ព្រះអង្គម្ចាស់ក្សត្រិយ៍ នរោត្តម ពង្សសូរិយា នៃព្រះរាជាណាចក្រកម្ពុជា ត្រូវបានមហាជនដឹងថា ជាព្រះបុត្រីនៃសម្តេចព្រះមហិស្សរា នរោត្តម ចក្រពង្ស។ ដូច្នេះ ព្រះអង្គជាព្រះរាជនត្តាក្សត្រី (ចៅស្រី) របស់ព្រះករុណាព្រះបាទសម្តេចព្រះ នរោត្តម សីហនុ ព្រះបរមរតនកោដ្ឋ និងជាព្រះភាគិនេយ្យា (ក្មួយស្រី) នៃព្រះករុណាជាអម្ចាស់ជីវិតលើត្បូងព្រះបាទសម្តេចព្រះបរមនាថ ព្រះមហាក្សត្រកម្ពុជារជ្ជកាលបច្ចុប្បន្ន។
ថ្មីៗនេះ សារព័ត៌មានត្រយង បានទទួលដំណឹងមកថា ព្រះមហាក្សត្រនៃព្រះរាជាណាចក្រកម្ពុជា បានត្រាស់បង្គាប់ព្រះអង្គម្ចាស់ក្សត្រិយ៍ នរោត្តម ពង្សសូរិយា និងព្រះអង្គម្ចាស់ នរោត្តម ពង្សមុនីឫទ្ធ ជាទីប្រឹក្សាអមព្រះរាជលេខាធិការដ្ឋាន «ព្រះមហាក្សត្រ» មានឋានៈស្មើអនុរដ្ឋលេខាធិការ។
តាមសំណេររបស់ព្រះនាងតូច នរោត្តម ជេនណា បានមានបន្ទូលនៅលើហ្វេសប៊ុករបស់ទ្រង់ថា ៖ «អបអរសាទរ ម្ចាស់មីងខ្ញុំ ព្រះអង្គម្ចាស់ក្សត្រី នរោត្តម ពង្សសុរិយា និងម្ចាស់មា ព្រះអង្គម្ចាស់ នរោត្តម ពង្សមុនីឬទ្ធិ ដែលបានទទួលតួនាទីបម្រើរាជរដ្ឋាភិបាល និងព្រះបរមរាជវាំង។ ម្ចាស់មីង និងម្ចាស់មា ជាព្រះអនុជបង្កើតនៃព្រះមាតាខ្ញុំ ព្រះអង្គម្ចាស់ក្សត្រី នរោត្តម បុប្ផារី។ សូមថ្វាយព្រះពរម្ចាស់មីង និងម្ចាស់មា មានព្រះសុខភាពល្អ ជោគជ័យគ្រប់កិច្ចការងារទាំងអស់»៕
