ពិធីបុណ្យពិសាខបូជា បានកៀកជិតចូលមកដល់ហើយដែលនឹងប្រព្រឹត្តទៅនៅថ្ងៃអាទិត្យ ១៥កើត ខែពិសាខ ឆ្នាំខាល ចត្វាស័ក ព.ស ២៥៦៥ ត្រូវនឹង ថ្ងៃទី១៥ ខែឧសភា ឆ្នាំ២០២២ ខាងមុខនេះ ។ នៅក្នុងនោះដែរ គេឃើញនៅទីក្រុងបាត់ដំបង ដែលជាទីក្រុងបុរាណមួយដំបូងគេ បានបង្ហាញសកម្មភាពរៀបចំដាក់ស្លាក ត្រៀមពិធីបុណ្យពិសាខបូជា យ៉ាងត្រៀបត្រានៅតាមដងវិថី។
ចូលអាន៖ អភិបាលខេត្តបាត់ដំបងទទួលការសាទរព្រោះប្ដូរផ្ទាំងពាណិជ្ជកម្មដាក់ផ្ទាំងបុណ្យពិសាខបូជា
ការប្រារព្ធពិធីបុណ្យវិសាខបូជា គឺដើម្បីរម្លឹកដល់ព្រឹត្តិការណ៍ដ៏ពិសេសចំនួន៣ ដែលទាក់ទងនឹងព្រះសមា្មសម្ពុទ្ធ។ ព្រឹត្តិការណ៍ទាំងនោះ គឺ ការប្រសូត ការត្រាស់ដឹង និងការចូលនិព្វាន។ ព្រះពុទ្ធ មានព្រះនាមដើមថា សិទ្ធត្ថ ដែលជាព្រះរាជបុត្រារបស់ព្រះនាង សិរិមហាមាយា និងព្រះបាទ សុទ្ធោទនៈ។ ព្រះអង្គ ត្រូវបានគេហៅព្រះនាមជាច្រើនទៀត ដូចជា ព្រះសម្មាសម្ពុទ្ធ, ព្រះសមណគោតម, ព្រះជិនស្រី, ព្រះសក្យមុនី, ព្រះបរមគ្រូ, ព្រះសាស្តា ជាដើម។
វត្តអារាមមួយចំនួន នៅក្នុងខេត្តបាត់ដំបង បានត្រៀមលក្ខណៈរួចរាល់ហើយ ក្នុងការ ប្រារព្ធពិធីបុណ្យពិសាខបូជា ហើយបានចូលរួមផងដែរ ក្នុងការទប់ស្កាត់ការរីករាលដាលជំងឺកូវីដ-១៩ ដោយការរៀបចំនៅឆ្នាំនេះ។ ដោយឡែកព្រះវិហារបុរាណស្ថានមាននៅទីក្រុងបេកតិកភណ្ឌជាតិ បាត់ដំបង មិនតិចជាង ១០ កន្លែងនៅក្នុងទឹកដីបាត់ដំបងនោះទេ ដែលរួមមាន វត្តសំរោងក្នុង វត្តឥន្ទ្រាធិបតីធារាម ហៅ (វត្តសង្កែ) វត្តមុនីរតនារាម ហៅ (វត្តកែវ) វត្តកណ្តាល វត្តពោធិវាល វត្តពិភិទ្ធារាម វត្តកំផែង វត្តគរ វត្តដំរីស វត្តបាឡាត់ វត្តឈើខ្មៅ និងវត្តសោមនស្ស ។
ក្រុងបាត់ដំបង ត្រូវបានគេចាត់ទុកថា ជាទីក្រុងបុរាណមួយដែលមានសក្តានុពលទាក់ទាញភ្ញៀវទេសចរណ៍ជាតិ អន្តរជាតិច្រើន។ ក្រុងបាត់ដំបង គឺបេកតិកភណ្ឌជាតិ ដែលអង្គការយូណេស្កូប្រចាំនៅកម្ពុជា បានសហការជាមួយក្រសួងវប្បធម៌ និងវិចិត្រសិល្បៈ កំពុងធ្វើការសិក្សា និងមានបំណងដាក់ចូលក្នុងបញ្ជីទីក្រុងបេតិកភណ្ឌពិភពលោកផងដែរ។
យ៉ាងណាមិញ គេឃើញមានមតិមហាជនជាច្រើន បានលើកការសរសើរចំពោះរដ្ឋបាលខេត្តបាត់ដំបង ក្រោយដាក់ផ្ទាំងផ្សព្វផ្សាយពិធីបុណ្យ ពិសាខបូជា នៅតាមដងវិថីជំនួសស្រាបៀរ ដោយពួកគេលើកឡើងស្រដៀងៗគ្នាថា ៖ «គាំទ្រ! ដែលមិនផ្សាយផ្ទាំងស្រាបៀរ» «គ្រប់ខេត្តក្រុងគួរតែធ្វើអញ្ចឹងទាំងអស់ទើបល្អ» «សូមអរគុណចំពោះរដ្ឋាបាលខេត្តបាត់ដំបង» «សូមគោរពអរគុណថ្នាក់ដឹកនាំ » «គាំទ្រ១០០%» «បើបានដាក់នៅតាមផ្លូវចឹងពិតជាល្អណាស់»។
ចុះហ្វេនទាំងអស់គ្នាយល់យ៉ាងណាដែរ?
