្ឌកម្មប្រឆាំងនឹងធនាគារកំពូលរបស់រុស្ស៊ី និង ការហាមប្រាមអ្នកផ្សាយរុស្ស៊ីពីរលកអាកាសអឺរ៉ុប ក៏ដូចជាការហាមប្រាមលើការនាំចូលប្រេងឆៅក្នុងរយៈពេល ៦ខែ ដែលកន្លងមកលោកខាងលិចក៏ធ្លាប់បានដាក់ទណ្ឌកម្មប្រឆាំងនឹងរុស្ស៊ីមួយចំនួនទៀតផងដែរ៕
